ເຂດພັດທະນາເສດຖະກິດໃໝ່ສີທັນດອນຄືບໜ້າຢ່າງວ່ອງໄວ

ໃນໄລຍະນີ້, ທ່ານໃດໄດ້ເດີນທາງໄປເຂດສີພັນດອນ ເມືອງໂຂງ ແຂວງຈໍາປາສັກ ຈະມີຄວາມຕື່ນຕາຕື່ນໃຈໄປຕາມໆກັນ ຍ້ອນເຫັນໄດ້ຄວາມແຕກຕ່າງຈາກເມື່ອກ່ອນທີ່ເປັນເຂດຊົນນະບົດແຫ່ງໜຶ່ງ ທີ່ອຸດົມສົມບູນໄປດ້ວຍທໍາມະຊາດ ປູປານານໍ້າ… ມາບັດນີ້ ໄດ້ມີຄວາມຈະເລີນຮຸ່ງເຮືອງຂຶ້ນຢ່າງປະຈັກຕາທີ່ໄດ້ຮັບການລົງທຶນພັດທະນາຈາກ ບໍລິສັດ ລາວມະຫານະທີ ສີທັນດອນ ການລົງທຶນຈໍາກັດ(ບໍລິສັດ STD).

ເຂດສີພັນດອນແຫ່ງນີ້ ໄດ້ມີການພັດທະນາ ແຕ່ຍັງອະນຸລັກທໍາມະຊາດ ແລະ ຈັດສັນພື້ນທີ່ໃຫ້ມີຄວາມເປັນລະບຽບ ມີຄວາມກົມກືນກັບສິ່ງປຸກສ້າງຢ່າງສວຍງາມ. ເຂດສີພັນດອນ ໄດ້ເລີ່ມລົງມືກໍ່ສ້າງໃນກາງປີ 2018 ມາຮອດປັດຈຸບັນການພັດທະນາໃຊ້ເວລາມີພຽງແຕ່ສາມປີກວ່າ ເຮັດໃຫ້ເຂດດັ່ງກ່າວ ມີການປ່ຽນແປງໄປສູ່ຄວາມຈະເລີນ.

ເວົ້າສະເພາະ ໃນປີ 2021 ຜ່ານມາ, ເຖິງວ່າພະຍາດໂຄວິດ-19 ໄດ້ລະບາດແຜ່ລາມໄປທົ່ວໂລກ, ລວມທັງປະເທດເຮົາ ທີ່ໄດ້ຮັບຜົນກະທົບຢ່າງໜັກໜ່ວງປານໃດກໍຕາມ. ແຕ່ມັນກໍບໍ່ເຄີຍສະເທືອນເຖິງຄວາມກ້າຫານຂອງບຸກຄະກອນ – ກໍາມະກອນທັງໝົດຢູ່ໂຄງການເຂດພັດທະນາເສດຖະກິດໃໝ່ສີທັນດອນ ທີ່ມີເປົ້າໝາຍສູ້ຊົນເຮັດສໍາເລັດຕາມແຜນທີ່ກໍານົດໄວ້.

ອັນພົ້ນເດັ່ນ ແມ່ນສໍາເລັດການກໍ່ສ້າງໂຮງແຮມເມສເວດອນ (ລາວ) ຕັ້ງຢູ່ແຄມແມ່ນໍ້າຂອງ ທີ່ເປັນຊາຍແດນເຊື່ອມຕໍ່ລະຫວ່າງແຂວງຈໍາປາສັກ ປະເທດລາວ ແລະ ແຂວງ Stung Treng ປະເທດກໍາປູເຈຍ ຕິດກັບນໍ້າຕົກຄອນພະເພັງ ຊຶ່ງເປັນນໍ້າຕົກທີ່ໃຫຍ່ທີ່ສຸດໃນອາຊີຕາເວັນອອກສຽງໃຕ້, ຫັນໜ້າໄປຫາສະຖານີໄຟຟ້ານ້ຳຕົກດອນສະໂຮງ (Don Sahong), ເພີດເພີນໄປກັບທີວທັດແມ່ນ້ຳຂອງໃນຮູບແບບອາຊີຕາເວັນອອກສຽງໃຕ້.

