ມີ169ບໍລິສັດທີ່ເຂົ້າມາຈົດທະບຽນລົງທຶນຢູ່ເຂດເສດຖະກິດພິເສດ ນວ ມີທຶນຈົດທະບຽນ567ລ້ານໂດລາ

ທ່ານ ທະນົງໄຊ ຄຸດໄພທູນ ຫົວຫນ້າຄະນະຄຸ້ມຄອງເຂດເສດຖະກິດພິເສດ ນວ ໃຫ້ສໍາພາດກ່ຽວກັບການຄຸ້ມຄອງບັນດາເຂດເສດຖະກິດ ພິເສດ ວ່າ ປັດຈຸບັນ ການລົງທຶນຂອງນັກລົງທຶນຕ່າງປະເທດເຂົ້າມາລົງທຶນຢູ່ປະເທດລາວ ໂດຍສະເພາະຢູ່ ນວ ໃນຂະແຫນງການຕ່າງໆນັບມື້ຫຼາຍຂຶ້ນຄື ເຂດພັດທະນາກວມລວມໄຊເຊດຖາ ສ້າງຕັ້ງໃນປີ 2010 ເນື້ອທີ່ 1000 ເຮັກຕາ ໄລຍະເວລາ ປະທານ 70 ປີ ແລະ ສາມາດຕໍ່ໄດ້ຕາມການຕົກລົງຂອງລັດຖະບານ ຜູ້ພັດທະນາລັດຖະບານ 25% ລັດວິສາຫະກິດ (ຈີນ) 75% ບໍລິສັດຮ່ວມທຶນລາວ-ຈີນ ຈໍາກັດ. ເຂດດັ່ງກ່າວ, ໄດ້ພັດທະນາເປັນເຂດອຸດສາຫະກໍາ ການຄ້າການບໍລິການ ແລະ ທ່ອງທ່ຽວ

ປະກອບດ້ວຍກິດຈະການຕ່າງ ໆເຊັ່ນ ເຂດແປຮູບກະສິກໍາ (ຜະລິດຕະພັນອາຫານ ຜະລິດຕະພັນປອດສານພິດ ແລະ ຫົວອາຫານສັດ, ເຂດປຸງແຕ່ງຜະລິດຕະພັນກະສິກໍາ ເຂດອຸດສາຫະກໍາເບົາ ເພື່ອສົ່ງອອກ ຂະແຫນງແປຮູບໄມ້ ເຂດການຜະລິດເຄື່ອງອຸປະກອນ ເຄື່ອງຈັກ ເຄື່ອງໄຟຟ້າເອເລັກໂຕຣນິກ ພະລັງງານ ສີຂຽວ ຕໍ່າແຜ່ນ ແລະ ເສື້ອຜ້າ ສູນກາງການຂົນສົ່ງ Logistics ເຂດທີ່ຢູ່ອາໄສ ເຂດທີ່ພັກລະດັບສູງ ພັກພະນັກງານ ວັດທະນະທໍາ ການສຶກສາ ແລະ ສາທາລະນະສຸກ ທ່ອງທ່ຽວ ເຂດເສດຖະກິດພິເສດບຶງທາດຫຼວງສ້າງຕັ້ງໃນປີ 2011 ເນື້ອທີ່ດິນ 365 ເຮັກຕາ ໄລຍະເວລາສໍາປະທານ 99 ປີ ຜູ້ພັດທະນາ ບໍລິສັດ ຫວ້ານເຟີ້ງ ຊຽງໄຮ ເອກະຊົນຈີນ (100%)

