ເຮັດປືນຫຼັ່ນໃສ່ໝູ່ໂດຍບໍ່ຕັ້ງໃຈເຈັບສາຫັດ

ຕາມການໃຫ້ຂໍ້ມູນຂອງພະແນກຕຳຫຼວດ ປກສ ເມືອງວຽງພູຄາ ແຂວງຫຼວງນ້ຳທາ. ໃນວັນທີ 27 ກັນຍາ 2022 ໄດ້ຮັບການແຈ້ງຄວາມຈາກ ປກສ ກຸ່ມ ບ້ານນ້ຳແຜ່ ວ່າ: ໄດ້ມີປະຊາຊົນ ບ້ານດອນໃໝ່ ເມືອງວຽງພູຄາ ແຂວງຫຼວງນ້ຳທາ ເຮັດປືນຫຼັ່ນໃສ່ກັນ ເຮັດໃຫ້ມີຜູ້ໄດ້ຮັບບາດເຈັບສາຫັດ 01 ຄົນ. ຈາກນັ້ນ ຈຶ່ງໄດ້ຈັດກຳລັງລົງກວດກາ ເຫັນວ່າມີມູນຄວາມຈິງ. ຜ່ານການສອບສວນ ແລະ ເກັບກຳຂໍ້ມູນຂອງເຈົ້າໜ້າທີ່ ຈຶ່ງຮູ້ວ່າ: ໃນຕອນເຊົ້າຂອງວັນທີ 27 ກັນຍາ 2022 ໄດ້ມີປະຊາຊົນ ຈໍານວນ 05 ຄົນ ຊື່ທ້າວ ຈາມໍນ້ອຍ (ຜູ້ຮັບບາດເຈັບ), ທ້າວຈາຄະ (ຜູ້ເຮັດປືນຫຼັ່ນ), ທ້າວຈາຄື, ທ້າວຈາກໍ ແລະທ້າວຈາເນີ ທັງ 05 ແມ່ນປະຊາຊົນ ບ້ານດອນໃໝ່ ເມືອງວຽງພູຄາ ແຂວງຫຼວງນ້ຳທາ ໄດ້ພາກັນເອົາປືນແກັບຄົນລະກະບອກ ພ້ອມໝາ 03 ໂຕ ໄປໄລ່ໝູປ່າ ທີ່ກີນເຂົ້າໄຮ່ຢູ່ເຂດ ບ້ານນ້ຳໝີ ເມືອງວຽງພູຄາ.

ກ່ອນເກີດເຫດ ທ້າວ ຈາມໍນ້ອຍ ໄດ້ຍາງນຳໜ້າກ່ອນ 500 ແມັດ ແລ້ວທັງ 04 ຄົນ ແມ່ນຍ່າງນຳຫຼັງ ທາງຍ່າງແມ່ນໄດ້ບຸປ່າເຫຼົາຕຶບ ແລະມີເຄືອເຂົາໄດ້ເກາະນົກປືນແກັບ ຂອງ ທ້າວ ຈາຄະ ເຮັດໃຫ້ປືນຫຼັ່ນໄປໃສ່ຂາເບື້ອງຊ້າຍ ຂອງ ທ້າວ ຈາມໍນ້ອຍ ຖືກລູກວ່ານ ຈຳນວນ 11 ລູກ ເຮັດໃຫ້ຍ່າງບໍ່ໄດ້. ທັງ 04 ຄົນ ຈຶ່ງໄດ້ພັດປ່ຽນກັນແບກ ທ້າວ ຈາມໍນ້ອຍ ມາສົ່ງຢູ່ໂຮງໝໍເມືອງວຽງພູຄາ. ພັທ ບູນຄາມ ເປຼົາປັນຍາ ຫົວໜ້າພະແນກຕຳຫຼວດ ປກສ ເມືອງວຽງພູຄາ ໃຫ້ຮູ້ວ່າ: ປະຈຸບັນ ທ້າວ ຈາມໍນ້ອຍ ໄດ້ຮັບການປິ່່ນປົວພົ້ນຂີດອັນຕະລາຍແລ້ວ ແລະທາງເຈົ້າໜ້າທີ່ໄດ້ຍຶດປືນແກັບ ຈຳນວນ 05 ກະບອກ ແລະກັກຕົວ ທ້າວ ຈາຄະ ອາຍຸ 20 ປີ, ປະຊາຊົນ ບ້ານດອນໃໝ່ ໄວ້ຢູ່ຄ້າຍດັດສ້າງ ປກສ ເມືອງວຽງພູຄາ ເພື່ອດຳເນີນຄະດີຕາມລະບຽບກົດໝາຍ.