ຜົວຄຽດໃຫ້ເມຍເລີຍຄາດຕະກຳລູກສາວ

ພາຍຫຼັງທີ່ເຈົ້າໜ້າທີ່ໄດ້ກັກຕົວ ແລະ ສືບສວນ, ຜູ້ກໍ່ເຫດໄດ້ສາລະພາບວ່າ: ໄດ້​ລົງ​ມື​ຄາດ​ຕະ​ກຳ​ລູກ​ສາວ​ຂອງ​ຕົນ​ເອງ​ແທ້ ໂດຍ​ໄດ້​ໃຊ້​ກ້ອນ​ຫີນ​ໜັກ​ປະ​ມານ 3 ກິ​ໂລໂຍນ​ຖິ້ມ​ໃສ່​ຫົວ​ລູກ​ສາວ​ຈຳ​ນວນ 1 ບາດ, ແລ້ວ​ທຸບ​ຊ້ຳ​ອີກ 2 ບາດ ເຮັດ​ໃຫ້​ມີ​ເລືອດ​ໄຫຼ​ອອກຫົວ​ເປັນ​ຈຳ​ນວນ​ຫຼາຍ​ຈຶ່ງ​ເຮັດ​ໃຫ້​ລູກສາວ​​ເສຍ​ຊີ​ວິດ​. ສາເຫດທີ່ຄາດຕະກໍາລູກໃນຄັ້ງນີ້ຍ້ອນວ່າຜູ້ກ່ຽວເມົາຢາບ້າ ແລະ ຄຸມສະຕິຕົວເອງບໍ່ຢູ່ ເພາະກ່ອນໜ້າມື້ຄາດຕະກໍາ 1 ວັນ ຜູ້​ກ່​ຽວ​ມີ​ອາ​ການ​ຫຼອນ​ຮູ້​ສຶກ​ຢ້ານ​ກົວ​ຄົນ​ຢູ່​ອ້ອມ​ຂ້າງ​ເຮືອນ​ລົມ​ກັນ​ແຮງ​ກໍ່​ຮູ້​ສຶກວິ​ຕົກ​ກັງ​ວົນ​ຄິດ​ວ່າ​ເຂົາ​ເຈົ້າ​ເວົ້າ​ຈົ່ມ​ຂັວນ​ຈຶ່ງ​ບໍ່​ສາ​ມາດ​ຢູ່​ເຮືອນ​ໄດ້, ເວ​ລາ​ປະ​ມານ 19-20 ໂມງຂອງ​ມື້​ດຽວ​ກັນ​ຜູ້ກ່ຽວ​ໄດ້​ຄອບ​ລູກ-ເມຍ ແລ້ວ​ເອົາ​ຕົວ​ໜີ​ເຂົ້າ​ສວນ​ຢາງ​ພາ​ລາ