ເປັນໂຄງການພັດທະນາເປັນເຂດຕົວເມືອງໃຫມ່ ການຄ້າ ການບໍລິການ ການທ່ອງທ່ຽວ ຕິດພັນກັບວັດທະນະທໍາຂອງລາວ ສ້າງເປັນຕົວເມືອງທ່ອງທ່ຽວຫນອງນ້ໍາທໍາມະຊາດທີ່ຕິດພັນກັບການປົກປັກຮັກສາສິ່ງແວດລ້ອມ ປະກອບມີຫນອງນໍ້າໃຫຍ່ 50 ເຮັກຕາ ມີບ່ອນຍ່າງຊົມທີວທັດທີ່ສວຍງາມ ສ້າງສູນການຄ້າ ທີ່ພັກອາໄສ ຄອນໂດ ສໍານັກງານຫ້ອງການ ຮ້ານຄ້າ ຮ້ານອາຫານ ທະນາຄານ ສະຖາບັນການເງິນ ໂຮງແຮມ ໂຮງຮຽນ ແລະ ໂຮງຫມໍທີ່ທັນສະໄຫມ, ເຂດເສດຖະກິດພິເສດ ລ່ອງແທ່ງ-ວຽງຈັນ ສ້າງຕັ້ງໃນປີ 2012 ເນື້ອທີ່ 560 ເຮັກຕາ ໄລຍະເວລາສໍາປະທານ 99 ປີ ຜູ້ພັດທະນາ ບໍລິສັດ KN ວຽງຈັນກຣຸບ ເອກະຊົນຫວຽດນາມ 100% ເປັນໂຄງການພັດທະນາເປັນເຂດບໍລິການການທ່ອງທ່ຽວຕິດພັນກັບສະຫນາມກ໋ອຟ ແລະ ທີ່ພັກອາໄສ ເຮືອນວີນລາລະດັບສູງ ໂຄງການກໍ່ສ້າງສະຫນາມກ໋ອຟ 36 ຫຼຸມໂຄງການກໍ່ສ້າງວິນລາລະດັບສູງ ອະສັງຫາລິມະຊັບ ທີ່ພັກອາໄສ ແລະ ເຂດພັກຜ່ອນກິລາ ໂຄງການກໍ່ສ້າງໂຮງແຮມລະດັບ 5 ດາວ ໂຄງການກໍ່ສ້າງເຂດການຄ້າສາກົນ ໂຄງການກໍ່ສ້າງໂຮງຮຽນນານາຊາດ ໂຄງການກໍ່ສ້າງໂຮງຫມໍລະດັບສາກົນ ໂຄງການກໍ່ສ້າງສູນອອກກໍາລັງກາຍ ແລະ ກິລາ ການທ່ອງທ່ຽວ.

ເຂດເສດຖະກິດພິເສດ ດົງໂພສີ ສ້າງຕັ້ງໃນປີ 2009 ເນື້ອທີ່ດິນ 51 ເຮັກຕາ ໄລຍະເວລາສໍາປະທານ 50 ປີ ຜູ້ພັດທະນາ ບໍລິສັດ UPL ຈໍາກັດ ເອກະຊົນ ປະເທດມາເລເຊຍ ເປັນໂຄງການພັດທະນາເປັນເຂດການຄ້າ ການບໍລິການເຂດການຄ້າຄື shopping centers ໂຮງແຮມ ສິ່ງ ອໍານວຍຄວາມສະດວກທາງດ້ານການຄ້າ-ສູນການແພດພິເສດ ສະຖາບັນການສຶກສາ ສາງສິນຄ້າ ຫ້ອງວາງສະແດງສິນຄ້າພາຍໃນ ແລະ ຕ່າງ ປະເທດ ເຂດການຄ້າຂາຍສົງ ທະນາຄານ ໂຮງຫມໍທັນສະໄຫມ ແລະ ຫ້ອງປະຊຸມລະດັບສາກົນ. ສ່ວນເຂດໂລຈິສຕິກ ນວ ສ້າງຕັ້ງໃນປີ 2020 ເນື້ອທີ່ 382 ເຮັກຕາ ໄລຍະເວລາສໍາປະທານ 50 ປີ ຜູ້ພັດທະນາ ບໍລິສັດ ວຽງຈັນໂລຈິສຕິກ ພາກ ຈໍາກັດ ເອກະຊົນພາຍໃນລົງທຶນຝ່າຍດຽວ 100% ໂດຍພັດທະນາເປັນເຂດໂລຊິດສະຕິກປະກອບດ້ວຍຫຼາຍກິດຈະການຄື ກິດຈະການ ທ່າບົກ ບໍລິການແຈ້ງພາສີນໍາເຂົ້າ-ສົ່ງອອກ ແລະ ບໍລິການສິນຄ້າຜ່ານແດນທຸກປະເພດ ບໍລິການຖ່າຍລໍາພາຫະນະເຕົ້າໂຮມ ແລະ ແຈກຍາຍ ສິນຄ້າ ສາງເກັບມ້ຽນສິນຄ້າ ຍົກຍໍ-ຄ່ຽນຖ່າຍ ແລະ ບໍລິການຕູ້ສິນຄ້າ ກິດຈະການເຂດໂລຈິສຕິກ ປະກອບມີ ຫ້ອງການ ບໍລິຫານ ແລະ ບໍລິການສໍາລັບເຈົ້າຫນ້າທີ່ເຮັດວຽກ-ບໍລິການລູກຄ້າ ແລະ ໃຫ້ເຊົ່າ ສະຖານີຂົນສົ່ງສິນຄ້າ ເຂດປອດພາສີ (Free Zone) ລວມມີ ເຂດຜະລິດ ແລະ

