ວັກຊິນກັນໂຄວິດ-19 ຕອນນີ້ຢາກສັກກໍ່ບໍ່ໄດ້ສັກແລ້ວວັກຊິນເຂັມທີ 1 ໝົດແລ້ວ

ວ່າດ້ວຍເລື່ອງການສັກຢາວັກຊິນ ປ້ອງກັນພະຍາດໂຄວິດ-19 ທີ່ທາງພາກລັດ ໂດຍສະເພາະແມ່ນກະຊວງສາທາລະນະສຸກໄດ້ອອກມາປະກາດລະດົມໃຫ້ພໍ່ແມ່ປະຊາຊົນພາກັນໄປສັກວັກຊິນ ທັງນີ້ກໍ່ເພື່ອເປັນການສ້າງພູມຄຸ້ມກັນໃຫ້ກັບຜູ້ສັກ ຖ້າທຸກຄົນພາກັນໄປສັກກໍ່ຈະເປັນການສ້າງພູມຄຸ້ມກັນລວມໝູ່.

ສຳລັບວັກຊິນທີ່ລາວເຮົາສັກໃນໄລຍະຜ່ານມາແມ່ນມີ 2 ຍີ່ຫໍ້ຄື: ຊີໂນຟາມ (ເປັນການຊ່ວຍເຫຼືອຈາກປະເທດ ສປ ຈີນ ) ກັບ ແອັສຕາ ຊີນີກາ (ເປັນການຊ່ວຍເຫຼືອ ຜ່ານ COVAX) ຕໍ່ມາຈຶ່ງໄດ້ມີການແຈ້ງວ່າໄດ້ຮັບການຊ່ວຍເຫຼືອວັກຊິນ ຍີ່ຫໍ້ ສະປູນິກ ຈາກປະເທດຣັດເຊຍ ແຕ່ຍັງບໍ່ທັນໄດ້ນຳມາສັກເທື່ອ.

ແຕ່ຍ້ອນຂ່າວລືທີ່ບໍ່ເປັນທາງການ ໄດ້ແຜ່ອອກມາວ່າສັກວັກຊິນແລ້ວເປັນອັນຕະລາຍເຖິງຊີວິດ, ເຮັດໃຫ້ພໍ່ແມ່ປະຊາຊົນພາກັນຢ້ານກົວ ຫຼື ຢ້ານເສຍຊີວິດ ແລະ ພາກັນບໍ່ໄປສັກຢາວັກຊິນປ້ອງກັນໂຄວິດ-19, ຕໍ່ກັບຂ່າວລືດັ່ງກ່າວ ເຖິງວ່າທາງແພດໝໍຈະອອກມາຊີ້ແຈງວ່າບໍ່ກ່ຽວກັບວັກຊິນ ແຕ່ຫຼາຍຄົນຍັງບໍ່ກ້າໄປສັກ.

ແຕ່ກໍ່ມີຫຼາຍຄົນຕື່ນໂຕໄປສັກ ແລະ ຢາກສັກເພາະບໍ່ຢາກຕາຍຍ້ອນຕິດໂຄວິດ ຫຼື ບໍ່ຢາກຕິດເຊື້ອໄປແຜ່ໃສ່ຄົນອ້ອມຂ້າງ. ເຊິ່ງຜ່ານມາມີຜູ້ໄປສັກວັກຊິນເຂັມທີ 1 ແລ້ວຈຳນວນ 602.669 ໂດສ ແລະ ມີຜູ້ສັກໂດສທີ 2 ສຳເລັດແລ້ວ 126.249 ໂດສ. ມາຮອດປະຈຸບັນຫຼາຍບ່ອນໄດ້ມີການປະກາດ ໂຈະ

ຫຼື ຢຸດ ໃຫ້ບໍລິການສັກຢາວັກຊິນ ໃຫ້ແກ່ຜູ້ທີ່ຈະມາສັກເຂັມທີ 1 ຫຼື ໂດສທຳອິດ ເນື່ອງຈາກຢາໃກ້ຈະໝົດ ແລະ ເອົາໄວ້ສັກໃຫ້ຜູ້ທີ່ຈະຕ້ອງໄດ້ສັກເຂັມ ຫຼື ໂດສທີ 2 ເທົ່ານັ້ນ. ສ່ວນຜູ້ທີ່ຈະມາສັກໂດສທຳອິດແມ່ນຕ້ອງລໍຖ້າຈົນກວ່າຈະມີການປະກາດ ເປີດບໍລິການໃຫ້ສັກອີກຄັ້ງ.