ແຈັກກີ້ ຄອນສະຫວັນ ແກ້ວໜູຈັນ ຖືກຄັດເລືອກໄປຝຶກຊ້ອມເຕະບານລະດັບອາຊີບ

ນ້ອງ ແຈັກກີ້ ຄອນສະຫວັນ ແກ້ວໜູຈັນ ກອງກາງທີມຊາດລາວ U19 ຊຸດປະຫວັດສາດ ໄດ້ຮອງແຊ້ມອາຊຽນ 2022 ຖືກຄັດເລືອກຈາກສະຖາບັນກິລາບານເຕະອິຕາລີ ໄປຝຶກຊ້ອມເຕະບານລະດັບອາຊີບ.

ຄອນສະຫວັນ ແກ້ວຫນູຈັນ ກອງກາງ ໄວ 18 ປີ ຈາກສະໂມສອນ ຊ້າງນ້ອຍ ເອຟຊີ ທີມແຊ້ມ ລາວລີກ 1 ປີ 2022 ແລະ ທີມຊາດລາວ ຮຸ່ນອາຍຸບໍ່ເກີນ 19 ປີ ໄດ້ຜ່ານການຄັດເລືອກຈາກສະຖາບັນກິລາບານເຕະປະເທດອີຕາລີ (ໂຣມ ຊີຕີ້ ເອັສຊີ Rome City SC) ເພື່ອໄປຝຶກຊ້ອມເຕະບານລະດັບອາຊີບ ຢູ່ປະເທດອີຕາລີ ເປັນເວລາ 4 ປີ ຄຽງຄູ່ກັບການຮຽນຕໍ່ລະດັບປະລິນຍາຕີ ແລະ ປະລິນຍາໂທ ດ້ານກິລາບານເຕະ.

ກ່ອນຫນ້ານີ້ ຄອນສະຫວັນ (ແຈັກກີ້) ໄດ້ເຄີຍໄປຝຶກຊ້ອມຢູ່ສູນຝຶກກິລາບານເຕະ ຢູ່ປະເທດຝຣັ່ງ ແຕ່ປີ 2018 ຫາປີ 2020 ໂດຍສັງກັດ ທີມ U15 ແລະ U16 ຂອງສະໂມສອນ AS Cannes ແລະ ສະໂມສອນ AS Monaco ໄດ້ແຂ່ງຂັນໃນລາຍການ Regional French Championship.

ດັ່ງນັ້ນ, ສະຖາບັນກິລາບານເຕະອີຕາລີ ຈຶ່ງໄດ້ຄັດເລືອກ ແລະ ໃຫ້ໂອກາດໄປສືບຕໍ່ພັດທະນາເປັນນັກເຕະລະດັບອາຊີບຢູ່ອີຕາລີ.

ຄອນສະຫວັນ ຮັບໃຊ້ທີມຊາດລາວມາຫລາຍຮຸ່ນອາຍຸ ຕັ້ງແຕ່ຊຸດເຍົາວະຊົນ U15 ປີ 2018, U16 ປີ 2019, U19 ປີ 2020, U23 ປີ 2022 ແລະ U19 ປີ 2022 ຢູ່ໃນຊຸດສ້າງປະຫວັດສາດ ໄດ້ອັນດັບ 2 ຊີງແຊ້ມອາຊຽນ.

ຂໍອວຍໃຫ້ ຄອນສະຫວັນ ແກ້ວໜູຈັນ ປະສົບຜົນສຳເລັດໃນເສັ້ນທາງການເປັນນັກກິລາບານເຕະອາຊີບ ຢູ່ປະເທດອີຕາລີ ແລະ ນຳເອົາຄວາມຮູ້ຄວາມສາມາດ ລວມທັງປະສົບການຝຶກຊ້ອມ ແລະ ແຂ່ງຂັນ ຢູ່ປະເທດອີຕາລີ ໃນ 4 ປີຂ້າງໜ້າ ເພື່ອກັບຄືນມາປະກອບສ່ວນພັດທະນາກິລາບານເຕະລາວຂອງລາວເຮົາໃຫ້ເຂັ້ມແຂງຂື້ນໄປເທື່ອລະກ້າວ. ຄອນສະຫວັນ ຈະເດີນທາງໄປທີ່ປະເທດອີຕາລີ ໃນກາງເດືອນກັນຍາ ທີ່ຈະມາເຖິງນີ້.