ໂຄງການກໍ່ສ້າງໂຮງແຮມບູຕິກແຄມແມ່ນໍ້າຂອງໄດ້ເລີ່ມດໍາເນີນວຽກງານໃນເດືອນກຸມພາ 2020, ຄາດວ່າຈະສຳເລັດ ແລະ ເປີດບໍລິການໃນເດືອນເມສາ 2022. ທາງ (ບໍລິສັດ STD) ໄດ້ເລີ່ມກໍ່ສ້າງເສັ້ນທາງຄອນກຼີດອ້ອມດອນໂຂງ ໃນເດືອນຕຸລາ 2019 ຊຶ່ງມີຄວາມຍາວ 43,5 ກິໂລແມັດ ແລະ ໄດ້ສໍາເລັດມອບໃຫ້ລັດຖະບານລາວໃນເດືອນມີນາ ປີ 2021.

ໂຄງການກໍ່ສ້າງກັນເຈື່ອນແມ່ນໍ້າຂອງ ແລະ ເສັ້ນທາງພູມມິທັດ ແມ່ນໄດ້ເລີ່ມໃນເດືອນກຸມພາ 2021, ມາຮອດປັດຈຸບັນ ການກໍ່ສ້າງພື້ນຖານຂອງກັນເຈື່ອນຝັ່ງແມ່ນ້ຳຂອງ ການສ້ອມແປງກຳແພງ ແລະ ຖົມດິນກໍ່ສ້າງ ສຳເລັດແລ້ວລວມທັງໝົດ 1,2 ກິໂລແມັດ ແລະ ໄດ້ມີການຂຸດເຈາະຮ່ອງຮອຍ ແລະ ຖົມຮາກຖານ 200 ແມັດ. ກໍ່ສ້າງໂຮງງານຜະລິດນ້ຳປະປາໃນເດືອນມັງກອນ 2021. ມາຮອດທ້າຍປີ 2021 ສຳເລັດ ສາມາດສະໜອງນໍ້າຮັບໃຊ້ໂຮງແຮມທັນສະໄໝ ແລະ ປະຊາຊົນຢູ່ເຂດໃກ້ຄຽງໄດ້ຢ່າງພຽງພໍ.

ຫຼັງຈາກປະສົບບັນຫາຍ້ອນຜົນກະທົບຂອງການລະບາດພະຍາດໂຄວິດ-19 ຕໍ່ກັບຂະແໜງອຸດສາຫະກໍາການທ່ອງທ່ຽວ, (ບໍລິສັດ STD) ໄດ້ປັບຮູບແບບອຸດສາຫະກໍາ ແລະ ຈັງຫວະການສົ່ງເສີມການລົງທຶນໃຫ້ທັນເວລາ, ໄດ້ວາງແຜນເຂດເສດຖະກິດພິເສດດີຈີຕອນໜອງນົກຂຽນ ຢູ່ພາກໃຕ້ຂອງເຂດພັດທະນາເສດຖະກິດໃໝ່ສີທັນດອນ, ໂດຍຈະສຸມໃສ່ເຕັກໂນໂລຊີ IT, block chain, ການຄ້າທາງເອເລັກໂຕຣນິກ e-commerce, ຫ້ອງຖານຂໍ້ມູນໃຫຍ່ ແລະ ທຸລະກິດອື່ນໆ ແລະ ໄດ້ມີການດຶງດູດການລົງທຶນຈາກນັກລົງທຶນຈີນ ແລະ ຍີ່ປຸ່ນ. ໃນປັດຈຸບັນ, ແຜນການດັ່ງກ່າວໄດ້ສົ່ງເອກະສານລາຍງານຫາລັດຖະບານເພື່ອຂໍອະນຸມັດ ແລະ ຍັງໄດ້ລົງນາມຮ່ວມກັບລູກຄ້າ ແລະ ຄູ່ຮ່ວມງານທັງໝົດ 3 ສັນຍາຮ່ວມມືທີ່ກ່ຽວຂ້ອງແລ້ວ.