ປຸງແຕ່ງສິນຄ້າເພື່ອສົ່ງອອກ ລານຕູ້ສິນຄ້າເຢັນ ລານສິນຄ້າເປົ່າ ຕູ້ສິນຄ້າທົ່ວໄປ ສະຖານີຂົນສົ່ງສິນຄ້າທາງລົດໄຟ ລາວ-ຈີນ ສະຖານີ້ ຂົນສົ່ງສິນຄ້າທາງລົດໄຟ ລາວ-ໄທ ເຂດເກັບສິນຄ້າເປັນທາດແຫຼວ ສະຫນາມຈອດລົດຂົນສົ່ງ ສູນສ້ອມແປງ ແລະ ອະນາໄມຕູ້ ບໍລິການປິ່ນ ອ້ອມອື່ນໆເຊັ່ນ: ຫົວຫນ່ວຍທຸລະກິດທະນາຄານປິ່ນອ້ອມ ບັນດາບໍລິສັດຂົນສົ່ງ ຫ້ອງພັກຄົນຂັບລົດ ຮ້ານອາຫານ ແລະ ອູ່ສ້ອມແປງລົດ. ປັດຈຸບັນ ມີບໍລິສັດທີ່ເຂົ້າມາຈົດທະບຽນລົງທຶນທັງຫມົດ 169 ບໍລິສັດ ມີທຶນຈົດທະບຽນ 567 ລ້ານໂດລາສະຫະລັດ ແຜນລົງທຶນທັງຫມົດ ປະມານ 6 ຕື້ໂດລາສະຫະລັດ ແລະ ມີມູນຄ່າການລົງທຶນຕົວຈິງ 2,8 ຕື້ໂດລາສະຫະລັດ ປະຕິບັດພັນທະໃຫ້ແກ່ລັດຖະບານໄດ້ທັງຫມົດ 165 ຕື້ກີບ ສ້າງວຽກເຮັດງານທໍາໄດ້ 5.969 ຕໍາແຫນ່ງງານ ໃນນັ້ນແຮງງານລາວ 4.726 ຄົນ ແລະ ແຮງງານຕ່າງປະເທດ 1.243 ຄົນ ການນໍາເຂົ້າ ສົ່ງອອກມີມູນຄ່າປະມານ 2,7 ຕື້ໂດລາສະຫະລັດ ແລະ ມີມູນຄ່າການສົ່ງອອກສິນຄ້າປະມານ 163 ລ້ານໂດລາສະຫະລັດ ແລະ ນັກລົງທຶນ ່ ສ່ວນໃຫຍ່ແມ່ນມາຈາກ ສປ ຈີນ ໄທ ສິງກະໂປ ຫວຽດນາມ ຍີ່ປຸ່ນ ມາເລເຊຍ ແລະ ອື່ນໆ.