ກຽມຈັດບຸນນະມັດສະການພະທາດສີໂຄດຕະບອງ

ແຂວງຄໍາມ່ວນ ພວມກະກຽມຈະຈັດບຸນນະມັດສະການພະທາດສີໂຄດຕະບອງ ຢູ່ເມືອງທ່າແຂກ ປະຈໍາປີ 2022 ໃນມື້ຂຶ້ນ 13-15 ຄໍ່າ, ເຊີ່ງກົງກັບວັນທີ 14-16 ກຸມພານີ້ ເພື່ອແນໃສ່ຟື້ນຟູການທ່ອງທ່ຽວພາຍໃນແຂວງ ແລະ ກຽມໃສ່ການເປີດການທ່ອງທ່ຽວສີຂຽວ ໄລຍະທີ 2 ຂອງລັດຖະບານ, ແຕ່ເດັດຂາດບໍ່ໃຫ້ມີການຈໍາໜ່າຍເຄື່ອງດື່ມທີ່ມີທາດເຫລົ້າ ແລະ ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ. ​ທ່ານ ແກ້ວອຸດອນ ບຸດສິງຂອນ, ຮອງເຈົ້າແຂວງຄໍາມ່ວນ ໃຫ້ສໍາພາດຕໍ່ສື່ມວນຊົນ ໃນວັນທີ 4 ກຸມພາ 2022 ວ່າ:

ປັດຈຸບັນ, ການລະບາດຂອງພະຍາດໂຄວິດ-19 ຢູ່ແຂວງຄໍາມ່ວນ ຜ່ອນຄາຍລົງຫລາຍແລ້ວ ເຮັດໃຫ້ອົງການປົກ ຄອງແຂວງແຕ່ງຕັ້ັ້ງຄະນະຮັບຜິດຊອບຂັ້ນແຂວງ ແລະ ເມືອງ ກໍຄື ເມືອງທ່າແຂກ ເພື່ອກະກຽມຈັດບຸນນະມັດສະການພະທາດສີໂຄດຕະບອງ ປະຈໍາປີ 2022 ໂດຍໄດ້ປຶກສາຫາລືຮ່ວມກັນແລ້ວກ່ຽວກັບການກໍານົດກິດຈະກໍາພາຍໃນງານ ເຊີ່ງປີນີ້ຈະຈັດຂຶ້ນໃຫຍ່ກວ່າປີຜ່ານມາ ແລະ ຈະມີຫລາຍກິດຈະກໍາ ເປັນຕົ້ນ: ກິດຈະກໍາທາງສາສະໜາທີ່ຂາດບໍ່ໄດ້ ຄື: ການຟັງທໍາມະເທດສະໜາ, ແຫ່ຜາສາດເຜີ້ງ ແລະ ການໃສ່ບາດຢາດນໍ້າ. ນອກຈາກນີ້ ຈະມີການວາງສະແດງຂາຍສິນຄ້າຫັດຖະກໍາ ກໍຄື ເຄື່ອງໃຊ້ສອຍຕ່າງໆ, ແຂ່ງຂັນກິລາບາງປະເພດທີ່ເຄີຍປະຕິບັດສືບທອດກັນມາ, ແຂ່ງຂັນກອງແຕ້-ກອງຈິງ,

ແຂ່ງຂັນຂັບລໍາມະຫາໄຊ ເພື່ອສ້າງຮຸ່ນສືບທອດ ແລະ ກິດຈະກໍາອື່ນໆ, ແຕ່ໃນນີ້ ມີບາງກິດຈະກໍາກິລາທີ່ແຂ່ງຂັນ ເປັນໝູ່ຄະນະ ໂດຍສະເພາະກິລາບານເຕະ ຈະຈໍາກັດທີມເຂົ້າຮ່ວມແຂ່ງຂັນເພື່ອບໍ່ໃຫ້ຫລາຍເກີນໄປ. ນອກຈາກນີ້ ພາຍໃນງານຈະອະນຸຍາດໃຫ້ມີການຫລີ້ນດົນຕຣີທີ່ຕິດພັນກັບການສະແດງສິລະປະເທົ່ານັ້ນ, ແຕ່ບໍ່ອະນຸຍາດໃຫ້ຫລີ້ນດົນ ຕຣີທີ່ຕິດພັນກັບການຈໍາໜ່າຍເຄື່ອງດື່ມທີ່ມີທາດເຫລົ້າ ຫລື ມີການຈໍາໜ່າຍເຄື່ອງດື່ມທີ່ມີທາດເຫລົ້າພາຍໃນງານຢ່າງເດັດຂາດ. ຮອງເຈົ້າແຂວງຄໍາມ່ວນ ໃຫ້ຮູ້ຕື່ມວ່າ: ສໍາລັບການປ້ອງກັນພະຍາດໂຄວິດ-19 ພາຍໃນງານຄັ້ງນີ້. ຄະນະຮັບຜິດຊອບຈັດງານໄດ້ຖອດຖອນບົດຮຽນຈາກປີຜ່ານມາ ໂດຍຈະຕິດຕັ້ງການກວດກາວັດແທກອຸນຫະພູມ ແລະ ປະ ກອບເຈວລ້າງມືຢູ່ທຸກຈຸດເຂົ້າຫາພະທາດສີໂຄດຕະບອງ,

ໃຫ້ທຸກຄົນທີ່ໄປຮ່ວມງານໃສ່ຜ້າອັດປາກ-ດັງ, ການຈັດໄລຍະຫ່າງບ່ອນວາງສະແດງຂາຍສິນຄ້າ, ການຮັກສາໄລຍະຫ່າງໃນເວລາແຫ່ຜາສາດເຜີ້ງ ແລະ ອື່ນໆ. ນອກຈາກນີ້ ຍັງມີທີມແພດປະຈໍາພາຍໃນງານ ເພື່ອເຮັດໃຫ້ຜູ້ໄປທ່ອງທ່ຽວບຸນນະມັດສະການພະທາດສີໂຄດຕະບອງ ປີນີ້ ມີຄວາມເບີກບານມ່ວນຊື່ນ ແລະ ປ້ອງກັນໄດ້ພະຍາດໂຄວິດ-19 ເພາະນີ້ຖືເປັນໂອກາດສໍາຄັນທີ່ຈະປະກອບສ່ວນຟື້ນຟູການທ່ອງທ່ຽວພາຍໃນແຂວງຄໍາມວ່ນ ຄືນໃໝ່, ທັງເປັນການກຽມພ້ອມຄວາມໃຫ້ແກ່ການເປີດການຕ້ອນຮັບນັກທ່ອງທ່ຽວຈາກຕ່າງ ປະເທດໃນເຂດທ່ອງທ່ຽວສີຂຽວ ໄລຍະທີ 2 ຂອງລັດຖະບານ ໃນເດືອນເມສາ ປີນີ້ ເຊີ່ງ ຄໍາມວ່ນ ແມ່ນ 1 ໃນຈໍານວນ9 ແຂວງທີ່ລັດຖະບານໄດ້ກໍານົດໄວ້.