ການລະບາດຂອງພະຍາດໂຄວິດ-19 ບໍ່ສາມາດຢຸດຄວາມກະຕືລືລົ້ນຂອງຜູ້ປະກອບການ ແລະ ຄວາມກ້າວໜ້າຂອງຜູ້ປະກອບການໃນເຂດພັດທະນາເສດຖະກິດໃໝ່ສີ່ພັນດອນ, ແຫຼ່ງອຸດສາຫະກຳການຜະລິດໃໝ່ໄດ້ຮັບການປັບປຸງຢ່າງສະເໝີຕົ້ນສະເໝີປາຍ ຊຶ່ງບໍ່ສາມາດຢຸດຢັ້ງວິສາຫະກິດຈີນທີ່ລົງທຶນໃນຕ່າງປະເທດ ພາຍໃຕ້ຍຸດທະສາດ “ໜຶ່ງແລວ ໜຶ່ງເສັ້ນທາງ” ແລະ “ການເດີນທາງອອກໄປສູ່ຂ້າງນອກ”, ອັນໄດ້ສ້າງສັກກາຍະພາບເຂົ້າໃນເຂດພັດທະນາເສດຖະກິດໃໝ່ສີທັນດອນ.

ນອກຈາກນີ້, ໂຄງການຍັງໄດ້ສ້າງຫ້ອງວິເຄາະຈໍາປາສາຍໃໝ ເພື່ອຫຼຸດຜ່ອນຜົນກະທົບຈາກການລະບາດຂອງພະຍາດໂຄວິດ-19, ບໍລິສັດ (STD) ໄດ້ຕັ້ງໜ້າຊຸກຍູ້ບັນດາຄູ່ຮ່ວມງານ ຮ່ວມມືກັບໂຮງໝໍແຂວງຈຳປາສັກ ເພື່ອສ້າງຕັ້ງສູນກວດຫາເຊື້ອພະຍາດເສັ້ນທາງສາຍໃໝຈໍາປາ, ສະໜອງການບໍລິການກວດຫາເຊື້ອໂຄວິດ-19 ໃຫ້ແກ່ 4 ແຂວງໃນພາກໃຕ້, ເພີ່ມປະສິດທິພາບໃນການຜ່ານດ່ານເຂົ້າອອກປະເທດ, ສູນກວດຫາເຊື້ອພະຍາດແບບເຄື່ອນທີ່ ແມ່ນມີລັກສະນະພິເສດຄື ສະດວກ, ວ່ອງ ໄວ ແລະ ມີຄວາມຄ່ອງຕົວ.

ສໍາລັບການວາງພື້ນຖານໂຄງການພັດທະນາດ້ານກະສິກຳ ປະເທດລາວເຮົາໃນຖານະເປັນ ປະເທດທີ່ສໍາຄັນຂອງຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ກະສິກຳລາວຈະໄດ້ກ້າວເຂົ້າສູ່ໄລຍະປະຫວັດສາດແຫ່ງການພັດທະນາທີ່ບໍ່ເຄີຍມີມາກ່ອນ, ໂຄງການຮ່ວມມືດ້ານກະສິກຳລາວ-ຈີນ ໄດ້ຮັບການສົ່ງເສີມສືບຕໍ່ກ້າວໄປຂ້າງໜ້າຢ່າງບໍ່ຢຸດຢັ້ງ. ເພື່ອຄົ້ນຫາຕົວແບບ ແລະ ສະສົມກັບປະສົບການສໍາລັບການພັດທະນາກະສິກໍາຕໍ່ໜ້າຂອງເຂດພັດທະນາເສດຖະກິດໃໝ່ສີທັນດອນ, ເຂດພັດທະນາເສດຖະກິດໃໝ່ສີທັນດອນເຮົາສືບຕໍ່ທ່າອ່ຽງການພັດທະນາອຸດສາຫະກໍາຢ່າງສະໜິດແໜ້ນ, ໂດຍໃນເດືອນຕຸລາ 2021 ໄດ້ມີການຊຸກຍູ້ການຮ່ວມມືໂຄງການກະສິກໍາປາກຊ່ອງລະຫວ່າງຄູ່ຮ່ວມງານກັບບໍລິສັດ ກະສິກໍາ Delta ຈໍາກັດຜູ້ດຽວ, ທີ່ເນັ້ນກ່ຽວກັບການປູກກາເຟ, ປູກຫຍ້າສໍາລັບການລ້ຽງສັດ, ພັດທະນາການລ້ຽງງົວ, ບັນລຸການປູກຝັງລ້ຽງສັດແບບນິເວດວິທະຍາ.

