ມີ 10 ພັນກວ່າຄົນທີ່ເຂົ້າມາກັກກັນຢູ່ທີ່ສູນຫຼັກ 27

ທ່ານ ພັນໂທ ດຣ ບຸນອໍ ເຕົາບົວທອງ, ຫົວໜ້າສູນກັກບໍລິເວນຫຼັກ 27 ໃຫ້ຮູ້ວ່າ: ໂດຍປະຕິບັດຕາມທິດຊີ້ນຳຂອງຄະນະປະຈຳພັກກະຊວງປ້ອງກັນປະເທດ, ຄະນະສະເພາະກິດເພື່ອສະກັດກັ້ນ ແລະ ແກ້ໄຂພະຍາດໂຄວິດ-19 ຂັ້ນສູນກາງ, ເຊີ່ງໄດ້ມອບໂອນສູນແຫ່ງນີ້ ໃຫ້ແກ່ກະຊວງປ້ອງກັນປະເທດ, ໂດຍແມ່ນກົມເສນາຮັກ, ກົມໃຫຍ່ພະລາທິການ ເປັນຜູ້ດຳເນີນການ, ເຊີ່ງເລີ່ມແຕ່ກາງປີ 2020 ເປັນຕົ້ນມາ, ມາຮອດປັດຈຸບັນມີຜູ້ມາເຂົ້າກັກໂຕ ຢູ່ໃນສູນແຫ່ງນີ້ທັງໜົດ 10 ພັນກວ່າຄົນ, ແຕ່ໃນປັດຈຸບັນນີ້ຍັງ 400 ກວ່າຄົນ, ໃນຈຳນວນ 10 ພັນກວ່າຄົນນີ້, ແມ່ນກວມເອົາປະຊາຊົນລາວໃນຂອບເຂດທົ່ວປະເທດ, ໂດຍສະເພາະແມ່ນແຮງງານລາວທີ່ກັບມາຈາກການໄປເຮັດວຽກຢູ່ຕ່າງປະເທດ, ພະນັກງານລາວທີ່ມາຈາກຕ່າງປະເທດ,

ກຸ່ມເປົ້າໝາຍທີ່ໃກ້ຊິດ ແລະ ພົວພັນກັບຜູ້ຕິດເຊື້ອພະຍາດ ໂຄວິດ-19 ນັບທັງຄົນຕ່າງປະເທດຈຳນວນໜື່ງ, ເຊີ່ງແຕ່ລະເປົ້າໝາຍແມ່ນທາງສູນຂອງພວກເຮົາ ໄປຮັບ ຫຼື ການຈັດຕັ້ງທີ່ກ່ຽວຂ້ອງ ແລະ ຄອບຄົວ ເປັນຜູ້ສົ່ງເຂົ້າມາ. ທາ່ນຫົວໜ້າສູນກ່າວຕື່ມວ່າ: ເມື່ອມາຮອດສູນແລ້ວ ພວກເຮົາໄດ້ເອົາໃຈໃສ່ຕິດຕາມກວດກາ, ແຍກປ່ຽວ, ແຍກໝູ່ ແລະ ຄັດສັນແຕ່ລະກໍລະນີ ເຂົ້າກັກບໍລິເວນຢ່າງເໝາະສົມ, ພ້ອມທັງເອົາໃຈໃສ່ເຝົ້າລະວັງ ແຕ່ລະກໍລະນີຢ່າງໃກ້ຊິດ, ທຸກໆ 12 ຊົ່ວໂມງ ຈະວັດແທກອຸນຫະພູມ, ກວດຫາເຊື້ອພະຍາດ, ຖ້າຫາກພົບກໍລະນີ ກໍຈະຮີບຮ້ອນນຳສົ່ງຜູ້ກ່ຽວ ໄປໂຮງໝໍເພື່ອປິ່ນປົວຢ່າງທັນການ ແລະ ເມື່ອຄົບກຳນົດ 14 ວັນແລ້ວ ກໍ່ຈະສົ່ງກັບບ້ານຂອງໃຜລາວ ຢ່າງໃດກໍຕາມ ຜ່ານການຈັດຕັ້ງປະຕິບັດວຽກງານຕົວຈິງ ພວກເຮົາແມ່ນພົບຄວາມຫຸຍ້ງຍາກ,

ອຸປະສັກ ແລະ ສິ່ງທ້າທາຍຫຼາຍປະການເປັນຕົ້ນແມ່ນ ອຸປະກອນຮັບໄຊ້, ອາຫານການກິນ ແລະ ອື່ນໆ ແມ່ນຂາດແຄນ ແລະ ບໍ່ພຽງພໍຕາມຄວາມຮຽກຮ້ອງຕ້ອງການ ຂອງຜູ້ມາກັກຕົວ ມີຈຳນວນໜື່ງ ບໍ່ໃຫ້ຄວາມຮ່ວມມືກັບເຈົ້າໜ້າທີ່ ເທົ່າທີ່ຄວນ, ຝ່າຝືນລະບຽບຫຼັກການ ແລະ ມີຈຳນວນໜື່ງແມ່ນລັກໂຕນໜີ ເພື່ອເມືອຫາຄອບຄົວ, ເຊີ່ງເປັນເຫດພາໃຫ້ເກີດການແຜ່ເຊື້ອໄດ້ງ່າຍຂື້ນ, ສ້າງຄວາມວຸ້ນວາຍແກ່ສັງຄົມ. ທາ່ນ ຫົວໜ້າສູນໄດ້ກ່າວຕອນທ້າຍວ່າ: ໂດຍຢຶດໝັ້ນຕໍ່ນ້ໍາໃຈຂອງແພດປະຕິວັດ, ພວກຂ້າພະເຈົ້າໄດ້ສຸມທຸກເຫື່ອແຮງ, ສະຕິປັນຍາ ແລະ ຄວາມຮູ້ຄວາມສາມາດຂອງຕົນ ເພື່ອອຸທິດໃຫ້ແກ່ການຕ້ານ ແລະ ສະກັດກັ້ນພະຍາດໂຄວິດ-19 ໃນຄັ້ງນີ້ຢ່າງບໍ່ຮູ້ອິດຮູ້ເມື່ອຍ, ໂດຍຍົກສູງວິຊາສະເພາະ ແລະ ຈັນຍາບັນໃນອາຊີບຂອງຕົນດ້ວຍຄວາມຫ້າວຫັນ ແລະ ກະຕືລືລົ້ນ.