ເຮືອນຊ່ວຍເຫຼືອຜູ້ປະສົບໄພ 700 ຫລັງບໍ່ສຳເລັດຕາມແຜນຍ້ອນໂຄວິດ

ວັນທີ 6 ມິຖຸນາ 2021 ນີ້ ທ່ານ ນາງ ໃບຄຳ ຂັດທິຍະ ລັດຖະມົນຕົນ ກະຊວງແຮງງານ ແລະ ສະຫວັດດີການສັງຄົມ ໄດ້ລາຍງານໃນກອງປະຊຸມທາງໄກ ຂອງຄະນະກຳມະການຄຸ້ມຄອງໄພພິບັດຂັ້ນສູນກາງ ໃຫ້ຮູ້ວ່າ: ການແຜ່ລະບາດຂອງພະຍາດໂຄວິດ-19 ເຮັດໃຫ້ການຈັດຕັ້ງປະຕິບັດວຽກງານ ບາງດ້ານໃນການຟື້ນຟູເມືອງດັ່ງກ່າວ, ບໍ່ໄດ້ຕາມແຜນການທີ່ວາງໄວ້ ເປັນຕົ້ນການກໍ່ສ້າງເຮືອນ 700 ຫລັງ ຕິດພັນກັບກໍາມະກອນທີ່ມາຈາກຕ່າງແຂວງ, ບວກກັບການນໍາເຂົ້າອຸປະກອນຕົບແຕ່ງ ແມ່ນໄດ້ນໍາເຂົ້າມາຈາກປະເທດໄທ, ແບບແຜນວິທີເຮັດວຽກຂອງຄະນະກໍາມະການທີ່ຖືກແຕ່ງຕັ້ງ ບາງດ້ານແມ່ນຍັງເຮັດບໍ່ທັນໄດ້ດີເທົ່າທີ່ຄວນ ແລະ ຍັງມີບາງໂຄງການທີ່ຍັງບໍ່ທັນໄດ້ລົງມືຈັດຕັ້ງປະຕິບັດ ຄື:

ໂຄງການກໍ່ສ້າງທາງ 18 ເອ: ໄລຍະແຕ່ປີນດົງ-ຂົວຫ້ວຍອຸກ ໄລຍະທາງ 27 ກິໂລແມັດ; ໂຄງການກໍ່ສ້າງຫ້ອງການບ້ານຫີນລາດ, ບ້ານດອນບົກໃໝ່ແສງຈັນ ແລະ ສຸກສາບ້ານຫີນລາດ ຂອງບໍລິສັດລີຊື່ ແລະ ໂຄງການກໍ່ສ້າງສະໜາມຂີ້ເຫຍື້ອ. ສຳລັບທິດທາງແຜນການ ທີ່ຈະຕ້ອງສືບຕໍ່ຈັດຕັ້ງປະຕິບັດ ກໍຄື ສືບຕໍ່ປະສານສົມທົບກັບບໍລິສັດຜູ້ພັດທະນາໂຄງການເຂື່ອນໄຟຟ້າ ເຊປຽນ-ເຊນໍ້ານ້ອຍ SK&PNPC ຈ່າຍເງິນເງິນຊົດເຊີຍຈໍານວນທີ່ຍັງຄ້າງ; ສືບຕໍ່ຊຸກຍູ້ການຜະລິດລະດູຝົນ ປີ 2021 ໃຫ້ໄດ້ຕາມແຜນການທີ່ວາງໄວ້ ແລະ ສືບຕໍ່ຕິດຕາມຊຸກຍູ້ພັດທະນາພື້ນຖານໂຄງລ່າງໃຫ້ສໍາເລັດຕາມລະດັບຄາດໝາຍ ເປັນຕົ້ນເຮືອນ 700 ຫລັງ, ຫົນທາງ, ນໍ້າປະປາ, ຊົນລະປະທານ, ສຸກສາລາ ແລະ ອື່ນໆ.