ໂດຍ​ບໍ່​ຮູ້​ສຶກ​ຢາກ​ຫຼັບ​ຢາກນອນ​ຍ່າງ​ໄປ​ເລື້ອຍໆ​ຈົນ​​​ຮຸ່ງ​ເຊົ້າ​ຂອງມື້ຕໍ່ມາ ຜູ້​ກ່ຽວ​ໄດ້​ຍ່າງ​ເຂົ້າ​ໄປ​ບ້ານ ບວກ​ຄຸ ເຫັນ​ຄົນ​ຢືນ​ລົມ​ກັນ​ຢູ່​ກາງ​ບ້ານ​ຈຳ​ນວນ​ຫຼາຍ​ຄົນ ແລ້ວ​ຊາວ​ບ້ານ ບວກ​ຄຸ ກໍ່​ຖາມ​ຜູ້​ກ່ຽວ​ວ່າ​ໄປ​ໃສ​ມາ ທ້າວ​ ລໍ​ເຢີ ຈຶ່ງ​ຕອບ​ວ່າ: ຊາວ​ບ້ານ ປ່າ​ຜຸກ ​ໄລ່​ຈັບ​ຕົນເອງ​ຈຶ່ງ​ບໍ່​ສາ​ມາດ​ຢູ່​ເຮືອນ​ໄດ້​ ຈຶ່ງ​ເອົາ​ຕົວ​ຫຼົບ​ໜີ​ອອກ​ຈາກ​ບ້ານ​ມາ, ໃນ​ເວເວລາທີ່ກຳ​ລັງ​ລົມ​ກັນ​ຢູ່ນັ້ນ​ປະ​ມານ 11 ໂມງ ຜູ້ກ່ຽວ​ໄດ້​ເຫັນ​ລູກ​ສາວ​ຂອງ​ຕົນ​ເອງ ( ຜູ້​ເສຍ​ຊີ​ວິດ ) ພ້ອມກັບ​ໝູ່​ອີກ 3 ຄົນ​ຍ່າງ​ເຂົ້າ​ມາ​ແລ້ວ​ຢຸດ​ຢູ່​ຫົວ​ດອຍ​ຫ່າງ​ຈາກ​ບ່ອນ​ຕົນ​ເອງ​ຢູ່​ປະ​ມານ 70 ແມັດ ​ນາງ ເຢີ​ແມ໋ວ ເອີ້ນບອກ​ໃຫ້​​ຜູ້​ກ່ຽວ​ກັບ​ໄປ​ເຮືອນ ຈາກນັ້ນ​ ທ້າວ ລໍ​ເຢີ ໄດ້​ຍ່າງ​ໄປ​ຫາ​ລູກ​ສາວ​ຂອງ​ຕົນ​ເອງ​ແລ້ວ​ຖາມ​ວ່າ: ແມ່​ຄື​ບໍ່​ມາ ລູກ​ສາວ​ຕອບ​ວ່າ :

ແມ່​ກໍ່​ໄປ​ຊອກ​ອີ່​ພໍ່​ຢູ່​ປ່າ​ພຸ້ນ​ບໍ່​ກັບ​ມາ​ເທື່ອ ເວ​ລານັ້ນ​ຜູ້ກ່ຽວ​ຮູ້​ສຶກວິນ​ຫົວ​ໃຈ​ຮ້າຍ​ຂຶ້ນ​ມາ​ທັນ​ທີ​ຈົນ​ເຮັດ​ໃຫ້​ຄຸມ​ອາ​ລົມ​ຕົນ​ເອງ​ບໍ່​ໄດ້​ ຈຶ່ງ​ໄດ້​ລົງ​ມື​ຄາດ​ຕະ​ກຳ​ລູກ​ສາວ​ຂອງ​ຕົນ​ເອງ​ໃນ​ເວລາ​ທີ່​ລູກ​ສາວ​ນັ່ງ​ກົ້ມ​ໜ້າ​ຢູ່. ພາຍຫຼັງທີ່ຄາດຕະກໍາລູກແລ້ວ, ຜູ້ກ່ຽວ​ໄດ້​ເອົາ​ຕົວ​ຫຼົບ​ໜີ​ແແລ່ນເຂົ້າສວນຢາງ​ພາ​ລາ ແລ້ວ​ ປກ​ສ​ ບ້ານ ບວກ​ຄຸ ຈຶ່ງ​ໄລ່​ຈັບ​ໃຊ້​ເວ​ລາ​ປະ​ມານ 01 ຊົ່ວ​ໂມງ​ຈຶ່ງ​ສາ​ມາດ​ຄຸມ​ຕົວ​ຜູ້ກ່ຽວ​ໄດ້. ຜ່ານ​ມາຜູ້​ກ່ຽວ​​ແມ່ນ​ມີ​ປະ​ຫວັດ​ການ​​ເສບ​ຢາ​ບ້າ​ມາ​ແຕ່​ປີ 2007 ແລະ ປັດ​ຈຸບັນທາງເຈົ້າໜ້າທີ່ສືບ​ສວນ-ສອບ​ສວນ​ຄະ​ດີ​ອາ​ຍາ​ ປກ​ສ ເມືອງ​ສິງ ໄດ້​ສົ່ງ​ຜູ້ກ່ຽວ​ໃຫ້​ທາງ ກອງ​ບັນ​ຊາ​ການ ປກ​ສ ແຂວງ ສືບ​ຕໍ່​ດຳ​ເນີນ​ຄະ​ດີ​ຕາມ​ລະ​ບຽບ​ກົດ​ໝາຍ.