ຜູ້ໂພສຂ່າວປອມວ່າເກີດເຫດຍົນຕົກນັ້ນອອກມາຂໍໂທດແລ້ວ

ຈາກຜູ້ໃຊ້ເຟສບຸກຄົນໜື່ງ ເຊີ່ງເປັນຜູ້ໂພສຂ່າວປອມວ່າ ເກີດເຫດຍົນຕົກນັ້ນ ແຕ່ເຫດການດັ່ງກ່າວ ບໍ່ແມ່ນຄວາມຈີງແຕ່ຢ່າງໃດ ແລະຜູ້ກ່ຽວໄດ້ອອກມາໂພສເພື່ອຂໍໂທດວ່າ “ຝາກເຖີງການບິນລາວ ທີ່ຂ້າພະເຈົ້າຮູ້ເທົ່າບໍ່ເຖີງການອາຍຸຍັງນ້ອຍທີ່ເວົ້າໄປວ່າຍົກຕົກໂດຍບໍ່ມີຂໍ້ມູນຄວາມຈີງ.

ໃນວັນທີ 17/5/2021. ຂ້າພະເຈົ້າໃດ້ເວົ້າວ່າຍົກຕົກຢູ່ ເມືອງຊຽງເງີນ ແຂວງຫລວງພະບາງ ແຕ່ຍົກທີ່ຕົກຮັ້ນບໍ່ຮູ້ວ່າຍົກມາແຕ່ໃສ ເປັນຍົນປະເທດໃດ ຍັງບໍ່ທັນເອີ່ນເຖີງຊື່ ຍົນການບິນລາວຈັກຄວາມ. ສະນັ້ນຈຶ່ງຝາກມາຮອດເຈົ້າຫນ້າທີ່ ກະຊ່ວງໂຢທາ ຕະຫລອດຮອດພໍ່ແມ່ປະຊາຊົນ.

ທີ່ໄດ້ເວົ້າແບບນັ້ນ. ຕໍ່ໄປຊິປະຕິຍານຕົນວ່າຊິບໍ່ເຮັດແບບນີ້ອີກ ໃນເລື່ອງທີ່ບໍ່ມີຄວາມຈີງ. ຜ່ານມາກະອັບເດດແຕ່ຂ່າວ ທີ່ມີຂໍ້ມູນດີໆໃຫ້ກັບສັງຄົມ. ອັດເດດຂ່າວສານຕ່າງໆໃຫ້ສັງຄົມຮັບຮູ້. ຂ້າພະເຈົ້າບໍ່ຄິດວ່າ ຊິເປັນປັນຫາໃຫ້ກັບການບີນລາວປານນີ້ ຂະພະເຈົ້າຂໍໂທດຂໍອະໄພຫລາຍໆ.”

ຂ່າວກ່ອນໜ້ານີ້ ແຈ້ງການ ເຖິງ: ບຸກຄົນ, ນິຕິບຸກຄົນ, ອົງການຈັດຕັ້ງ ລັດ-ເອກະຊົນ, ພະນັກງານ, ທະຫານ, ຕຳຫຼວດ ພໍ່ແມ່ ປະຊາຊົນ ທຸກພາກສ່ວນທີ່ກ່ຽວຂ້ອງ. ເລື່ອງ: ຂ່າວສານຂໍ້ມູນຢູ່ທາງສັງຄົມອອນລາຍ (TikTok) ກ່ຽວກັບເຮືອບິນຕົກຢູ່ ເມືອງຊຽງເງີນ ແຂວງຫຼວງພະບາງ ໃນວັນທີ 17 ພຶດສະພາ 2021.

