ຊາວຫວຽດນາມ 15 ຄົນຖືກຕວະເຂົ້າເມືອງແບບຜິດກົດໝາຍ

ພະແນກຕໍາຫຼວດຕ້ານການຄ້າມະນຸດ ປກສ ນະຄອນຫຼວງວຽງຈັນ ໄດ້ຮັບແຈ້ງຂໍຄວາມຊ່ວຍເຫຼືອຈາກຜູ້ຍິງຄົນຫວຽດນາມວ່າ: ຕົນຖືກຫຼອກລວງມາແຕ່ປະເທດຫວຽດນາມ.

ຫຼັງຈາກນັ້ນ, ເຈົ້າໜ້າທີ່ໄດ້ລົງກວດກາ ແລະ ແກ້ໄຂຢູ່ໂຮງແຮມແຫ່ງໜຶ່ງ ເຂດບ້ານສາຍລົມ ເມືອງຈັນທະບູລີ ນວ ພົບເຫັນຄົນຫວຽດນາມ ຈໍານວນ 15 ຄົນ, ຍິງ 14 ຄົນ ບໍ່ມີໜັງສືຜ່ານແດນ ແລະ ວີຊ່າ ອະນຸຍາດເຂົ້າ-ອອກເມືອງ ທີ່ຖືກຕ້ອງຈຶ່ງໄດ້ນໍາຕົວມາສອບສວນ.

ພ້ອມທັງເອົາໄປກັກກັນເພື່ອກວດກາຊອກຫາເຊື້ອພະຍາດ ຕາມມາດຕະການປ້ອງກັນສະກັດກັ້ນການແຜ່ລະບາດຂອງພະຍາດ ໂຄວິດ-19 ປັດຈຸບັນ, ເຈົ້າໜ້າທີ່ຕໍາຫຼວດກຳລັງເກັບກຳຂໍ້ມູນສືບຕໍ່ພົວພັນກັບຜູ້ຕາງໜ້າຕໍາຫຼວດຫວຽດນາມ ເພື່ອເປີດກວ້າງຂະຫຍາຍຜົນຊອກຫາພັກພວກຮ່ວມຂະບວນການມາດຳເນີນຄະດີຕາມກົດໝາຍ.

ຂໍ້ມູນຂ່າວຈາກ ປກສ ນະຄອນຫຼວງວຽງຈັນ