ແຮງງານ 4 ຄົນມີເຊື້ອໂຄວິດໄດ້ລົງຢູ່ແຂວງຫຼວງພະບາງ

ສຳລັບແຮງງານລາວ 5 ຄົນ ທີ່ເດີນທາງດ້ວຍລົດສ່ວນຕົວ ມາຈາກເຂດເສດຖະກິດພິເສດແຂວງບໍ່ແກ້ວ ໃນວັນທີ 12 ກໍລະກົດ 2021, ໃນນັ້ນ ມີ 1 ຄົນ ລົງແຂວງອຸດົມໄຊ ເຊິ່ງກວດພົບເຊື້ອວັນທີ 15 ກໍລະກົດ ແລະ ໄດ້ລາຍງານໃນມື້ວານນີ້. ສ່ວນ 4 ຄົນ ແມ່ນໄດ້ລົງຢູ່ແຂວງຫຼວງພະບາງ ແຕ່ບໍ່ຮູ້ວ່າເປັນເພດໃດ ແລະ ຢູ່ບ້ານໃດ.

ທາງຄະນະສະເພາະກິດຈຶ່ງຢາກຮຽກຮ້ອງໃຫ້ຜູ້ຕິດເຊື້ອ 4 ຄົນນັ້ນ ຮີບຮ້ອນໄປສະເໜີຕົວ ຕໍ່ເຈົ້າໜ້າທີ່ກ່ຽວຂ້ອງ ໃນແຂວງ, ເມືອງ ຫຼື ບ້ານທັນທີ ເພື່ອຈະໄດ້ກວດຫາເຊື້ອພະຍາດໂຄວິດ-19 ແລະ ນຳສົ່ງເຂົ້າສູນຈຳກັດບໍລິເວນໂດຍໄວ ເພື່ອບໍ່ໃຫ້ມີການແຜ່ເຊື້ອໃນຊຸມຊົນ, ຖ້າຫາກບໍ່ປະຕິບັດຕາມ ແລະ ກໍ່ໃຫ້ເກີດມີການແຜ່ເຊື້ອ ແມ່ນຈະມີຄວາມຜິດຢ່າງຮ້າຍແຮງ.

ຫາກທ່ານໃດພົບເຫັນກຸ່ມຄົນດັ່ງກ່າວກໍສາມາດແຈ້ງຕໍ່ເຈົ້າໜ້າທີ່ໄດ້ ແລະ ຂໍໃຫ້ທຸກຄົນຈົ່ງມີສະຕິລະມັດລະວັງກັນ ເພາະກຸ່ມຄົນນັ້ນ ອາດຈະຢູ່ໃນຂອບເຂດພາຍໃນແຂວງດັ່ງກ່າວ. ສ່ວນກຸ່ມຄົນ ຫຼື ບຸກຄົນໃດທີ່ລັກລອບເຂົ້າມາແບບບໍ່ໄດ້ຮັບອະນຸຍາດ ຢາກຈະຂໍໃຫ້ຢຸດເຊົາພຶດຕິກຳດັ່ງກ່າວເອົາໄວ້ເສຍກ່ອນ ຖ້າຕິດເຊື້ອຂຶ້ນມາແລ້ວ ຈະສົ່ງຜົນກະທົບອັນໃຫຍ່ຫຼວງຕໍ່ກັບປະເທດຊາດບ້ານເມືອງ.