ປະຊາຊົນບ້ານໜອງໄຮຮ່ອມ 31 ໄດ້ຮັບຜົນກະທົບຈາກນໍ້າເໝັນນໍ້າເສຍຂອງໂຮງງານນົມສົ້ມ

ໃນໄລຍະການລະບາດຂອງພະຍາດໂຄວິດ-19 ນີ້, ປະຊາຊົນສ່ວນຫລາຍແມ່ນຢູ່ບ້ານ ເພື່ອປ້ອງກັນການຕິດເຊື້ອ ແລະ ປ້ອງກັນການລະບາດຂອງພະຍາດໂຄວິດ-19 ແຕ່ກໍມີບັນຫາໜຶ່ງທີ່ເກີດຂຶ້ນ ນັ້ນກໍຄື ປະຊາຊົນບ້ານໜອງໄຮ ຮ່ອມ 31 ເມືອງຫາຍຊາຍຟອງ ນະຄອນຫລວງວຽງຈັນ ໄດ້ຮັບຜົນກະທົບຈາກນໍ້າເໝັນ ນໍ້າເສຍ ຂອງໂຮງງານນົມສົ້ມ 3 ດາວ, ໂຮງງານນໍ້າດື່ມໂດ່ງດັງ ແລະ ບວກໃສ່ກັບນໍ້າເສຍທີ່ມາຈາກຄົວເຮືອນຂອງປະຊາ ຊົນ ເຮັດໃຫ້ນໍ້າລົ້ນອອກມາຫົນທາງ ແລະ ສົ່ງກິນເໝັນແຮງໄປທົ່ວ ໂດຍມີປະຊາຊົນ 10 ກວ່າຫລັງຄາເຮືອນທີ່ໄດ້ຮັບຜົນກະທົບໜັກ, ບາງຄອບຄົວມີທັງເດັກນ້ອຍ ແລະ ຜູ້ເຖົ້າ ເຊິ່ງບັນຫານີ້ໄດ້ມີຜົນປະທົບຕໍ່ສຸຂະພາບ ຂອງປະຊາຊົນໃນຮ່ອມບ້ານດັ່ງກ່າວ.

ທ່ານ ດາວວັນ ມູນລາດ ປະຊາຊົນຜູ້ທີ່ໄດ້ຮັບຜົນກະທົບ ໄດ້ໃຫ້ສຳຕໍ່ນັກຂ່າວ ສຳ ນັກຂ່າວສານປະເທດລາວວ່າ: ບັນຫານຳເໝັນ ນ້ຳເສຍນີ້ ຄອບຄົວຂອງຂ້າພະເຈົ້າໄດ້ຮັບຜົນກະທົບມາເປັນເວລາຫລາຍເດືອນແລ້ວ, ເຊິ່ງຕາມປົກກະຕິພວກເຮົາເຮັດວຽກຫັດຖະກຳ ຕີເງິນ-ຕີຄຳ ຢູ່ໜ້າບ້ານ ກໍບໍ່ສາມາດເຮັດໄດ້ ຈົນໄດ້ເອົາຜ້າມາກັ້ງໄວ້ ເພື່ອເວລາລົມພັດມາຈະຊ່ວຍຫລຸດກິ່ນເໝັ້ນນັ້ນໄດ້ ແຕ່ປານນັ້ນກໍຍັງເໝັ້ນແຮງກວ່າເກົ່າ, ນອກຈາກນີ້ຜົນກະທົບນ້ຳເໝັນແຮງເຮັດໃຫ້ກິນເຂົ້າກໍບໍ່ແຊບ. ທ່ານ ຄຳພັນ ອ້ວນລາສີ ໄດ້ໃຫ້ສຳພາດວ່າ: ນ້ຳເໝັນນີ້ ລົ້ນອອກຈາກທໍ່ ຈົນເຮັດໃຫ້ນ້ຳຂັງ ແລະ ມີກິ່ນເໝັນແຮງຢູ່ ໜ້າບ້ານຂອງຂ້າພະເຈົ້າໂດຍກົງ, ນ້ຳຈະເໝັນແຮງທີ່ສຸດແມ່ນເວລາທີ່ອາກາດຮ້ອນແຮງ, ມີແດດຫລາຍ, ມີລົມພັດ ແລະ ເວລາມີລົດທຽວໄປ-ມາແຮ່ງເຮັດໃຫ້ນ້ຳເໝັ້ນແຮງ ເຊິ່ງສົ່ງຜົນກະທົບຕໍ່ສຸຂະພາບຫລາຍ ເຮັດໃຫ້ກິນເຂົ້າບໍ່ແຊບ, ເວລາອອກມານອກເຮືອນ ຫລື ຢູ່ໜ້າບ້ານ ກໍຕ້ອງໄດ້ໃສ່ຜ້າອັດປາກ-ດັງ ຕະຫລອດເວລາ ແຕ່ປານນັ້ນຄວາມເໝັນກໍບໍ່ໄດ້ຫລຸດລົງເລີຍ, ບາງຄັ້ງເໝັນແຮງຈົນມີອາການເຈັບຫົວກໍ່ມີ. ທ່ານ ນາງ ມະໄລທອງ ແສນມະນີ ປະຊາຊົນຜູ້ໄດ້ຮັບຜົນກະທົບ ກໍໄດ້ໃຫ້ສຳພາດວ່າ:

