ມີສັນຍານເຕືອນຈາກທຳມະຊາດເກີດເຫດແຜ່ນດິນໄຫວທີ່ແຂວງໄຊຍະບູລີ

ເກີດເຫດແຜ່ນດິນໄຫວ 2 ຄັ້ງທີ່ແຂວງ ໄຊຍະບູລີ ອີງຕາມການລາຍງານຈາກ ສູນຂໍ້ມູນຂ່າວສານແຜ່ນດິນໄຫວ ແຫ່ງຊາດລາວ ໃຫ້ຮູ້ວ່າ: ໄດ້ພົບສັນຍານການເກີດແຜ່ນດິນໄຫວ ພາຍໃນປະເທດລາວ ຈຳນວນ 2 ຄັ້ງ ໃນບໍລິເວນ ແຂວງ ໄຊຍະບູລີ ໃນຕອນເຊົ້າຂອງມື້ວັນທີ 1 ມິຖຸນາ 2021 ນີ້ ຊຶ່ງຄັ້ງທີ 1 ເກີດຂຶ້ນໃນເວລາ 3 ໂມງ 30 ນາທີ 53 ວິນາທີ (3:30:53 ໂມງ) ຢູ່ຈຸດສູນກາງເສັ້ນຂະໜານທີ 19.487 ອົງສາເໜືອ ແລະ ເສັ້ນແວງທີ 101.506 ອົງສາຕາເວັນອອກ ຄວາມແຮງສັ່ນສະເທືອນວັດແທກໄດ້ 2.0 ຣິກເຕີ, ມີຄວາມເລິກຈາກເທິງໜ້າດິນ ປະມານ 4 ກິໂລແມັດ, ຈຸດສູນກາງເກີດແຜ່ນດິນໄຫວຢູ່ທີ່ ເມືອງ ໄຊສະຖານ ແຂວງ ໄຊຍະບູລີ, ເຊິ່ງຈຸດເກີດແຜ່ນດິນໄຫວ ແມ່ນຫ່າງຈາກເທດສະບານ ເມືອງ ໄຊສະຖານ ປະມານ 27 ກິໂລແມັດ.

ຄັ້ງທີ 2 ແມ່ນເກີດຂຶ້ນໃນເວລາ 4 ໂມງ 54 ນາທີ 13 ວິນາທີ (4:54:13 ໂມງ) ຢູ່ຈຸດສູນກາງເສັ້ນຂະຫນານທີ 19.386 ອົງສາເໜືອ ແລະ ເສັ້ນແວງທີ 101.549 ອົງສາຕາເວັນອອກ ຄວາມແຮງສັ່ນສະເທືອນ ວັດແທກໄດ້ 1.8 ຣິກເຕີ, ເຊິ່ງມີຄວາມເລິກຈາກເທິງໜ້າດິນ ປະມານ 3 ກິໂລແມັດ, ຈຸດສູນກາງເກີດແຜ່ນດິນໄຫວຢູ່ທີ່ ບ້ານນາຂັນ, ເມືອງ ໄຊຍະບູລີ ແຂວງ ໄຊຍະບູລີ, ເຊິ່ງຈຸດເກີດແຜ່ນດິນໄຫວແມ່ນຫ່າງຈາກເທດສະບານ ເມືອງ ໄຊຍະບູລີ ປະມານ 22 ກິໂລແມັດ. ຍັງບໍ່ມີລາຍງານຜົນເສຍຫາຍຈາກເຫດການແຜ່ນດິນໄຫວໃນຄັ້ງນີ້.