ເມືອງສາມັກຄີໄຊປ່ອຍປາລົງແມ່ນໍ້າເຊກອງ 33 ພັນກວ່າໂຕ

ວັນທີ 16 ກໍລະກົດ 2021 ເມືອງສາມັກຄີໄຊ ແຂວງອັດຕະປື ໄດ້ຈັດພິທີປ່ອຍປາ ລົງສູ້ແຫຼ່ງນໍ້າທໍາມະຊາດ ແມ່ນໍ້າເຊກອງເຂດສາມຫຼ່ຽມປາກຄອນລູງ,ບ້ານເມືອງໃໝ່ ເມືອງສາມັກຄີໄຊ,ເນື່ອງໃນໂອກາດວັນປ່ອຍປາ ແລະ ອະນຸລັກສັດນໍ້າ-ສັດປ່າ ແຫ່ງຊາດ ຄົບຮອບ 24 ປີຄື: ວັນທີ 13 ກໍລະກົດປີ 1997-13 ກໍລະກົດ ປີ 2021,ໃຫ້ກຽດເຂົ້າຮ່ວມໃນພິທີປ່ອຍປ່າຄັ້ງນີ້ໂດຍມີທ່ານ ເລັດ ໄຊຍະພອນ ເຈົ້າແຂວງອັດຕະປື,

ພ້ອມດ້ວຍການນໍາຂອງແຂວງ,ເມືອງ,ພະນັກງານ-ລັດຖະກອນອ້ອມຂ້າງເມືອງ,ຕະຫຼອດຮອດອໍານາດການປົກຄອງບ້ານ ແລະ ພໍ່ແມ່ປະຊາຊົນ ເຂົ້າຮ່ວມ. ທ່ານ ພິທູນ ມະວົງສາ ຮອງເຈົ້າເມືອງ ສາມັກຄີໄຊ ໄດ້ກ່າວມີຄໍາເຫັນໃນພິທີວ່າ: ບໍ່ວ່າຍາມໃດ ພັກ ແລະ ລັດຖະບານ ກໍຄືຄະນະພັກ,ອົງການປົກຄອງແຂວງ ແລະ ເມືອງສາມັກຄີໄຊ ໄດ້ຖືເອົາວຽກງານກະສິກໍາ ແລະ ປ່າໄມ້ ກໍ່ຄືການອະນຸລັກສັດນໍ້າ-ສັດປ່າ ເປັນເປົ້າໝາຍຕົ້ນຕໍ ເພື່ອເຮັດໃຫ້ສັດນໍ້າ-ສັດປ່າມີຄວາມຍືນຍົງ

ແລະ ໃນກົດໝາຍ ວ່າດ້ວຍການປະມົງ ມາດຕາ 69 ຍັງໄດ້ກໍານົດເອົາວັນທີ 13 ກໍລະກົດ ຂອງທຸກໆປີ ເປັນວັນປ່ອຍປາແຫ່ງຊາດ ເພື່ອອະນຸລັກ,ປົກປັກຮັກສາ ແລະ ພັດທະນາສັດນໍ້າໃຫ້ມີຄວາມອຸດົມສົມບູນ,ນອກນັ້ນ ການປ່ອຍປາຍັງເປັນການຄືນຈໍານວນປະຊາກອນປາ ແລະ ຊະນິດພັນສັດນໍ້າ ໃຫ້ກັບມາມີຈໍານວນເພີ່ມຂຶ້ນໃນທໍາມະຊາດອີກດ້ວຍ.

ໃນທຸກໆປີຜ່ານມາ ທາງພະແນກກະສິກໍາ ແລະ ປ່າໄມ້ແຂວງ ຫ້ອງການກະສິກໍາ ແລະ ປ່າໄມ້ເມືອງສາມັກຄີໄຊ ໄດ້ສົມທົບກັບຂະແໜງການກ່ຽວຂ້ອງ ພ້ອມກັນວາງແຜນການຄຸ້ມຄອງຊັບພະຍາກອນສັດນໍ້າແບບຍືນຍົງ ໂດຍຜ່ານການສ້າງຕັ້ງຄະນະກໍາມະການຄຸ້ມຄອງການປະມົງປະຈໍາພື້ນທີ່ແຫຼ່ງນໍ້າຕ່າງໆໃນທົ່ວແຂວງ

ເພື່ອເຮັດໃຫ້ການອະນຸລັດສັດນໍ້າ ມີຄວາມຖືກຕ້ອງສອດຄ່ອງກັບລະບຽບການ ຂອງການຄຸ້ມຄອງການປະມົງທີ່ຂັ້ນເທິງວາງອອກ . ສໍາລັບປາທີ່ນໍາມາປ່ອຍໃນຄັ້ງນີ້ ມີປານິນ,ປາໃນ,ປາປາກ ແລະ ປາເຂັງ ລວມທັງໜົດ 33 ພັນກວ່າໂຕ ,ເຊິ່ງປ່ອຍລົງແຫຼ່ງນໍ້າທໍາມະຊາດແມ່ນ້ຳເຊກອງ ຢູ່ຈຸດສາມຫຼ່ຽມປາກຄອນລູງ ຈຸດເຊື່ອມຈອດລະຫວ່າງແມ່ນ້ຳເຊກອງ ແລະ ນໍ້າເຊກະໜານ.