ໄປຄ່ຽງຄູ່ກັບການພັດທະນາເຂດເສດຖະກິດໃໝ່ ສີທັນດອນ (ບໍລິສັດ STD) ຍັງ ມີຄວາມຕັ້ງໜ້າປະຕິບັດຄຳໝັ້ນສັນຍາໃນການສ້າງສະຫວັດດີການ ແລະ ຜົນປະໂຫຍດແກ່ສັງຄົມດ້ວຍຜົນສໍາເລັດເຊັ່ນ: ການສະໜັບສະໜູນຊ່ວຍດ້ານເສດຖະກິດ, ຊີວິດການເປັນຢູ່ຂອງປະຊາຊົນ, ການສຶກສາ, ການປິ່ນປົວພະຍາດ ແລະ ວຽກງານອື່ນໆໃຫ້ດີຂຶ້ນ, ໄດ້ສະໜັບສະໜູນການພັດທະນາການສຶກສາຢູ່ທ້ອງຖິ່ນ ຊຶ່ງໄດ້ກໍ່ສ້າງອາຄານຫຼັງໃໝ່ຂອງໂຮງຮຽນປະຖົມສົມບູນບ້ານຂີ້ນາກ ເມືອງໂຂງ ແຂວງຈໍາປາສັກ ດ້ວຍທຶນການກໍ່ສ້າງທັງໝົດ 200.000 ໂດລາ, ເພື່ອຕອບສະໜອງດ້ານການຮຽນ-ການສອນ ແລະ ການດໍາລົງຊີວິດຂອງນັກຮຽນ ແລະ ຄູອາຈານ, ໂດຍນໍາໃຊ້ສະຖານທີ່ໆມີຢູ່ແລ້ວ ແລະ ເງື່ອນໄຂພື້ນຖານໃຫ້ເກີດປະໂຫຍດສູງສຸດ, ສາມາດປ່ຽນແປງຈາກສະພາບເກົ່າໆໄດ້ຢ່າງສິ້ນເຊີງ, ພ້ອມສ້າງສະພາບແວດລ້ອມການຮຽນ-ການສອນ ທີ່ປອດໄພ, ສະດວກສະບາຍແກ່ນັກຮຽນ ແລະ ຄູອາຈານ.

ນອກຈາກບໍລິສັດໃຫ້ການສະໜັບສະໜູນແລ້ວ, ທຸກຊັ້ນຄົນໃນສັງຄົມ ຍັງມີຄວາມເປັນຫ່ວງເປັນໃຍຕໍ່ນັກຮຽນ ແລະ ຄູ-ອາຈານ ກໍໄດ້ໃຫ້ການຊ່ວຍເຫຼືອໃນໂຄງການນີ້ເຊັ່ນກັນ, ທ່ານ ພົອ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ແລະ ຄອບຄົວ ຍັງໄດ້ສົ່ງມອບເຄື່ອງຄອມພີວເຕີຕັ້ງໂຕະຈຳນວນ 5 ໜ່ວຍ ແລະ ເຄື່ອງພິມ 2 ເຄື່ອງ ໃຫ້ແກ່ອໍານາດການປົກຄອງເມືອງໂຂງ ໃນໄລຍະພິທີວາງສີລາລືກ, ຍັງມີການມອບຄອມພີວເຕີຕັ້ງໂຕະຈຳນວນ 3 ໜ່ວຍ ແລະ ເຄື່ອງພິມອີກ 1 ເຄື່ອງ ໃຫ້ໂຮງຮຽນປະຖົມສົມບູນບ້ານຂີ້ນາກ ລວມມູນຄ່າແມ່ນຫຼາຍກວ່າ 50 ລ້ານກີບ, ໃນພິທີຄັ້ງນີ້ ຍັງໄດ້ມີການມອບອຸປະກອນການຮຽນ ແລະ ເຄື່ອງກິລາລວມມູນຄ່າ 60 ລ້ານກີບຕື່ມອີກ. ການສຶກສາແມ່ນພື້ນຖານຂອງການແກ້ໄຂຄວາມທຸກຍາກ, ນໍ້າດື່ມແມ່ນແຫຼ່ງຫຼໍ່ລ້ຽງຊີວິດການເປັນຢູ່ຂອງປະຊາຊົນ, ການມີສ່ວນຮ່ວມໃນການສ້າງສະຫວັດດີການ ແລະ ຜົນປະໂຫຍດແກ່ສັງຄົມ ຂອງທ່ານລັດຖະມົນຕີ ແລະ ຄອບຄົວ ໄດ້ສ້າງຄວາມປະທັບໃຈ ແລະ ໄດ້ກາຍເປັນແຮງບັນດານໃຈໃຫ້ກັບທຸກໆຄົນທີ່ເຂົ້າຮ່ວມໃນພິທີຄັ້ງນີ້.

