ຄະນະສະເພາະກິດຈະໃຊ້ມາດຕະການເດັດຂາດຕໍ່ຜູ້ລະເມີດມາດຕະການຄໍາສັ່ງ 15/ນຍ

ກອງປະຊຸມປຶກສາຫາລືກ່ຽວກັບການຈັດຕັ້ງປະຕິບັດມາດຕະການຕ່າງໆໃນການປ້ອງກັນ, ຄວບຄຸມ, ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ນະຄອນຫຼວງວຽງຈັນໃນໄລຍະ 15 ວັນ (ວັນທີ 21 ພຶດສະພາ ຫາວັນທີ 4 ມິຖຸນາ 2021) ທີ່ມີການສືບຕໍ່ປະຕິບັດຄໍາສັ່ງ 15/ນຍ ໄດ້ຈັດຂຶ້ນເມື່ອວັນທີ 27 ພຶດສະພາ 2021 ທີ່ຜ່ານມາ ຢູ່ຫ້ອງວ່າການນະຄອນຫຼວງວຽງຈັນໂດຍການເປັນປະທານ ຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດປ້ອງກັນ, ຄວບຄຸມ, ແລະ ແກ້ໄຂການແຜ່ລະບາດຂອງພະຍາດໂຄວິດ-19.

ທີ່ກອງປະຊຸມ, ທ່ານ ຮອງນາຍົກ ໄດ້ເນັ້ນໃຫ້ຄະນະສະເພາະກິດຂັ້ນສູນກາງ ແລະ ນະຄອນຫຼວງວຽງຈັນ ສືບຕໍ່ປະຕິບັດມາດຕະການທີ່ກຳນົດໃນແຈ້ງການ 528/ຫສນຍ, ລົງວັນທີ 20 ພຶດສະພາ 2021 ຢ່າງເຂັ້ມງວດ ແລະ ເດັດຂາດ, ສຳລັບມາດຕະການຜ່ອນຜັນ ໃຫ້ປະຕິບັດບົນພື້ນຖານຫຼັກການຮັບປະກັນການປ້ອງກັນການຕິດເຊື້ອ ແລະ ແຜ່ເຊື້ອພະຍາດ ຢ່າງເຂັ້ມງວດ, ລະດົມພາກສ່ວນຕ່າງໆ ເປັນຕົ້ນ ອົງການປົກຄອງ, ທະຫານ, ຕຳຫຼວດ ເພື່ອຕິດຕາມ ກວດກາ ການເຂົ້າ-ອອກ, ໂຄສະນາ ເຜີຍແຜ່ຄວາມອັນຕະລາຍ ຂອງພະຍາດ ໂຄວິດ-19 ແລະ ການປ້ອງກັນຕິດເຊື້ອ ແລະ ແຜ່ເຊື້ອ, ໃຫ້ມີມາດຕະການເດັດຂາດ ຕໍ່ຜູ້ລະເມີດມາດຕະການທີ່ວາງອອກ, ປຸກລະດົມປະຊາຊົນເຂົ້າຮ່ວມ ຂະບວນການປ້ອງກັນ, ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດ, ໃຫ້ການຈັດຕັ້ງບ້ານ ເປັນເຈົ້າການ ຕິດຕາມການເຄື່ອນໄຫວຂອງບຸກຄົນທີ່ຢູ່ໃນຄວາມຮັບຜິດຊອບຂອງຕົນ ໂດຍສະເພາະບ້ານເຂດແດງ ແລະ ເຂດເຫຼືອງ.

ນອກນັ້ນ, ທ່ານຮອງນາຍົກໄດ້ຊີ້ນໍາໃຫ້ຂະແໜງສາທາລະນະສຸກສືບຕໍ່ເອົາໃຈໃສ່ປະຕິບັດມາດຕະການ ທາງການ ແພດ ໃຫ້ດີທີ່ສຸດ ເປັນຕົ້ນ ການເຝົ້າລະວັງ, ການກວດຫາເຊື້ອ, ການປ້ອງກັນ, ການສັກວັກຊີນ, ການປິ່ນປົວຜູ້ຕິດເຊື້ອ ແລະ ອື່ນໆ ພ້ອມທັງ ສົມທົບອົງການປົກຄອງນະຄອນຫຼວງ ແລະ ເຈົ້າໜ້າທີ່ກ່ຽວຂ້ອງ ໃນການຕິດຕາມເອົາຜູ້ສຳຜັດໃກ້ຊິດຜູ້ຕິດເຊື້ອ ແລະ ກຸ່ມສ່ຽງມາກວດຫາເຊື້ອ ແລະ ຈຳກັດບໍລິເວນໃຫ້ຄົບ 14 ວັນຕາມລະບຽບການ. ໃຫ້ກະຊວງສາທາລະນະສຸກ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ສົມທົບກັບກະຊວງການເງິນ ຄົ້ນຄວ້າ ປະຕິບັດນະໂຍບາຍຕ່າງໆ ຕໍ່ພະນັກງານແພດ-ໝໍ, ເຈົ້າໜ້າທີ່ທະຫານ, ຕຳຫຼວດ ຕາມລະບຽບການ ແລະ ໃຫ້ທັນການ.