ໂຄວິດ 4 ສາຍພັນທີ່ມີຄວາມ ຮ້ າ ຍ ແ ຮ ງ

ອົງການອະນາໄມໂລກໃຫ້ຮູ້ວ່າ: ສາຍພັນພະຍາດໂຄວິດ-19 ທີ່ ຮ້ າ ຍ ແ ຮ ງ ແລະ ໜ້າເປັນຫ່ວງຖ້າມີການລະບາດຢູ່ປະເທດໃດໜຶ່ງປະກອບມີ 4 ສາຍພັນ ຄື: ອາວຟາ (Alpha), ເບຕາ (Beta), ເດວຕາ (Delta) ແລະ ແກ້ມມາ (Gamma) ຊຶ່ງສາຍພັນດັ່ງກ່າວແມ່ນມີຄວາມສາມາດໃນການແຜ່ເຊື້ອໄດ້ໄວ ແລະ ສາມາດເຮັດໃຫ້ຜູ້ຕິດເຊື້ອມີອາການ ຮຸ ນ ແ ຮ ງ ຂຶ້ນ ໂດຍທີ່ 1 ໃນ 4 ສາຍພັນດັ່ງກ່າວຄື: ສາຍພັນ ເດວຕາ ແມ່ນກວດພົບຈາກຜູ້ຕິດເຊື້ອຢູ່ແຂວງຈໍາປາສັກແລ້ວຈໍານວນ 3 ຄົນເປັນແຮງງານລາວກັບຄືນປະເທດ ຢູ່ແຂວງຈໍາປາສັກເມື່ອວັນທີ 30 ມິຖຸນາ 2021 ທີ່ຜ່ານມາ.

ການກວດພົບສາຍພັນເດວຕາສະແດງໃຫ້ເຫັນຄວາມສຳຄັນ ແລະ ຄວາມຈຳເປັນຂອງມາດຕະການທີ່ໄດ້ຈັດຕັ້ງປະຕິບັດເຊັ່ນ: ການເກັບຕົວຢ່າງທຸກຄົນທີ່ເດີນທາງເຂົ້າມາ ສປປ ລາວ ເພື່ອກວດຫາເຊື້ອ ແລະ ການຈຳກັດບໍລິເວນໃນສະຖານທີ່ທີ່ທາງການໄດ້ກຳນົດໄວ້ໃຫ້ຄົບ 14 ວັນ, ການປະຕິບັດມາດຕະການດັ່ງກ່າວສາມາດຫຼຸດຜ່ອນຄວາມສ່ຽງຂອງການລະບາດໄດ້. ກະຊວງສາທາລະນະສຸກ ແລະ ຄະນະສະເພາະກິດແມ່ນໄດ້ເຝົ້າລະວັງສະຖານະການ ແລະ ຄວາມສ່ຽງຕ່າງໆຢ່າງໃກ້ຊິດ ເພື່ອປ້ອງກັນບໍ່ໃຫ້ມີການລະບາດຮອບໃໝ່ໃນປະເທດລາວຍ້ອນມີການລະບາດ ຢູ່ບັນດາປະເທດເພື່ອນບ້ານທີ່ມີຊາຍແດນຕິດຈອດກັບ ສປປ ລາວ.

ອົງການອະນາໄມໂລກໃຫ້ຮູ້ຕື່ມວ່າ: ຫຼັກຖານທາງວິທະຍາສາດຢັ້ງຢືນວ່າທຸກໆສາຍພັນຂອງພະຍາດໂຄວິດ-19 ສາມາດຫຼຸດຜ່ອນການຕິດເຊື້ອ ແລະ ແຜ່ເຊື້ອໄດ້ດ້ວຍມາດຕະການຂັ້ນຕົ້ນເຊັ່ນ: ການຮັກສາໄລຍະຫ່າງ, ຈໍາກັດບໍລິເວນໃຫ້ຖືກຕ້ອງ ແລະ ຄົບຕາມກໍານົດ, ແຍກຕົນເອງຈາກຜູ້ອື່ນຖ້າຮູ້ສຶກບໍ່ສະບາຍ, ໄປກວດຫາເຊື້ອພະຍາດໂຄວິດ-19 ຖ້າມີອາການສົງໄສ ຫຼື ມີຄວາມສ່ຽງ, ການລ້າງມືໃສ່ສະບູ ແລະ ນໍ້າສະອາດ ຫຼື ເຈວລ້າງມືທີ່ປະສົມດ້ວຍທາດເຫຼົ້າຢ່າງໜ້ອຍ 70%, ການໃສ່ຜ້າອັດປາກ-ດັງ, ການເຮັດຄວາມສະອາດຈຸດທີ່ມືເຮົາຈັບເລື້ອຍໆ ແລະ ຈຸດສ່ຽງຕ່າງໆເປັນຕົ້ນ.