ຜ່ານຈາກການພັດທະນາຢ່າງຕັ້ງໜ້າຂອງຄູ່ຮ່ວມພັດທະນາຄື ບໍລິສັດ ລາວມະຫານະທີ ສີທັນດອນ ການລົງທຶນ ຈໍາກັດ. (ບໍລິສັດ STD) ໄດ້ຮັບຄວາມສົນໃຈ ຈາກປະເທດ ແລະ ປະຊາຊົນຂອງສອງຊາດລາວ-ຈີນ ຊຶ່ງໄດ້ຈົດເຂົ້າບັນຊີລາຍຊື່ໂຄງການຄວາມສາມາດໃນການຜະລິດ ແລະ ການຮ່ວມມືລົງທຶນທີ່ສໍາຄັນ ລາວ-ຈີນ. ໃນປີ 2021 ເຂດພັດທະນາເສດຖະກິດໃໝ່ສີທັນດອນ ໄດ້ມີການຕ້ອນຮັບ ການມາຢ້ຽມຢາມ ແລະ ສໍາຫຼວດ ຂອງການນຳຂັ້ນສູນກາງ ແລະ ທ້ອງຖິ່ນຂອງ ສປປ ລາວ ຊຶ່ງເປັນທີ່ຍອມຮັບ ແລະ ໃຫ້ການສະໜັບສະໜູນຕໍ່ກັບການພັດທະນາເຂດພັດທະນາເສດຖະກິດ ໃໝ່ສີທັນດອນຂອງພວກເຮົາໃນໄລຍະທີ່ຜ່ານມາ.

ໃນປີ 2022 ນີ້, ທາງ ບໍລິສັດ STD ຈະສືບຕໍ່ເພີ່ມທະວີ ໃນການພັດທະນາພື້ນຖານໂຄງລ່າງ: ມີແຜນການທົດແທນຄືນທີ່ດິນ ເນື້ອທີ່ 1.000 ເຮັກຕາ, ສ້າງບ້ານຈັດສັນ, ມີການພັດທະນາເຂດຮ່ວມມືສາທິດດ້ານກະສິກໍາ, ສືບຕໍ່ສ້າງກັນເຈື່ອນແມ່ນໍ້າຂອງ, ປັບປຸງເຂດທ່ອງທ່ຽວນໍ້າຕົກຄອນພະເພັງ, ເລີ່ມມີການກໍ່ສ້າງໂຮງແຮມຮູບແຄນຄູ່ ທີ່ສູງ 238 ແມັດ ແລະ ຍັງຈະສືບຕໍ່ໃຫ້ການສະໜັບສະໜູນຊ່ວຍເຫຼືອດ້ານຕ່າງໆໃຫ້ກັບທ້ອງຖິ່ນ ກໍຄືລັດຖະບານ ໂດຍສະເພາະດ້ານການແພດ, ການສຶກສາ ແລະ ອື່ນໆ.