ND ມີສຢູນິເວີຣສລາວຄົນໃຫມ່ຈະມີການຈັດຖະແຫຼງຂ່າວ 1 ມິຖຸນາ 2021

ວັນທີ 29/5/2021 ທີ່ ນວຈ ຈາກເພຈ “Miss Universe Laos” ມີສຢູນິເວີຣສລາວ ໄດ້ໂພສວ່າ “ແຈ້ງຢ່າງເປັນທາງການ ທ່ານ ນາງ ຈັນໂສ ຈິດຕິວົງ ແພນ National Director of Miss Universe Laos ຄົນໃຫມ່ ຜູ້ອຳນວຍການ ຮ້ານ ເພັດພະໄທ ຈີວເວີລີ້ Phetphathai jewelry ຮ້ານເພັດພະໄທ ຈິວເວີລີ້ ປະທານໂຄງການ The Oasis Group ແລະ ກຸ່ມທຸລະກິດໃນເຄືອ ຝາກແຟນນາງງາມທຸກຄົນຊ່ວຍແຊ ແລະ ໃຫ້ກຳລັງໃຈ ກອງໃຫມ່ຂອງພວກເຮົາ Miss Universe Laos ເຈີດຈະລັດຢ່າງຫມັ້ນໃຈ ເປັ່ງປະກາຍສູ່ຈັກກະວານ ເວທີຫນື່ງດຽວ ທີ່ຈະພາໄປສູ່ ຈັກກະວານ” ວົງການນາງງາມເຮົາ ໂດຍສະເພາະເວທີ Miss Universe ປີນີ້ບອກໄດ້ເລີຍວ່າບໍ່ໄດ້ພັກບໍ່ໄດ້ຜ່ອນກັນ ເພາະໄລຍະເວລາທີ່ຈໍ້ລະຫວ່າງການປະກວດປີ 2020 ທີ່ຍ້າຍມາຈັດໃນເດືອນພຶດສະພາທີ່ຜ່ານມາ ແລະ ກໍມີຂໍ້ມູນອອກມາອີກວ່າພາຍໃນເດືອນສິງຫານີ້ ກໍຕ້ອງຊອກຫາຕົວແທນປະເທດເພື່ອສົ່ງໄປປະກວດທ້າຍປີນີ້ໃຫ້ທັນ.

ກ່ອນທີ່ຈະໄປຮອດມື້ນັ້ນ ແຟນນາງງາມລາວກໍຕ້ອງແປກໃຈກັນອີກຄັ້ງ ເພາະມີການແຕ່ງຕັ້ງ National Director ຫຼື ຜູ້ອຳນວຍການກອງປະກວດປະຈຳປະເທດຄົນໃໝ່ຂຶ້ນມາ ຫຼື ທີ່ເຮົາເອີ້ນກັນຫຍໍ້ໆວ່າ ND ເຊິ່ງເປັນເຈົ້າຂອງທຸລະກິດເຄື່ອງປະດັບລະດັບແຖວໜ້າຂອງລາວຢ່າງ ທ່ານ ນາງ ຈັນໂສ ຈິດຕິວົງ ຈາກ ເພັດພະໄທ ຈິວເວີລີ້. ການປ່ຽນແປງຄັ້ງນີ້ໄດ້ມີການປະກາດອອກມາເມື່ອວັນເສົາທີ 29 ພຶດສະພາທີ່ຜ່ານມາ ພ້ອມທັງມີການເປີດເຟສບຸກຂອງກອງປະກວດຂຶ້ນມາໃໝ່. ພ້ອມນີ້ກອງປະກວດໃໝ່ນີ້ກໍຍັງໄດ້ ຕ້າ ເອແພັກ ຫຼື ເທບມະຫາວິໄຊ ໄຊທິລາດ ຜູ້ເຊິ່ງມີປະສົບການໃນການຈັດປະກວດນາງງາມຢູ່ລາວຫຼາຍເວທີມາຮ່ວມເປັນ General Director ນຳ. ທັງນີ້ ທ່ານນາງ ຈັນໂສ ຈິຕິວົງ ແລະ ຕ້າ ເອແພັກ ໄດ້ມີການອອກມາເປີດເຜີຍຂໍ້ມູນເບື້ອງຕົ້ນກ່ຽວກັບການຊອກຫາຕົວແທນປະເທດລາວເພື່ອໄປປະກວດໃນ Miss Universe 2021 ທີ່ຈະຈັດຂຶ້ນໃນທ້າຍປີນີ້ ເຊິ່ງໄດ້ສະຫຼຸບຫຍໍ້ມາໃຫ້ແຟນນາງງາມໄດ້ຮູ້ກັນ.

1. ມິສຢູນິເວີສຕົວແທນປະເທດລາວໃນປີ 2021 ຈະໄດ້ມາຈາກການປະກວດ ເຖິງວ່າຈະມີໄລຍະເວລາໃນການກະກຽມພຽງບໍ່ເທົ່າໃດເດືອນເທົ່ານັ້ນ ເພາະທາງກອງປະກວດລາວຢາກໄດ້ຜູ້ທີ່ເໝາະສົມ ແລະ ຢາກໃຫ້ກອງແມ່ເຫັນຄວາມສຳຄັນຂອງປະເທດລາວ ໂດຍຈະມີການເປີດຮັບສະໝັກຜູ້ເຂົ້າປະກວດໃນໄວໆນີ້.

