ເມືອງໄຊບູລີຮັບປະກັນວ່າຈະບໍ່ມີແຮງງານລາວລັກລອບເຂົ້າມາໄດ້

ເມືອງໄຊບູລີເປັນເມືອງໜຶ່ງໃນ 3 ເມືອງ ແລະ ໜຶ່ງນະຄອນຢູ່ແຂວງສະຫວັນນະເຂດທີ່ມີຊາຍແດນຕິດກັບປະເທດໄທໂດຍມີແມ່ນໍ້າຂອງເປັນເຂດກັ້ນຊາຍແດນ ຊຶ່ງພາຍໃນເມືອງໄຊບູລີ ມີ 8 ບ້ານລຽບຕາມຊາຍແດນໂດຍມີຄວາມຍາວ 20 ກວ່າກິໂລແມັດ. ສະເພາະການເວນຍາມເພື່ອປ້ອງກັນແຮງງານລາວລັກລອບມາແຕ່ໄທ ໄດ້ມີການເວນຍາມຕະຫຼອດ 24 ຊົ່ວໂມງ ໂດຍເຈົ້າເມືອງໄຊບູລີຢືນຢັນວ່າ ຮັບປະກັນໄດ້ 100% ວ່າຈະບໍ່ມີແຮງງານລາວທີ່ລັກລອບເຂົ້າມາໄດ້.

ທ່ານ ອ່ອນລໍາພັນ ບົວສີແກ້ວ ເລຂາພັກເມືອງ ເຈົ້າເມືອງ ໄຊບູລີ ໄດ້ລາຍງານເມື່ອວັນທີ 20 ກໍລະກົດ 2021 ກ່ຽວກັບການປ້ອງກັນຕາມຊາຍແດນວ່າ: ການປ້ອງກັນການລັກລອບເຂົ້າມາຂອງແຮງງານດັ່ງກ່າວພາຍໃນເມືອງໄຊບູລີ ແມ່ນ ມີ 8 ຈຸດ ຫຼື 8 ບ້ານທີ່ຕັ້ງລຽບແຄມແມ່ນໍ້າຂອງໂດຍມີກໍາລັງເຈົ້າໜ້າທີ່ທະຫານ, ກຸ່ມປກຊ ໂດຍສົມທົບກັບກຸ່ມປກສ-ປກຊ ຂອງແຕ່ລະບ້ານເພື່ອເວນຍາມຕະຫຼອດ 24 ຊົ່ວໂມງ ຊຶ່ງໄດ້ເລີ່ມມາແຕ່ເດືອນເມສາ 2021 ຮອດປັດຈຸບັນຍັງບໍ່ມີແຮງງານລາວລັກລອບເຂົ້າມາພາຍໃນເມືອງ ແລະ ສາມາດເວົ້າໄດ້ວ່າຮັບປະກັນໄດ້ 100% ຈະບໍ່ມີແຮງງານລາວທີ່ລັກລອບເຂົ້າມາຈະເລັດລອດສາຍຕາຂອງເຈົ້າໜ້າທີ່ໄດ້.

ທ່ານ ອ່ອນລໍາພັນລາຍງານໃຫ້ຮູ້ຕື່ມອີກວ່າ: ນອກຈາກການເວນຍາມຕະຫຼອດ 24 ຊົ່ວໂມງແລ້ວ, ສະເພາະເຮືອຫາປາ, ເຮືອໄປທໍາການຜະລິດຢູ່ດອນກາງແມ່ນໍ້າຂອງ ແລະ ເຮືອດູດແຮ່-ຊາຍພາຍໃນເມືອງທີ່ມີການອະນຸຍາດໃຫ້ແລ່ນຕາມນໍ້າຂອງນັ້ນແມ່ນໄດ້ຂຶ້ນທະບຽນໝົດທຸກລໍາ ເລີ່ມແລ່ນແຕ່ 7 ໂມງເຊົ້າ ແລະ ໃຫ້ກັບ 17 ໂມງ 30 ຂອງທຸກໆວັນ ໂດຍໄດ້ມີການກວດເຊັກຕົວເລກລູກເຮືອຢ່າງລະອຽດ. ພາຍໃນເມືອງມີແຮງງານລາວໄປເຮັດວຽກຢູ່ປະເທດໄທປະມານ 7.000 ຄົນ ຊຶ່ງ 70% ຂອງແຮງງານດັ່ງກ່າວແມ່ນແຮງງານເຖື່ອນ.