ກົມໃຫຍ່ຕໍາຫຼວດເລັ່ງແກ້ໄຂບັນຫາຢາເສບຕິດ

ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຕ່ປີ 2022 ຫາ ປີ 2023 ນີ້, ກົມໃຫຍ່ຕໍາຫຼວດ ກະຊວງ ປກສ ຈະສຸມໃສ່ 1 ແຜນງານ, 2 ແຜນຍຸດທະສາດ, 17 ວຽກຈຸດສຸມເພື່ອແກ້ໄຂບັນຫາຢາເສບຕິດໃນຂອບເຂດ ທົ່ວປະເທດ. ທ່ານ ພົຈວ ນີລະວົງ ເຈືອງຕະວະລາດ ຮອງຫົວໜ້າກົມໃຫຍ່ຕຳຫຼວດໄດ້ກ່າວທີ່ກອງປະຊຸມເປີດ ກວ້າງ ຄະນະພັກກົມ ໃຫຍ່ຕຳຫຼວດທີ່ໄດ້ຈັດຂຶ້ນເມື່ອມໍ່ໆມານີ້ວ່າ: ເພື່ອຜັນຂະຫຍາຍວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດແຕ່ນີ້ ຫາ ປີ 2023 ນີ້ຢ່າງມີຈຸດສຸມ ແລະ ໃຫ້ເປັນຮູບປະທຳ ຈະມີການປັບປຸງວຽກງານກໍ່ສ້າງ-ນຳໃຊ້ຕາໜ່າງພື້ນຖານລັບ, ສະຖານທີ່ພົບປະລັບເພື່ອນຮ່ວມງານ, ຜູ້ເຊື່ອຖືໄດ້ເພື່ອເກັບກຳຂ່າວ, ຄຸ້ມຄອງເປົ້າໝາຍ, ປະເພດຕ່າງໆ, ຊຸກຍູ້ດຳເນີນຄະດີໃຫ້ຖືກຕ້ອງ ຕາມຂະບວນການຍຸດຕິທຳຂອງກົດໝາຍ, ກຳໃຫ້ໄດ້ເປົ້າໝາຍຄ້າ-ຂາຍ, ລັກລອບ-ຂົນສົ່ງຢາເສບຕິດ ຕາມດ່ານຊາຍແດນທີ່ຕິດຈອດທີ່ເຂົ້າມາເຄື່ອນໄຫວກະ ທຳຜິດຢູ່ພາຍໃນປະເທດ, ປະສານສົມທົບສາຍຕັ້ງວິຊາສະເພາະກັບຕຳຫຼວດ ປກສ ແຂວງ, ນະຄອນຫຼວງວຽງຈັນ,

ນຳພາການແກ້ໄຂບັນຫາສະພາບປະກົດການຫຍໍ້ທໍ້ ທີ່ເກີດຂຶ້ນໃນສັງຄົມໃຫ້ຫຼຸດລົງຢ່າງຈະແຈ້ງ ແລະ ເອົາໃຈໃສ່ປັບປຸງການດຳເນີນຄະດີ ໃຫ້ຖືກຕ້ອງສອດຄ່ອງກັບກົດລະບຽບ, ກົດໝາຍຢ່າງເຂັ້ມງວດ. ທ່ານ ພົຈວ ນີລະວົງໄດ້ກ່າວຕື່ມອີກວ່າ: ໃນປີ 2021 ທີ່ຜ່ານມາອັນພົ້ນເດັ່ນໃນການຈັດຕັ້ງຜັນຂະຫຍາຍຍຸດທະສາດ ຕ້ານຢາເສບຕິດ ມາເປັນວ່າລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຕ່ປີ 2021-2023. ໃນປີ 2021 ທີ່ຜ່ານມາ, ການຈັດຕັ້ງປະຕິບັດວາລະດັ່ງກ່າວໄດ້ສຸມໃສນໍາພາການດໍາເນີນແກ້ໄຂຄະດີຕາມກົດໝາຍ ແລະ ຫຼັກການວິຊາສະເພາະ ນຳພາມ້າງຄະດີກຸ່ມແກ້ງຄ້າ-ຂາຍຢາເສບຕິດລາຍໃຫຍ່ ຈຳນວນ 3.407 ລາຍ, ມີ ຜູ້ຕ້ອງຫາ 4.759 ຄົນ (ຍິງ 484 ຄົນ), ສາມາດຢຶດຂອງກາງປະເພດຢາບ້າໄດ້ 5.896,84 ກິໂລ, ເຮໂຣອິນ 21,9 ກິໂລ, ຍາອີ 4,4g, ໄອສ໌ 1.566,9 ກິໂລ, ຝິ່ນ 900 ກຣາມ, ແປ້ງ 179,30 ກິໄລ, ລົດຈັກ 6 ຄັນ, ລົດໃຫຍ່ 8 ຄັນ ແລະ ອື່ນໆ ພ້ອມທັງໄດ້ຂຶ້ນບັນຊີເປົ້າໝາຍ ເຄື່ອນໄຫວຄ້າຂາຍຢາເສບຕິດລາຍໃຫຍ່ 1.888 ຄົນ (ຍິງ 173 ຄົນ).