ນາງວອນອາຍຸ38ປີຂາຍຢາບ້າເມັດລະ8,000ກີບ

ປກສ ເມືອງໄຊຍະບູລີ ມ້າງເປົ້າໝາຍຄ້າຂາຍຢາເສບຕິດ ທີ່ເປັນເພດຍິງ. ທ້າຍເດືອນ ກັນຍາ 2022 ຜ່ານມານີ້ ເຈົ້າໜ້າທີ່ ພະແນກຕໍາຫຼວດ ປກສ ເມືອງໄຊຍະບູລີ ໄດ້ຮັບແຫຼ່ງຂ່າວຈາກພົນລະເມືອງດີວ່າມີກຸ່ມຄົນບໍ່ດີເຄື່ອນໄຫວຄ້າຂາຍຢາເສບຕິດ ເຈົ້າໜ້າທີ່ຈຶ່ງໄດ້ນໍາກໍາລັງວິຊາສະເພາະ ສົມທົບກັບພາກສ່ວນທີ່ກ່ຽວຂ້ອງລົງເຄື່ອນໄຫວອອກລາດຕາເວນຕາມເສັ້ນທາງ ຂອບເຂດບ້ານນາຄູນຫາບ້ານປາງຄອບ ເມືອງໄຊຍະບູລີ

ຈຶ່ງພົບເຫັນເປົ້າໝາຍດັ່ງກ່າວ ແລະ ໄດ້ເຂົ້າກັກຕົວ ພ້ອມຂອງກາງຢາເສບຕິດ ປະເພດຢາບ້າ 304 ເມັດ ນໍາຕົວມາສືບສວນ-ສອບສວນ ເພື່ອຂະຫຍາຍຜົນຫາພັກພວກມາດຳເນີນຄະດີ. ຜ່ານການສືບສວນ-ສອບສວນ ຂອງເຈົ້າໜ້າ ຈຶ່ງຮູ້ຊື່ນາງ ວອນ, ອາຍຸ 38 ປີ, ອາຊີບປະຊາຊົນ, ຢູ່ບ້ານປາງຄອມ, ເມືອງໄຊຍະບູລີ, ແຂວງໄຊຍະບູລີ

ເຊິ່ງຜູ້ກ່ຽວໄດ້ຮັບສາລະພາບວ່າ ຢາບ້າ 304 ເມັດເປັນຂອງຕົນເອງແທ້ ແລະໄດ້ພົວພັນເຄື່ອນໄຫວຄ້າຂາຍ (ຢາບ້າ) ມາແຕ່ເດືອນ ມິຖຸນາ 2022 ເປັນຕົ້ນມາ ຊື້ແຕ່ລະຄັ້ງ 1 ຫາ 2 ຖົງ, ຊື້ນໍາພັກພວກດຽວກັນ ໃນລາຄາຖົງລະ 850,000 ກີບ,

ເມື່ອໄດ້ຢາບ້າມາແລ້ວແລ້ວໄດ້ນໍາເອົາໄປຈໍາໜ່າຍໃຫ້ໄວ້ໝຸ່ມຢູ່ເຂດບ້ານປາງຄອມ, ເມືອງໄຊຍະບູລີ, ແຂວງໄຊຍະບູລີ, ໃນລາຄາເມັດລະ 8000 ຫາ 10,000 ກີບ, ຮອດວັນທີ 21 ເດືອນກັນ 2022 ຈຶ່ງຖືກເຈົ້າໜ້າທີ່ກັກຕົວ ພ້ອມຂອງກາງຢາບ້າ 304 ເມັດ ມາດໍາເນີນຄະດີຕາມຂັ້ນຕອນຂອງກົດໝາຍ.