ລັດຖະມົນຕີຢ້ຽມຢາມຕະຫຼາດ 3 ແຫ່ງໃນນະຄອນຫຼວງວຽງຈັນ

15 ກໍລະກົດ 2021 ນີ້ ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ພ້ອມຄະນະ ໄດ້ລົງຢ້ຽມຢາມຕະຫຼາດໜອງຈັນ (ຂົວດິນ), ຕະຫຼາດບຶງທາດຫຼວງ ແລະ ຕະຫຼາດ ມ.ຊ (ເຂດດົງໂດກ) ຊຶ່ງມີພາກສ່ວນທີ່ກ່ຽວຂ້ອງໃຫ້ການຕ້ອນຮັບ. ການລົງຢ້ຽມຢາມໃນຄັ້ງນີ້ກໍ່ເພື່ອຕິດຕາມຊຸກຍູ້ ການຈັດຕັ້ງປະຕິບັດວຽກງານຄຸ້ມຄອງຕະຫຼາດ, ວຽກງານຄຸ້ມຄອງສິນຄ້າ, ລາຄາ ແລະ ຄ່າບໍລິການ, ການປົກປ້ອງຜູ້ຊົມໃຊ້, ການຈັດສັນຄວາມສະອາດ, ສະດວກປອດໄພພາຍໃນຕະຫຼາດ ກໍຄືຄວາມພ້ອມ ແລະ ການປະຕິບັດບັນດາມາດຕະການປ້ອງກັນ

ແລະສະກັດກັ້ນການແຜ່ລະບາດຂອງພະຍາດໂຄວິດ-19 ພ້ອມທັງຮັບຟັງ ຂໍ້ສະດວກ ແລະຂໍ້ຫຍຸ້ງຍາກຂອງຫົວໜ່ວຍທຸລະກິດ, ຕົວແທນຊາວຄ້າຂາຍ ແລະ ຄະນະຈັດສັນຕະຫຼາດໃນແຕ່ລະແຫ່ງ. ໃນໂອກາດນີ້, ທ່ານ ຄຳແພງ ໄຊສົມແພງ ກໍໄດ້ແນະນຳໃຫ້ຜູ້ປະກອບການ (ເຈົ້າຂອງຕະຫຼາດ) ຈັດຕັ້ງປະຕິບັດໃຫ້ໄດ້ຕາມເນື້ອໃນຂອງກົດໝາຍ ແລະລະບຽບການທີ່ວາງອອກ ໂດຍສະເພາະວຽກງານຄຸ້ມຄອງສິນຄ້າ ແລະຄ່າບໍລິການ, ການຈັດສັນຕະຫຼາດ ແລະປັບປຸງຕະຫຼາດ ໃຫ້ ຖື ກ ຕ້ອງຕາມລະບຽບການທີ່ກໍານົດໄວ້ ແລະ ໄດ້ເນັ້ນໜັກໃຫ້ພ້ອມກັນເອົາໃຈໃສ່ປະຕິບັດມາດຕະການປ້ອງກັນ ແລະຄວບຄຸມ ການລະບາດຂອງພະຍາດ COVID-19 ຢ່າງເຂັ້ມງວດ.