ໃຊ້ງົບປະມານ 35 ພັນກວ່າຕື້ກີບສ້າງທາງດ່ວນ ບໍ່ເຕັນ-ຫ້ວຍຊາຍ

ວັນທີ 30 ມິຖຸນາ 2021 ນີ້ ທີມງານສຳຫຼວດອອກແບບໂຄງການກໍ່ສ້າງເສັ້ນທາງດ່ວນບໍ່ແກ້ວ ຫາ ບໍ່ເຕັນ ເຂົ້າພົບທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວພ້ອມຄະນະ ແລະພາກສ່ວນທີ່ກ່ຽວຂ້ອງເຂົ້າຮ່ວມ. ທ່ານ ຫຼິວຈິງເຫວີ້ຍ ຫົວໜ້າທີມງານສຳຫຼວດອອກແບບໂຄງການໄດ້ລາຍງານຈຸດປະສົງການມາເຮັດວຽກຢູ່ແຂວງບໍ່ແກ້ວໃນຄັ້ງນີ້ແມ່ນເປັນການລົງມາສຳຫຼວດກວດກາພື້ນທີ່ຕົວຈິງທີ່ຖືກເລວທາງໂຄງການກໍ່ສ້າງເສັ້ນທາງດ່ວນບໍ່ແກ້ວ ຫາ ບໍ່ເຕັນ ຢູ່ໃນຂອບເຂດຄວາມຮັບຜິດຊອບຂອງແຂວງບໍ່ແກ້ວເພື່ອເຮັດໃຫ້ການອອກແບບຈຳລອງ ແລະໃນສະພາບຕົວຈິງມີຄວາມຖືກຕ້ອງສອດຄ່ອງ, ປະຢັດງົບປະມານ ແລະໄດ້ຮັບຜົນກະທົບໃນດ້ານຕ່າງໆໜ້ອຍທີ່ສຸດໃຫ້ການນຳຂອງແຂວງຊາບ.

ຕາມບົດວິພາກຄວາມເປັນໄປໄດ້ທາງດ້ານເສດຖະກິດ-ເຕັກນິກ” ຂອງໂຄງການກໍ່ສ້າງທາງດ່ວນໃໝ່ຈາກບໍ່ເຕັນ(ຫຼວງນໍ້າທາ) ຫາຫ້ວຍຊາຍ (ແຂວງບໍ່ແກ້ວ) ໄດ້ຮັບການພິຈາລະນາ ແລະ ອະນຸມັດແລ້ວໂດຍກອງປະຊຸມລັດຖະມົນຕີກະຊວງໂຍທາທິການ ແລະ ຂົນສົ່ງ ສປປ ລາວ ທາງດ່ວນບໍ່ເຕັນ-ຫ້ວຍຊາຍ ແມ່ນເລີ່ມແຕ່ດ່ານຊາຍ ແດນບໍ່ເຕັນ(ຊາຍແດນລາວ-ຈີນ) ໄປຮອດດ່ານຊາຍແດນຫ້ວຍຊາຍ (ຊາຍແດນລາວ-ໄທ). ໄລຍະການກໍ່ສ້າງທາງແມ່ນ 176,3 ກິໂລແມັດ, ອີງຕາມມາດຕະຖານການກໍ່ສ້າງທາງດ່ວນທາງຄູ່ໄປກັບທີ່ມີ 4 ຊອງ ຈະລາຈອນການອອກແບບຄວາມໄວແມ່ນ 80 ກິໂລແມັດຕໍ່ຊົ່ວໂມງ, ຄວາມກວ້າງໜ້າທາງແມ່ນ 21 ແມັດ, ມູນຄ່າການລົງທຶນຄາດຄະເນປະມານ 24,126 ຕື້ຢວນ (3,8 ຕື້ໂດລາ ປະມານ 35,7 ພັນຕື້ກີບ) ຫຼັງຈາກສຳເລັດໂຄງການກໍ່ສ້າງນີ້ແລ້ວ, ຈາກບໍ່ເຕັນ ຫາ ຫ້ວຍຊາຍ ຈະໃຊ້ເວລາເດີນທາງພຽງແຕ່ 1,5 ຊົ່ວ ໂມງ.

ທ່ານ ປອ ບົວຄົງ ນາມມະວົງ ເຈົ້າແຂວງບໍ່ແກ້ວກໍ່ໄດ້ສະແດງຄວາມຍິນດີທີ່ທາງທີມງານໄດ້ເອົາໃຈໃສ່ເລັ່ງສຳຫຼວດອອກແບບເພື່ອເຮັດໃຫ້ໂຄງການດັ່ງກ່າວໄດ້ດຳເນີນໄປຕາມແຜນກ້າວໄປສູ່ການເລີ່ມລົງມືກໍ່ສ້າງໂດຍໄວຊຶ່ງຈະເຮັດໃຫ້ເກີດຜົນປະໂຫຍດທັງສອງຝ່າຍກໍ່ຄືການສ້າງຄວາມສະດວກໃຫ້ແກ່ການຄົມມະນາຄົມຂົນສົ່ງສິນຄ້າພາຍໃນແຂວງ, ຕ່າງແຂວງ ແລະບັນດາປະເທດໃກ້ຄຽງ, ການສັນຈອນໄປມາຂອງປະຊາຊົນຂຶ້ນຕື່ມ, ໄດ້ປະຢັດເວລາ, ປະຢັດງົບປະມານ ແລະມີຄວາມປອດໄພສູງຊຶ່ງ ຈະເປັນອີກທ່າແຮງໜຶ່ງທີ່ຈະດຶງດູດນັກທຸລະກິດເຂົ້າມາລົງທຶນຫຼາຍຂຶ້ນເຮັດໃຫ້ເສດຖະກິດ-ສັງຄົມ ຂອງແຂວງບໍ່ແກ້ວຂະຫຍາຍຕົວຂຶ້ນເລື່ອຍໆ.

ທ່ານເຈົ້າແຂວງບໍ່ແກ້ວຍັງໄດ້ໃຫ້ທິດຊີ້ນຳຕໍ່ບໍລິສັດຜູ້ທີ່ລົງທຶນໃຫ້ຄຳໜຶງເຖິງການພັດທະນາຕ້ອງຮັບປະກັນຄວາມຍືນຍົງທາງດ້ານວັດທະນະທຳ-ສັງຄົມຮັກສາເອກະລັກ ຂອງລາວ,ສິ່ງແວດລ້ອມ, ທຳມະຊາດ ແລະການດຳລົງຊີວິດຂອງປະຊາຊົນໃຫ້ສົ່ງຜົນກະທົບໜ້ອຍທີ່ສຸດ ແລະປະຊາຊົນຕ້ອງມີວຽກເຮັດງານທຳໃນການກໍ່ສ້າງເສັ້ນທາງດ່ວນບໍ່ແກ້ວຫາບໍ່ເຕັນນີ້ດ້ວຍ. ສະນັ້ນຖ້າມີຂໍ້ຫຍຸ້ງຍາກອັນໃດທີ່ທາງພາກສ່ວນກ່ຽວຂ້ອງຂອງແຂວງທາງຄະນະນຳຂອງແຂວງບໍ່ແກ້ວພ້ອມແລ້ວຈະອຳນວຍຄວາມສະດວກເພື່ອເຮັດໃຫ້ການຈັດຕັ້ງປະຕິບັດສຳຫຼວດອອກແບບຂອງທີມງານໄດ້ມີຜົນສຳເລັດໂດຍໄວ້ ແລະເຮັດໃຫ້ໂຄງການນີ້ໄດ້ລົງບໍ່ເຕັນນີ້ດ້ວຍ.