ປະຊຸມສະຫຼຸບວຽກງານກວດກາ 5 ປີທີ່ກົມກວດກາສານປະຊາຊົນສູງສຸດ

ກົມກວດກາ ສານປະຊາຊົນສູງສຸດ ໄດ້ຈັດກອງປະຊຸມສະຫຼຸບວຽກງານກວດກາ 5 ປີ (2016-2020) ແລະ ທິດທາງແຜນການປີ 2021 ຂຶ້ນໃນວັນທີ 16 ມິຖຸນານີ້ ທີ່ ສປສສ, ພາຍໃຕ້ການເປັນປະທານຂອງທ່ານ ພົມມາ ສຸວັນນະພອນ ຮອງປະທານກວດກາພັກ ຫົວໜ້າກົມກວດກາ ສານປະຊາຊົນສູງສຸດ

ແລະ ໃຫ້ກຽດເຂົ້າຮ່ວມໂອ້ລົມຂອງທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ເລຂາຄະນະບໍລິຫານງານພັກ ປະທານສານປະຊາຊົນສູງສຸດ ພ້ອມດ້ວຍພະນັກງານຂອງກົມເຂົ້າຮ່ວມ. ທ່ານ ພົມມາ ສຸວັນນະພອນ ໄດ້ຜ່ານບົດສະຫຼຸບການເຄື່ອນໄຫວວຽກງານກວດກາ 5 ປີ; ປະຈຳປີ 2020 ແລະ ທິດທາງແຜນການ ປີ 2021 ວ່າ:

ຕະຫຼອດໄລຍະ 5 ປີຜ່ານມາ ແມ່ນມີຜົນສໍາເລັດໃນລະດັບດີສົມຄວນ ເປັນຕົ້ນແມ່ນການນຳພາສຶກສາອົບຮົມ-ການເມືອງແນວຄິດໃຫ້ສະມາຊິກພັກ, ພະນັກງານ-ລັດຖະກອນ ທີ່ຢູ່ໃນການຄຸ້ມຄອງຂອງຄະນະພັກ ສານປະຊາຊົນສູງສຸດ ແມ່ນມີຄວາມອຸ່ນອ່ຽງ, ທຸ່ນທ່ຽງເຊື່ອໜັ້ນຕໍ່ການນໍາພາຂອງພັກ, ຍົກສູງຄວາຮັບຜິດຊອບຕໍ່ໜ້າທີ່ວຽກງານ,

ຮັກສາຄວາມສາມັກຄີພາຍໃນຢ່າງແໜ້ນແຟ້ນ ທ່ານ ນາງ ວຽງທອງ ສີພັນດອນ ໄດ້ໃຫ້ກຽດໂອລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ຕະຫຼອດໄລຍະ 5 ປີ ຜ່ານມາ ແລະ ຕ້ອງໄດ້ເອົາໃຈໃສ່ຕື່ມບາງໜ້າວຽກດັ່ງນີ້: ຄະນະກວດກາ ແລະ ກົມກວດກາ ຕ້ອງເພີ່ມທະວີຄວາມຮັບຜິດຊອບຂອງຕົນ ຕໍ່ກັບການຄົ້ນຄວ້າແກ້ໄຂ ຄໍາຮ້ອງ-ຄໍາສະເໜີຂອງພົນລະເມືອງ; ອັນນີ້ເປັນວຽກໜຶ່ງທີ່ພວກເຮົາບໍ່ຄວນຖືເບົາ.

ການຄົ້ນຄວ້າແກ້ໄຂຄໍາຮ້ອງ-ຄໍາສະເໜີ ຂອງພົນລະເມືອງຕ້ອງດໍາເນີນໄປຕາມພາລະບົດບາດ ແລະ ຖືກຕ້ອງຕາມກົດໝາຍ, ພາວະວິໄສ, ຮອບຄອບ, ຊັດເຈນ ແລະ ຍຸຕິທໍາ; ຄະນະກວດກາ, ກົມກວດກາ ຂອງສານປະຊາຊົນສູງສຸດ ແລະ ຂະແໜງກວດກາຂອງສານປະຊາຊົນທ້ອງຖິ່ນ ຕ້ອງເອົາໃຈໃສ່ປັບປຸງພາລະບົດບາດ, ສິດ ແລະ ໜ້າທີ່ຂອງຕົນໃຫ້ຈະແຈ້ງ,

ຮັດກຸມຖືກຕ້ອງ ຕາມກົດລະບຽບຂອງພັກ ແລະ ກົດໝາຍ ວ່າດ້ວຍການກວດກາລັດສະບັບປັບປຸງ; ເພື່ອເຮັດບົດບາດເປັນເສນາທິການ ຊ່ວຍຄະນະພັກ-ຄະນະນໍາຂັ້ນຂອງຕົນ ແລະ ສະເໜີໃຫ້ກົມກວດກາຂອງສານປະຊາຊົນສູງສຸດ ລົງໄປຊຸກຍູ້ຄະນະພັກ-ຄະນະນໍາສານປະຊາຊົນພາກ ແລະ ສານປະຊາຊົນບັນດາແຂວງ-ນະຄອນຫຼວງວຽງຈັນ ຮັບຮູ້ເຂົ້າໃຈ, ເຂົ້າຮ່ວມ ແລະ ເປັນເຈົ້າການຊີ້ນໍາ-ນໍາພາວຽກງານກວດກາ ທີ່ຢູ່ໃນຄວາມຮັບຜິດຊອບຂອງຕົນຢ່າງຕັ້ງໜ້າ.

ໃນວັນດຽວກັນທ່ານ ຄຳພັນ ບຸນພາຄົມ ຄະນະບໍລິຫານງານພັກ ຮອງປະທານສານປະຊາຊົນສູງສຸດ ຜູ້ຊີ້ນຳກົມກວດກາ ພ້ອມດ້ວຍພະນັກງານຂອງກົມ ກໍໄດ້ປາຖະກະຖາມູນເຊື້ອວັນສ້າງຕັ້ງອົງການກວດກາພັກ-ລັດ ຄົບຮອບ 39 ປີ (16/2/1982-16/2/2021) ເພື່ອໃຫ້ພະນັກງານຮັບຮູ້ກຳໄດ້ເນື້ອໃນຂອງວັນສຳຄັນດັ່ງກ່າວ.