ນັກວິໄຈຮົງກົງເຜີຍວັກຊີນໄຟເຊີສ້າງແອນຕິບໍດີສູງກວ່າຊິໂນແວກ 10 ເທົ່າ

ສຳນັກຂ່າວຕ່າງປະເທດລາຍງານເມື່ອວັນທີ 17 ກໍລະກົດ 2021 ວ່າ ວັກຊີນປ້ອງກັນພະຍາດໂຄວິດ-19 ແບບ mRNA ທີ່ບໍລິສັດໄຟເຊີ ອິງ ພັດທະນາຮ່ວມກັບໄບອອນເທັກ ເອດອີ ສົ່ງຜົນໃຫ້ຮ່າງກາຍສ້າງແອນຕິບໍດີຕໍ່ຕ້ານໄວຣັດໂຄໂຣນາສາຍພັນໃໝ່ 2019 (Sar-COV-2) ສູງກວ່າວັກຊິນແບບເຊື້ອຕາຍຂອງຊິໂນແວກເຖິງ 10 ເທົ່າ. ຜົນການສຶກສານີ້ ມີການເຜີຍແຜ່ໃນວາລະສານວິທະຍາສາດແລນຊິດ ເມື່ອວັນທີ 15 ກໍລະກົດ 2021 ຊຶ່ງກຸ່ມຕົວຢ່າງຂອງການສຶກສາຊຸດນີ້ ຄືພະນັກງານດ້ານສາທາລະນະສຸກຂອງຮົງກົງ. ກຸ່ມນັກວິໄຈທີ່ທຳການສຶກສານີ້ ລະບຸວ່າ ເຖິງວ່າແອນຕິບໍດີທີ່ຕໍ່ສູ້ກັບພະຍາດນັ້ນບໍ່ແມ່ນທັງໝົດ ທີ່ຈະວັດເຖິງປະສິດທິພາບ ຫຼື ຄວາມສາມາດໃນການສ້າງພູມຄຸ້ມກັນຕໍ່ພະຍາດໂຄວິດ-19 ຂອງວັກຊີນ ແຕ່ຄວາມແຕກຕ່າງແມ່ນການສ້າງແອນຕິບໍດີກໍພໍຈະຢືນຢັນໄດ້ຂ້ອນຂ້າງຫຼາຍວ່າວັກຊີນມີປະສິດທິພາບພຽງໃດ.

ການສຶກສານີ້ ຍັງຕອກຢໍ້າຫຼັກຖານອື່ນໆວ່າວັກຊີນແບບ mRNA ໃຫ້ການປ້ອງກັນໄວຣັດໂຄໂຣນາສາຍພັນໃໝ່ 2019 ໄດ້ປະສິດທິພາບ ແລະ ຄວບຄຸມຕໍ່ໄວຣັດແບບກາຍພັນຊະນິດຕ່າງກັນຫຼາຍກວ່າ ເມື່ອທຽບກັບວັກຊິນທີ່ຜະລິດດ້ວຍວິທີດັ້ງເດີມ ເຊັ່ນ: ການໃຊ້ເຊື້ອຕາຍ. ຫຼາຍປະເທດ ບໍ່ວ່າຈະເປັນ ອິດສະຣາແອນ ແລະ ສະຫະລັດອາເມຣິກາ ທີ່ເພິ່ງພາວັກຊີນຊະນິດ mRNA ກໍພົບວ່າຈຳນວນຜູ້ຕິດເຊື້ອຫຼຸດລົງຢ່າງວ່ອງໄວ ຂະນະດຽວກັນ ປະເທດທີ່ໃຊ້ວັກຊີນແບບເຊື້ອຕາຍຈາກຊິໂນແວກ, ໄບໂອເທັກ ແລະ ຊິໂນຟາມ ກຣຸບ ກັບຄວບຄຸມຕົວເລກຜູ້ຕິດເຊື້ອລາຍໃໝ່ໄດ້ຍາກກວ່າ ເຖິງແມ່ນວ່າ ວັກຊີນຈາກ ສປ ຈີນ ທັງ 2 ຍີ່ຫໍ້ນີ້ ປ້ອງກັນການເຈັບຂັ້ນຮຸນແຮງໄດ້. ການສຶກສາໃນຮົງກົງຊິ້ນນີ້ ລະບຸອີກວ່າ ການສຶກສາຊຸດຕໍ່ໆໄປໃນອະນາຄົດ ອາດລວມເຖິງການສຶກສາວ່າ ວັກຊີນເຂັມທີ 3 ຈະຊ່ວຍແອນຕິບໍດີ ແລະ ການປ້ອງກັນພະຍາດໃຫ້ກັບກຸ່ມຜູ້ທີ່ໄດ້ຮັບວັກຊີນເຊື້ອຕາຍໄປແລ້ວ ຫຼື ບໍ່.