2. ປະເດັນທີ່ຫຼາຍຄົນສົງໄສວ່າ ຜູ້ທີ່ເປັນສາວສອງສາມາດປະກວດໄດ້ບໍ່, ຕ້າ ເອແພັກ ເປີດເຜີຍວ່າ ຖ້າມີການປ່ຽນຄຳນຳໜ້າຊື່ວ່າ ນາງ ແມ່ນສາມາດເຂົ້າປະກວດ ແລະ ລຸ້ນເປັນຕົວແທນປະເທດໄດ້. ແຕ່ໃນປະເທດລາວໃນຕອນນີ້ຍັງບໍ່ທັນມີການຮັບຮອງທາງດ້ານກົດໝາຍໃຫ້ສາວສອງສາມາດປ່ຽນຄຳນຳໜ້າຊື່ໄດ້.

3. ຈະມີການຄັດເລືອກທາງອອນລາຍ ເພາະຍັງຕ້ອງຮັກສາໄລຍະຫ່າງ ເນື່ອງຈາກການລະບາດຂອງພະຍາດ. ມື້ປະກວດແມ່ນໄດ້ມີການກຳນົດມື້ໄວ້ແລ້ວ.

4. ສຳລັບມຸງກຸດປະຈຳຕຳແໜ່ງ ເນື່ອງຈາກ ND ເອງກໍເປັນເຈົ້າຂອງທຸລະກິດເຄື່ອງປະດັບ ແລະ ເປັນຜູ້ສະໜັບສະໜຸນຂອງການປະກວດ ຈຶ່ງມີການຮັບປະກັນວ່າມຸງກຸດຈາກເພັດພະໄທຈະອອກມາຕື່ນຕາຕື່ນໃຈຢ່າງແນ່ນອນ.

5. ຜູ້ທີ່ເຄີຍຜ່ານເວທີອື່ນສາມາດຮ່ວມປະກວດໄດ້.

6. ຈະມີການປະກວດໄອເດຍຊຸດປະຈຳຊາດ ເນື່ອງຈາກຢາກສົ່ງເສີມນັກອອກແບບຄົນລາວ.

7. ກອງປະກວດລາວປີນີ້ຈະມີການແລກປ່ຽນກັບປະເທດເພື່ອນບ້ານ ທັງຫວຽດນາມແດ່ ໄທແດ່ ໂດຍສະເພາະເລື່ອງຂອງຊຸດລາຕີ ແລະ ການຝຶກທັກສະຕ່າງໆຂອງນາງງາມ.

8. ຕ້າ ເອແພັກ ເປີດເຜີຍວ່າປີນີ້ຈະມີສິ່ງທີ່ແປກໃໝ່ເກີດຂຶ້ນ ນັ້ນກໍຄືມີຮອບສອບເສັງຄວາມຮູ້ຮອບໂຕແບບອັດຕະໄນ ແລະ ທາງ ທ່ານນາງ ຈັນໂສ ເຊິ່ງເປັນ ND ໄດ້ມີການສະເໜີຈັດໃຫ້ນາງງາມນັ່ງສະມາທິ ໂດຍມີເປົ້າໝາຍເພື່ອໃຫ້ນາງງາມມີສະມາທິເວລາທີ່ຕ້ອງເຈິກັບສະຖານະການຕ່າງໆໃນການປະກວດເວທີໃຫຍ່.

9. ສຳລັບເລື່ອງຂອງພາສາ, ທາງກອງປະກວດລາວບໍ່ໄດ້ຊີຣຽສເລື່ອງນີ້ ເພາະກໍມີຫຼາຍປະເທດນາງງາມກໍບໍ່ໄດ້ເວົ້າພາສາອັງກິດ ແຕ່ຖ້າໄດ້ກໍຈະເປັນການດີ ແຕ່ສິ່ງທີ່ສຳຄັນທີ່ສຸດແມ່ນພາສາກາຍ ແລະ ການສະແດງອອກ.

10. ສຳລັບສາເຫດທີ່ ຕ້າ ເອແພັກ ໄດ້ມາເປັນ GD ແລະ ທ່ານນາງ ຈັນໂສ ໄດ້ມາເປັນ ND ນັ້ນ ແມ່ນຍ້ອນຜູ້ໃຫຍ່ເພິ່ນເລັງເຫັນບາງຢ່າງ ແລະ ມີການໂອ້ລົມກັນ ຈຶ່ງໄດ້ຮັບຄວາມໄວ້ວາງໃຈໃຫ້ຮັບຜິດຊອບການຈັດປະກວດໃນປີນີ້ ແລະ ປີຕໍ່ໆໄປ.

ຫຼັງຈາກທີ່ມີການປະກາດ ND ຄົນໃໝ່ອອກມາ, ກໍມີກະແສຈາກຝັ່ງໄທວ່າ ND ຜູ້ເກົ່າຍັງຢູ່ ແລ້ວຜູ້ໃໝ່ຂຶ້ນມາໄດ້ແນວໃດ? ສຳລັບຂໍ້ສົງໄສນີ້ ໄດ້ມີການຕິດຕໍ່ຫາທາງທີມງານ ND ໃໝ່ຂອງ Miss Universe Laos ເຊິ່ງໃນປັດຈຸບັນນີ້ແມ່ນຍັງບໍ່ທັນສາມາດໃຫ້ຄຳຕອບໄດ້ ແຕ່ຈະມີການຈັດຖະແຫຼງຂ່າວຢ່າງເປັນທາງການກ່ຽວກັບປະເດັນນີ້ໃນວັນທີ 1 ມິຖຸນາ 2021