ເມືອງຫ້ວຍຊາຍແຂວງບໍ່ແກ້ວຈັດພິທີປ່ອຍປາລົງສູ່ແມ່ນ້ຳທຳມະຊາດ

ເນື່ອງໃນໂອກາດວັນອານຸລັກ ສັດນ້ຳ-ສັດປ່າ ແລະ ວັນປ່ອຍປາແຫ່ງຊາດປະຈຳປີ 2021. ການປົກປັກຮັກສາ ສັດນ້ຳ – ສັດປ່າ ແມ່ນພັນທະຂອງປວງຊົນລາວທັງຊາດ ວັນທີ 13 ກໍລະກົດນີ້, ເມືອງຫ້ວຍຊາຍ ສົມທົບກັບ ພະແນກກະສິກຳ ແລະ ປ່າໄມ້ແຂວງບໍ່ແກ້ວ, ຫ້ອງການກະສິກຳ ແລະ ປ່າໄມ້ເມືອງ ຈັດພິທີປ່ອຍປາລົງສູ່ທຳມະຊາດ ຢູ່ເຂດວັງສະຫງວນສັດນ້ຳ ບ້ານ ໜອງຄຳ ໃນວັນທີ 13 ກໍລະກົດນີ້, ເຂົ້າຮ່ວມມີທ່ານ ທິບພະກອນ ມະນີຄຳ ຮອງເຈົ້າເມືອງຫ້ວຍຊາຍ ຜູ້ຊີ້ນຳຂົງເຂດວຽກງານເສດຖະກິດ. ທ່ານ ໂພສີແກ້ວ ໄຊຍະຈັກ ຮອງຫົວໜ້າພະແນກກະສິກຳ ແລະ ປ່າໄມ້ແຂວງບໍ່ແກ້ວມີບັນດາພະນັກງານຫຼັກແຫຼ່ງ, ພະນັກງານນຳພາຂອງແຂວງ, ເມືອງ, ຄະນະພັກຮາກຖານ, ອົງການປົກຄອງບ້ານ, ພະນັກງານວິຊາການ, ພາກສວ່ນກ່ຽວຂ້ອງ ຕະຫຼອດຮອດປະຊາຊົນເຂົ້າຮ່ວມ.

ທ່ານ ທິບພະກອນ ມະນີຄຳ ໄດ້ໃຫ້ຮູ້ເຖິງຈຸດປະສົງຂອງການຈັດພິທີວ່າ: ການຈັດພິທີປ່ອຍປາຄືນສູ່ທຳມະຊາດຄັ້ງນີ້ ເພື່ອສືບຕໍ່ປົກປັກຮັກສາອານຸລັກ ສັດນ້ຳ-ສັດປ່າ ແລະ ເພີ້ມປະຊາກອນສັດນ້ຳໃຫ້ມີຄວາມອຸດົມສົມບູນ ນັບມື້ນັບຫຼາຍຂື້ນ ທັງເປັນການປູກຈິດສຳນຶກໃຫ້ແກ່ນັກທຸລະກິດ ພໍ່ຄ້າ-ຊາວຂາຍ ແລະ ພໍ່ແມ່ປະຊາຊົນບັນດາເຜົ່າ ໄດ້ຮັບຮູ້ເຂົ້າໃຈເຖິງ ຄວາມໝາຍຄວາມສຳຄັນຂອງວັນອານຸລັກສັດນ້ຳ-ສັດປ່າ ແລະ ວັນປ່ອຍປາແຫ່ງຊາດ ໃນການສ້າງຄວາມສົມດຸນທາງດ້ານສະບຽງອາຫານ, ຊີວະນາໆພັນໃຫ້ຢູ່ຄູ່ກັບທຳມະຊາດ ກໍ່ຄື ລະບົບນິເວດຕະຫຼອດໄປ.

ເພື່ອສະເຫຼີມສະຫຼອງວັນຄ້າຍວັນເກີດຂອງ ທ່ານປະທານ ສຸພາ ນຸວົງ ອະດີດປະທານປະເທດແຫ່ງ ສປປ ລາວ ຄົບຮອບ 112 ປີ ແລະ ຂໍ່ານັບຮັບຕ້ອນວັນສໍາຄັນຕ່າງໆຂອງຊາດ ພ້ອມທັງກ່າວເປີດພິທີປ່ອຍປາຢ່າງເປັນທາງການ. ຈາກນັ້ນ, ບັນດາຜູ້ເຂົ້າຮ່ວມພິທີໄດ້ພ້ອມກັນປ່ອຍ ປາກິນຫຍ້າ ແລະ ປາປາກ ທັງໝົດ 30 ກວ່າພັນໂຕ ໂດຍແມ່ນທຶນຊ່ວຍເຫຼືອລ້າຈາກໂຄງການ ຊີບີເອບ ປະຈຳແຂວງບໍ່ແກ້ວລົງສູ່ເຂດວັງສະຫງວນບ້ານໜອງຄຳ ມີຄວາມຍາວ 800 ກວ່າແມັດ ພ້ອມທັງ ທຳລາຍອາວຸດລ່າເນື້ອຈຳນວນ 60 ກະບ່ອກ ຢ່າງເປັນຂະບວນຟົດຟືນ. ພ້ອມຄະນະນຳຫ້ອງການກະສິກຳ ແລະ ປ່າໄມ້ເມືອງ. ໄດ້ລົງຕິດຕາມການປິ່ນປົວພະຍາດປາກເປື່ອຍລົງເລັບຂອງງົວ,

ຄວາຍຢູ່ເຂດບ້ານສີໂພໄຊອີກດ້ວຍ. ໂອກາດນີ້, ທ່ານ ອານຸສັກ ສີລິວົງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄດ້ກ່າວວ່າຈະສືບຕໍ່ປຸກລະດົມຊຸກຍູ້ ໃຫ້ນັກທຸລະກິດ, ພໍ່ຄ້າ-ຊາວຂາຍ ແລະ ປະຊາຊົນປ່ອຍປາລົງສູ່ແຫຼ່ງນ້ຳທຳມະຊາດ, ວັງສະຫງວນ, ໜອງປາ ແລະ ກະຊັງລ້ຽງປາໃຫ້ໄດ້ 3 ລ້ານໂຕໃນປີ 2021 ເພື່ອເປັນການເສີມຂະຫຍາຍທາງດ້ານສະບຽງອາຫານ, ປົກປັກຮັກສາພັນປາທີ່ໃກ້ຈະສູນພັນ ແລະ ສ້າງຄວາມຍືນຍົງໃຫ້ແກ່ວິຖີຊີວິດຂອງຊາວປະໂມງແບບທຳມະຊາດໄວ້ໝັ້ນຄົງ