ເລັ່ງຊອກຫາແຮງງານ 4 ຄົນລັກລອບເຂົ້າມາ

ດ່ວນທີ່ສຸດຄະນະສະເພາະກິດ ຫຼວງພະບາງ ເລັ່ງຊອກຫາ ແຮງງານ 4 ຄົນ ລັກລອບຜ່ານເຂົ້າມາແຕ່ ເຂດພິເສດສາມຫຼ່ຽມຄໍາ. ແຈ້ງການເຖິງ ຄະນະຮັບຜິດຊອບຊີ້ນໍາກຸ່ມ, ຄະນະສະເພາະກິດຂັ້ນບ້ານ, ຜູ້ປະກອບການທຸລະກິດ ແລະ ປະຊາຊົນ ບັນດາເຜົ່າ ທົ່ວນະຄອນ ຫຼວງພະບາງ, ເລື່ອງ: ກວດກາຄົນທີ່ມາຈາກສາມຫຼ່ຽມຄໍາ ແຂວງບໍ່ແກ້ວ ແຕ່ວັນທີ 12-15/7/2021 ອີງຕາມ: ແຈ້ງການຂອງຄະນະສະເພາະກິດຂັ້ນແຂວງ ຄັ້ງວັນທີ 15/7/2021ຄະນະສະເພາະກິດຂັ້ນນະຄອນ ຫຼວງພະບາງ ຂໍແຈ້ງມາຍັງທ່ານ ຊາບວ່າ: ປະຈຸບັນມີແຮງງານທີ່ໄດ້ລັກລອບມາແຕ່ສາມຫຼ່ຽມຄໍາ ແຂວງບໍ່ແກ້ວ ເຊິ່ງໄດ້ຮ່ວມ

ເດີນທາງດ້ວຍລົດມານໍາກັນທັງໝົດ 5 ຄົນ ໃນວັນທີ 12/7/2021 ເຊິ່ງມີ 1 ຄົນໄດ້ລົງແຂວງອຸດົມໄຊ ເປັນກໍລະນີທີ່ຕິດເຊື້ອພະຍາດໂຄວິດ-19 ຢູ່ແຂວງອຸດົມໄຊ ໃນວັນທີ 15/7/2021 ແລະ ອີກ 4 ຄົນ ໄດ້ເດີນທາງມານະຄອນຫຼວງພະບາງ ແຕ່ບໍ່ຮູ້ວ່າເປັນເພດຍິງ ຫຼື ຊາຍ? ບໍ່ຮູ້ວ່າຢູ່ບ້ານໃດ? ສະນັ້ນ, ໃຫ້ຄະນະຊີ້ນໍາກຸ່ມແຕ່ລະກຸ່ມ ແຈ້ງໃຫ້ຄະນະສະເພາະກິດຂັ້ນບ້ານ ລົງຕິດຕາມກວດກາໂດຍດ່ວນແຕ່ລະ ຄົວເຮືອນ ຖ້າພົບເຫັນໃຫ້ແຈ້ງຄະນະສະເພາະກິດຂັ້ນນະຄອນທັນທີ ເພື່ອຈະໄດ້ໄປຮັບເອົາບຸກຄົນດັ່ງກ່າວມາກວດຫາເຊື້ອ ພະຍາດໃຫ້ທັນເວລາ. ດັ່ງນັ້ນ, ຈິ່ງຂໍແຈ້ງມາຍັງທຸກພາກສ່ວນຈົ່ງໃຫ້ການຮ່ວມມື ແລະ ພ້ອມກັນຈັດຕັ້ງປະຕິບັດ ຕາມແຈ້ງການສະບັບນີ້ ຢ່າງເຂັ້ມງວດ.