– ອີງຕາມ ຂໍ້ຕົກລົງຂອງລັດຖະມົນຕີກະຊວງໂຍທາທິການ ແລະ ຂົນສົ່ງ ສະບັບເລກທີ 18999/ຍຂທ, ລົງວັນທີ 8 ສິງຫາ 2019 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມການບິນພົນລະເຮືອນ.
– ອີງຕາມ ການອອກຂ່າວຂອງບຸກຄົນ ທີ່ຢູ່ທາງສັງຄົມອອນລາຍ(TikTok @maisee4433) ກ່ຽວກັບ
ເຮືອບິນຕົກຢູ່ເມືອງຊຽງເງີນ ແຂວງຫຼວງພະບາງ ໃນວັນທີ17ພຶດສະພາ2021.
– ອີງຕາມໜັງສືລາຍງານຈາກກອງຈະລາຈອນທາງອາກາດລາວ ສະບັບເລກທີ0904/ກຈລ, ລົງວັນທີ18
ພຶດສະພາ 2021.

ກົມການບິນພົນລະເຮືອນ ຂໍຖືເປັນກຽດແຈ້ງມາຍັງບັນດາຊາບວ່າ: ໃນວັນທີ 17 ພຶດສະພາ 2021 ບຸກຄົນ ໂດຍໃສ່ຊື່ວ່າ emaisce4433 ນຳສະເໜີຂ່າວຜ່ານທາງສັງຄົມອອນລາຍ(TikTok) ກ່ຽວກັບເຮືອບິນຕົກຢູ່ເຂດ ເມືອງຊຽງເງີນ ແຂວງຫຼວງພະບາງ. ຕໍ່ກັບບັນຫາດັ່ງກ່າວ, ກົມການບິນພົນລະເຮືອນ ໃນນາມຄຸ້ມຄອງມະຫາພາກດ້ານວຽກງານການບິນພົນລະເຮືອນ ໄດ້ປະສານສົມທົບກັບກອງຈະລາຈອນທາງອາກາດລາວ ກວດກາຄືນແລ້ວເຫັນວ່າ ສະພາບຂອງຖ້ຽວບິນ ຂຶ້ນ-ລົງ ສະໝາມບິນທົ່ວປະເທດ ແລະ ຖ້ຽວບິນຜ່ານ ສປປ ລາວ ໃນມື້ນັ້ນແມ່ນປະຕິບັດການບິນຄວາມປອດໄພ ແລະ ບໍ່ມີການລາຍງານ ຫຼື ແຈ້ງເຕືອນ ກ່ຽວກັບສະພາບການສຸກເສີນໃດໆ ໃນເຂດນ່ານຟ້າຂອງ ສປປ ລາວ.

ສະນັ້ນ, ກົມການບິນພົນລະເຮືອນ ຂໍຢັ້ງຢືນ ແລະ ແຈ້ງໃຫ້ຊາບວ່າ: ການໃຫ້ຂ່າວຂອງບຸກຄົນດັ່ງກ່າວ(@maisee4433) ໃນຄັ້ງວັນທີ 17 ພຶດສະພາ 2021ແມ່ນບໍ່ມີມູນຄວາມຈິງ (ຂ່າວປອມ) ເປັນການບິດເບືອນແລະ ສ້າງຄວາມປັ່ນປ່ວນໃນສັງຄົມ ເພື່ອຫວັງມ້າງເພທໍາລາຍລະບົບຄຸ້ມຄອງວຽກງານການບິນພົນລະເຮືອນ. ພ້ອມນີ້ ກົມການບິນພົນລະເຮືອນ ໄດ້ປະສານກັບພາກສ່ວນທີ່ກ່ຽວຂ້ອງ ເພື່ອຈັດຕັ້ງປະຕິບັດຕາມພາລະບົດບາດ ແລະລະບຽບກົດໝາຍ ຢ່າງເຂັ້ມງວດ. ດັ່ງນັ້ນ, ຈຶ່ງແຈ້ງມາຍັງທຸກພາກສ່ວນຈົ່ງໄດ້ຮັບຮູ້ ແລະ ເຂົ້າໃຈຕາມເນື້ອໃນຈິດໃຈຂອງແຈ້ງການສະບັບນີ້ດ້ວຍ.ກົມການບິນພົນລະເຮືອນ,ສະໜາມບິນສາກົນວັດໄຕ,ນະຄອນຫຼວງວຽງຈັນ