ເລີ້ມແລ້ວສຸມໃສ່ສ້ອມແປງໄຟເຍືອງທາງປະດັບປະດາຕົວເມືອງ

ວັນທີ 7 ກຸມພາ 2022 ນີ້ ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໄດ້ລາຍງານໃຫ້ຮູ້ວ່າ: ໄດ້ເອົາໃຈໃສ່ປັບປຸງ ແລະ ສ້ອມ ແປງ ໄຟເຍືອງທາງ ແລະ ໄຟອຳນາດ ໃນນະຄອນຫລວງວຽງຈັນ ເປັນຕົ້ນ: ສ້ອມແປງປ່ຽນຖ່າຍດອກໄຟອຳນາດ ສີ່ແຍກວັດໂພນໄຊ, ສ້ອມແປງດອກໄຟເຍືອງທາງ ໜ້າເຮືອນປະທານເທດ ແລະ ບ້ານຂຸນຕາທົ່ງ,

ສ້ອມແປງໄຟເຍືອງທາງຮ່ອມ, ສ້ອມແປງຕູ້ໄຟເຍືອງທາງເສັ້ນທາງທ່າເດື່ອ, ຕູ້ໄຟທາງຫລັກ 3, ຕູ້ໄຟທາງຈີ່ນາຍໂມ້, ເກັບມ້ຽນເສົາໄຟອຳນາດທີ່ຖືກລົດຕໍາ ຢູ່ໄຟອຳນາດມະໂຫສົດ, ໄຟອຳນາດສີດຳດວນ, ທາງທ່າເດື່ອ, ກຳແພງເມືອງ, ຕິດຕາມການຍ້າຍເສົາໄຟອຳນາດສີ່ແຍກກາຍະສິນ ແລະ ເສົາໄຟທາງຄູວຽງ ຂອງໂຄງການເປີດກວ້າງໜ້າທາງ ກະຊວງ ຍທຂ.

ນອກນີ້ຍັງສຸມໃສ່ປະດັບປະດາຕົວເມືອງເພື່ອຕ້ອນຮັບວັນສຳຄັນຕ່າງໆ ເປັນຕົ້ນຕິດຕັ້ງເສົາໄຟປະດັບຢູ່ວົງວຽນ 450 ປີ, ປະດັບໄຟໃສ່ສວນປະຕູໄຊ, ສວນສີເມືອງ ລວມທັງໄດ້ບົວລະ ບັດຮັກສາສວນສາທາລະນະ, ວົງວຽນ ແລະ ດອນກາງທາງ, ຕັດຫຍ້າເສັ້ນທາງໄກສອນພົມວິຫານ,

ສວນຂົວຂາວ, ທາງທ່າເດື່ອ, ທາງອາຊຽນ, ທາງ 23 ສິງຫາ; ຕັດແຕ່ງຕົ້ນໄມ້ ຢູ່ຂ້າງໂຮງຮຽນແພດສາດ, ເສັ້ນທາງ 23 ສິງຫາ, ທາງລ້ານຊ້າງ, ທາງຂຸນບູລົມ, ອະນາໄມສວນແຄມຂອງ.