ກະຊວງກະສິກຳແລະປ່າໄມ້ຈະປ່ອຍປາຄືນສູ່ແຫລ່ງນໍ້າທໍາມະຊາດໃຫ້ໄດ້ 58 ລ້ານໂຕ

ໃນປີ 2021 ນີ້, ກະຊວງກະສິກຳ ແລະ ປ່າໄມ້ ພ້ອມດ້ວຍຂະແໜງການທີ່ກ່ຽວຂ້ອງ ໄດ້ສົມທົບກັບຄະນະພັກ, ອົງການປົກຄອງທ້ອງຖິ່ນທົ່ວປະເທດ ກະກຽມແຜນການ ແລະ ຂະບວນການປ່ອຍປາ ເພື່ອຄືນຄວາມອຸດົມສົມບູນລົງສູ່ແຫລ່ງນໍ້າທຳມະຊາດ ໃຫ້ໄດ້ 58 ລ້ານໂຕ. ຂະນະທີ່ປີຜ່ານມາ ປ່ອຍປາໄດ້ 55 ລ້ານໂຕ, ໄປຄຽງຄູ່ກັບການປ່ອຍສັດປ່າ ເຊັ່ນ: ນົກ, ສັດເລືອຄານ ແລະ ສັດປະເພດອື່ນໆ ກໍມີຈຳນວນເພີ່ມຂຶ້ນ. ທ່ານ ບຸນປອນ ແສງທອງ ວ່າການຫົວໜ້າກົມປ່າໄມ້ ໄດ້ໃຫ້ສໍາພາດໃນວັນທີ 7 ກໍລະກົດ 2021 ນີ້ວ່າ:

ໃນປີ 2021 ພວກເຮົາໄດ້ສົມທົບກັບຄະນະພັກ, ອົງການປົກຄອງທ້ອງຖິ່ນທົ່ວປະເທດ ກະກຽມແຜນການ ແລະ ຂະບວນການປ່ອຍປາ ເພື່ອຄືນຄວາມອຸດົມສົມບູນລົງສູ່ແຫລ່ງນໍ້າ ໃຫ້ໄດ້ 58 ລ້ານໂຕ. ພ້ອມກັນນີ້, ກົມປ່າໄມ້ ຮ່ວມກັບສູນພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ ສົມ ທົບກັບພາກສ່ວນທີ່ກ່ຽວຂ້ອງ, ພະແນກການ ແລະ ສູນຝຶກອົບຮົມປ່າໄມ້ (ຫ້ວຍປ່າມ້ອມ) ທີ່ຂຶ້ນກັບກົມປ່າ ໄມ້ ຈະໄດ້ຮ່ວມກັນຈັດພິທີປ່ອຍປາ ເນື່ອງໃນໂອກາດວັນປ່ອຍປາ ແລະ ອະນຸລັກສັດນ້ຳ ແລະ ສັດປ່າແຫ່ງຊາດໃນວັນທີ 13 ກໍລະກົດ ທີ່ຈະມາເຖິງນີ້ ທີ່ສູນຝຶກອົບຮົມປ່າໄມ້ (ຫ້ວຍປ່າມ້ອມ), ເມືອງຫີນເຫີບ, ແຂວງວຽງຈັນ ຈຳນວນ 50.000 ໂຕ.

ໃນນັ້ນ, ປາປາກ 20.000 ໂຕ, ປາໃນ 15.000 ໂຕ ແລະ ປານວນຈັນ 15.000 ໂຕ. ໂອກາດນີ້, ທ່ານ ບຸນປອນ ແສງທອງ ຍັງໄດ້ຮຽກຮ້ອງມາຍັງພາກສ່ວນຕ່າງໆ ທັງພາກລັດ ແລະ ເອກະຊົນ ທົ່ວສັງຄົມ ຈົ່ງພ້ອມກັນຮ່ວມແຮງຮ່ວມໃຈຄຸ້ມຄອງ, ປົກປັກຮັກສາ ແລະ ພັດທະນາສັດນໍ້າສັດປ່າໃຫ້ຫລາຍຂຶ້ນ ແນໃສ່ເພີ່ມຄວາມອຸດົມສົມບູນທາງດ້ານຊະນິດພັນ ແລະ ຈໍານວນປະຊາກອນຂອງສັດນໍ້າ ແລະ ສັດປ່າ ທີ່ເປັນມໍລະດົກທາງທໍາມະຊາດໃຫ້ໄດ້ຮັບການປົກປັກຮັກສາ, ຊົມໃຊ້ຍືນນານ ແລະ ເປັນມູນມໍລະດົກຕົກທອດເຊັ່ນລູກເຊັ່ນຫລານ ຂອງພວກເຮົາຕະຫລອດໄປ.