ການແພ່ລະບາດຂອງໂຄວິດຜ່ອນຄາຍລົງ50%ແລ້ວ

ມາຮອດປັດຈຸບັນ, ສະພາບການແພ່ລະບາດຂອງພະຍາດໂຄວິດ-19 ຢູ່ປະເທດເຮົາເຫັນວ່າເລີ່ມຜ່ອນຄາຍລົງມາຢູ່ໃນລະດັບ 50% ຖ້າທຽບໃສ່ໃນປີ 2020 ແລະ 2021 ຈາກສະຖິຕິໃນວັນທີ 9 ກຸມພາ 2022 ມີຄົນຕິດເຊື້ອພຽງ 513 ຄົນ ຖືວ່າຫລຸດລົງມາກາຍເຄິ່ງ ຖ້າທຽບໃສ່ມື້ລະ 1.000 ກວ່າຄົນໃນໄລຍະຜ່ານມາ. ສ່ວນໃນອາທິດຜ່ານໆມາກ່ອນໜ້ານັ້ນ ກໍມີຄົນຕິດເຊື້ອຢູ່ໃນລະດັບ 500 , ລົມາ 400 ແລະ ມີບາງມື້ກໍຫຍັບລົງມາຢູ່ໃນອັນດັບ 3 ຮ້ອຍ. ຄາດວ່າໃນອະນາຄົດອັນບໍ່ຍາວໄກ ສະພາບການແພ່ລະບາດຂອງພະຍາດໂຄວິດ-19 ອາດຫລຸດໜ້ອຍລົງ ແລະ ມະຫັບມະຫາຍໄປຕາມການເວລາຈາກສັງຄົມລາວຢ່າງແນ່ນອນ.

ແຕ່ແນວໃດກໍຕາມ, ເຖິງວ່າຈຳນວນຜູ້ຕິດເຊື້ອໄດ້ຫລຸດລົງ, ແຕ່ຜູ້ທີ່ເສຍຊີວິດກໍຍັງມີໃຫ້ເຫັນໃນແຕ່ລະວັນ. ຕົວຢ່າງໃນວັນທີ 9 ກຸມພາ 2022 ຜ່ານມາ ກໍມີຜູ້ເສຍຊີວິດເພີ່ມຕື່ມອີກ 6 ຄົນໃນທົ່ວປະເທດ. ສະຫລຸບແລ້ວ ມາຮອດປັດຈຸບັນມີຜູ້ເສຍຊີວິດສະສົມ 583 ຄົນ ແລະ ຕິດເຊື້ອສະສົມ 137.557 ຄົນ. ຫາກຕັ້ງໂຈດກັນວ່າ, ດ້ວຍສາເຫດໃດ ຈຳນວນຜູ້ຕິດເຊື້ອໂຄວິດ-19 ຈຶ່ງມີທ່າອ່ຽງຫລຸດລົງ. ຕາມການລາຍງານຂອງທ່ານ ດຣ. ສະຫວາດ ສຸດທານິລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ໃຫ້ຮູ້ວ່າ: ສາເຫດທີ່ມີຜູ້ຕິດເຊື້ອໂຄວິດ-19 ຫລຸດລົງ ຍ້ອນວ່າສັງຄົມຫັນໄປກວດຫາເຊື້ອແບບໄວດ້ວຍຕົນເອງ ໂດຍບໍ່ໄດ້ລົງທະບຽນໃຫ້ເຈົ້າໜ້າທີ່ກ່ຽວຂ້ອງຮັບຮູ້ນຳ.

ສ່ວນໃນສາເຫດອື່ນໆຕາມທີ່ຮູ້ ແລະ ເຫັນມາ ເມື່ອແຕ່ລະຄົນຮູ້ວ່າຕົນເອງຕິດເຊື້ອໂຄວິດແລ້ວ ເຂົາກໍກັກຕົວປິ່ນປົວຕົນເອງຢູ່ບ້ານຢູ່ເຮືອນຂອງໃຜມັນ. ນອກນັ້ນ ກໍແມ່ນຄົນສ່ວນຫລາຍໄດ້ສັກວັກຊີນຄົບເຂັມ ແລະ ອັນສຳຄັນທີ່ສຸດ ມາຮອດປັດຈຸບັນ ພວກເຮົາມີຢາປົວ ແລະ ຮູ້ວິທີປິ່ນປົວພະຍາດຊະນິດນີ້ແດ່ແລ້ວ, ຖ້າບໍ່ຈຳເປັນໄປໂຮງໝໍກໍສາມາດປິ່ນປົວດ້ວຍຕົນເອງຢູ່ເຮືອນໃຜເຮືອນມັນ. ຈາກສາເຫດຕ່າງໆທີ່ໄດ້ກ່າວມາຂ້າງເທິງນັ້ນ ຈຶ່ງເຮັດໃຫ້ຄົນລາວເຮົາມີການຕິດເຊື້ອນັບມື້ຫລຸດລົງ. ໃນອະນາຄົດຕໍ່ໜ້າ ໄປຄຽງຄູ່ກັບການຫັນປ່ຽນແບບແຜນການດຳລົງຊີວິດແບບໃໝ່ໃຫ້ຢູ່ກັບພະຍາດຊະນິດນີ້ໄດ້ ທັງສົມທົບກັບມາດຕະການປ້ອງກັນ ສະກັດກັ້ນ ແລະ ແກ້ໄຂພະຍາດໂຄວິດ-19 ຂອງພັກ

ແລະ ລັດຖະບານວາງອອກ ແນ່ນອນພະຍາດຊະນິດນີ້ຕ້ອງມະຫັບມະຫາຍໄປຈາກປະເທດລາວ, ຄົນລາວ ແລະ ສັງຄົມລາວຢ່າງແນ່ນອນ. ເຖິງຢ່າງໃດກໍດີ, ສິ່ງທີ່ໜ້າວິຕົກກັງວົນນັ້ນ ໃນເມື່ອພະຍາດຊະນິດນີ້ອີ່ມຕົວຢູ່ກັບຄົນເຮົາໄດ້ແລ້ວ ພັດຢ້ານພວກມະນຸດໃຈດຳອຳມະຫິດສ້າງເຊື້ອພະຍາດຊະນິດອື່ນໆທີ່ຮ້າຍແຮງຂຶ້ນມາອີກ ເພາະໃນໂລກນີ້ ປະເທດມະຫາອຳນາດສາມາດເຮັດໄດ້ທຸກຢ່າງເພື່ອຜົນປະໂຫຍດ ດ້ວຍການກະຫາຍສົງຄາມຊີວະທຸກຮູບແບບ, ແຕ່ຜູ້ທີ່ຖືກຜົນກະທົບນັ້ນແມ່ນຊາວໂລກຕາດຳໆຕ້ອງມາສັງເສຍຊີວິດໄປຫລາຍລ້ານຄົນ.