ໃນໄລຍະນີ້ ເປັນໄລຍະການລະບາດຂອງພະຍາດໂຄວິດ-19 ຂ້າພະເຈົ້າເອງບໍ່ໄດ້ໄປວຽກເປັນປົກກະຕິ ສ່ວນຫລາຍແມ່ນເຮັດວຽກຢູ່ເຮືອນ ເຊິ່ງການເຮັດວຽກຢູ່ເຮືອນກໍມີຄວາມຫຍຸ້ງຍາກຫລາຍ ເນື່ອງຈາກຄວາມເໝັນຂອງນ້ຳເສຍ ເຮັດໃຫ້ບໍ່ມີສະມາທິໃນການເຮັດວຽກ ຈຶ່ງຕ້ອງໄດ້ອັດປະຕູ-ປ່ອງຢ້ຽມໄວຕະຫລອດເວລາ ເພາະຖ້າໄຂປະຕູ ກໍຈະໄດ້ກິ່ນເໝັນຂອງນ້ຳເສຍດັ່ງກ່າວ. ຕໍ່ບັນຫາດັ່ງກ່າວ, ອຳນາດການປົກຄອງຂັ້ນບ້ານໜອງໄຮ ກໍຄື ທ່ານ ສອນເພັດ ແກ້ວປະດິດ ເລຂາພັກບ້ານ, ນາຍບ້ານບ້ານໜອງໄຮ ກໍບໍ່ໄດ້ນີ້ງນອນ ແລະ ເຫັນໄດ້ຄວາມເດືອດຮ້ອນຂອງປະຊາຊົນ ແລະ ຄວາມເປັນຫ່ວງເປັນໃຍຕໍ່ສຸຂະພາບຂອງປະຊົນ ກໍໄດ້ແຈ້ງເຊີນພາກສ່ວນກ່ຽວຂ້ອງມາປຶກສາຫາລື ແລະ ຮ່ວມກັນແກ້ໄຂບັນຫາດັ່ງກ່າວ ເຊິ່ງທ່ານນາຍບ້ານບ້ານໜອງໄຮ ໄດ້ໃຫ້ສຳພາດວ່າ: ບັນຫາເລື່ອງນໍ້າເສຍ ແມ່ນມີຜົນກະທົບມາແຕ່ດົນມາແລ້ວ ເຊິ່ງຜ່ານມາທາງບ້ານກໍໄດ້ມີການລະດົມທຶນກັບນັກທຸລະກິດ, ຜູ້ປະ ກອບການທຸລະກິດ ໂດຍມີໂຮງງານນົມສົ້ມ 3 ດາວ, ໂຮງງານນ້ຳດື່ມໂດ່ງດັງ (ຮ້ານອາຫານໂດ່ງດັງ) ແລະ ຮ້ານປີ້ງຫູໝູກຸ້ງຕາວັນ ໄດ້ຊື້ທໍ່ມາໃສ່ ເຊິ່ງສາມາດແກ້ບັນຫາໄດ້ໃນລະດັບໜຶ່ງ.

ຕໍ່ມາທໍ່ເກີດມີການອັດຕັນ ທາງບ້ານກໍໄດ້ສະເໜີໃຫ້ ຜູ້ປະກອບການທຸລະກິດ 3 ພາກສ່ວນລົງມາແກ້. ໃນປີ 2020 ຜ່ານມາ ອຳນາດການປົກຄອງບ້ານ ກໍໄດ້ເຮັດໜັງສືແຈ້ງເຊີນພາກສ່ວນດັ່ງກ່າວມາປຶກສາຫາລື ແລະ ຮ່ວມກັນແກ້ໄຂບັນຫາ ໄລຍະນັ້ນ, ຮ້ານໂດ່ງດັງ ໄດ້ມີການຂັດຂ້ອງໂດຍໃຫ້ເຫດຜົນວ່າ ເປັນຊ່ວງກັກກັນໂຄວິດ-19 ແຕ່ມາຮອດປັດຈຸບັນ 2 ພາກສ່ວນຄື: ໂຮງງານນົມສົ້ມ 3 ດາວ ແລະ ໂຮງງານນ້ຳດື່ມໂດ່ງດັງ (ຮ້ານອາຫານໂດ່ງດັງ) ໄດ້ລົງມາແກ້ໄຂບັນຫາເບື້ອງຕົ້ນກ່ອນ ໂດຍການຮື້ທໍ່, ອະນາໄມສິ່ງທີ່ອັດຕັນ. ພ້ອມນີ້, ອຳນາດການປົກຄອງບ້ານ ກໍໄດ້ມີການປະສານກັບໜ່ວຍງານສິ່ງແວດລ້ອມຂັ້ນບ້ານ ລົງໄປຕິດຕາມເບິ່ງວ່າ ຄວນຈະປັບປຸງ ແລະ ແກ້ໄຂໃນໄລຍາວດ້ວຍວິທີໃດ ເຊິ່ງໃນຕໍ່ໜ້າທາງບ້ານ ສົມທົບກັບຜູ້ປະກອບການທຸລະກິດ ແລະ ປະຊາຊາຊົນ ພາຍໃນບ້ານ ອາດຈະເຮັດເປັນຮ່ອງລະບາຍທີ່ໄດ້ຮັບມາດຕະຖານກວ່າເກົ່າ.