ສປປລາວ ສົ່ງນັກກິລາ 5 ຄົນຮ່ວມງານກິລາໂອແລມປິກ 2020

ສປປ ລາວ ກຽມສົ່ງນັກກິລາ 5 ຄົນ ຮ່ວມງານມະຫາກຳກິລາໂອແລມປິກ 2020 ທີ່ເລື່ອນມາແຂ່ງຂັນໃນປີນີ້ ຢູ່ໂຕກຽວ ປະເທດຍີ່ປຸ່ນ ນັກກິລາລາວ 5 ຄົນ ສະເພາະ 4 ຄົນ ຈະເຂົ້າຮ່ວມ ໂອແລມປິກເກມ ຄົນທົ່ວໄປ ແລະ 1 ຄົນ ຈະເຂົ້າຮ່ວມ ພາຣາແລມປິກເກມ (ໂອແລມປິກຄົນພິການ) ປະກອບມີດັ່ງລຸ່ມນີ້:

+ ກິລາແລ່ນ-ລານ 1 ຄົນ ນາງ ສິລິນາ ພະອາໄພ ລາຍການ ແລ່ນ 100 ແມັດ

+ ກິລາລອຍນໍ້າ 2 ຄົນ ນາງ ສິຣິອາລຸນ ບຸດຈະເລີນ ລາຍການ 50 ແມັດ ຟຣີສະຕາຍ, ທ້າວ ສັນຕິສຸກ ອິນທະວົງ ລາຍການ 50 ແມັດ ຟຣີສະຕາຍ

+ ກິລາຢູໂດ້ 1 ຄົນ ທ້າວ ສຸກພະໄຊ ສິດທິສານ ລຸ້ນນໍ້າໜັກ 60 ກິໂລ

+ ກິລາແລ່ນ-ລານ ຄົນພິການ ທ້າວ ແກ່ນ ເທບທິດາ ລາຍການ ແລ່ນ 100 ແມັດ (ພິການສາຍຕາລະດັບ T13)

ນັກກິລາ ພ້ອມດ້ວຍຄະນະນຳ-ຄູຝືກ ຈະອອກເດີນທາງ ໃນວັນທີ 15 ກໍລະກົດນີ້, ສະເພາະກິລາແລ່ນ-ລານ ແລະ ລອຍນໍ້າ ແມ່ນໄດ້ສິດທິພິເສດເຂົ້າຮ່ວມຈາກໂອແລມປິກສາກົນ, ສ່ວນກິລາຢູໂດ້ ແມ່ນຜ່ານການແຂ່ງຂັນເກັບຄະແນນຄັດເລືອກລະດັບສາກົນ. ມະຫາກຳກິລາໂອແລມປິກ 2020 ຈະແຂ່ງຂັນໃນວັນທີ 23 ກໍລະກົດ ຫາວັນທີ 8 ສິງຫາ 2021 ແລະ ມະຫາກຳກິລາໂອແລມປິກຂອງຄົນພິການ ຈະແຂ່ງຂັນໃນວັນທີ 24 ກໍລະກົດ ຫາວັນທີ 5 ກັນຍາ 2021. ຂໍໃຫ້ທຸກທ່ານເດີນທາງດ້ວຍຄວາມສະຫວັດດີພາບ ປາສະຈາກໂຄວິດ-19 ແລະ ໂຊກດີມີໄຊ