ພະແນກ ຖວທ ນວ ຕິດຕາມຊຸກຍູ້ວຽກງານ ຖວທ ຢູ່ບ້ານດອນຊິງຊູ

ວັນທີ 20 ຕຸລາ 2022 ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວນະຄອນຫຼວງວຽງຈັນ (ຖວທ ນວ) ຮ່ວມກັບພາກສ່ວນກ່ຽວຂ້ອງ ໄດ້ລົງເຄື່ອນໄຫວຕິດຕາມຊຸກຍູ້ວຽກງານ ຖວທ ຢູ່ບ້ານດອນຊີງຊູ້ ເມືອງສີໂຄດຕະບອງ ນວ ເພື່ອສໍາຫຼວດເກັບກຳຂໍ້ມູນທ່າແຮງດ້ານການທ່ອງທ່ຽວ ເພື່ອນໍາໄປຂຽນແຜນສະເໜີເອົາບ້ານດັ່ງກ່າວເປັນສະຖານທີ່ທ່ອງທ່ຽວທາງວັດທະນະທໍາຂອງ ນວ ນໍາໂດຍທ່ານ ນາງ ວິໄລວອນ ຈັນທະລາຕີ ຫົວໜ້າພະແນກ ຖວທ ນວ ຖືກຕ້ອນຮັບໂດຍທ່ານ ສຸນັນ ເຮືອງປະເສີດ ນາຍບ້ານດອນຊິງຊູ້ ພ້ອມດ້ວຍອໍານາດການປົກຄອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ການລົງເຄື່ອນໄຫວຄັ້ງນີ້ ຄະນະໄດ້ຮັບຟັງການລາຍງານສະພາບລວວມຂອງບ້ານດອນຊິງຊູ້ ທີ່ຕິດພັນກັບວຽກງານ ຖວທ ໄລຍະຜ່ານມາ ເຊິ່ງບ້ານດອນຊິງຊູ້ ແມ່ນໜຶ່ງໃນ 60 ບ້ານຂອງເມືອງສີໂຄດຕະບອງ ມີເນື້ອທີ່ທັງໝົດ 133,26 ເຮັກຕາ ມີ 56 ຄອບຄົວ ມີ 57 ຫຼັງຄາເຮືອນ ພົນລະເມືອງ 252 ຄົນ ມີວັດ 1 ແຫ່ງຄື: ວັດນາກ ໄຊຍະຣາມ ເຊິ່ງເປັນວັດທີ່ເກົ່າແກ່ ມີປະຫວັດຮ່ອງຮອຍສິມເກົ່າທີ່ຖືກສ້າງຂຶ້ນໃນສະໄໝກ່ອນ ແລະ ຖືກສ້າງຂຶ່ນໃໝ່ໃນປີ ພສ 2544 ປັດຈຸບັນ ເພິ່ນໄດ້ອະນຸຮັກສິມເກົ່່າທີ່ເຫັນແຕ່ເສົາ 1 ຕົ້ນໄວ້ຂ້າງສິມໃໝ່ ເພື່ອເປັນສັນຍະລັກໃຫ້ຜູ້ຄົນທີ່ສົນໃຈເຂົ້າໄປຢ້ຽມຊົມສັກກາລະບູຊາ ໂດຍໃນທຸກວັນສີນ ຈະມີຜູ້ຄົນຈາກນະຄອນຫຼວງວຽງຈັນຂ້າມເຮືອມາສັກກະລະບູຊາ ແລະ ຢ້ຽມຊົມຢູ່ວັດແຫ່ງນີ້ບໍ່ຕ່ຳກວ່າ 200 ຄົນຕໍ່ມື້.

ຈາກນັ້ນ ຂະແໜງກ່ຽວຂ້ອງຂອງພະແນກ ຖວທ ນວ ໄດ້ນໍາສະເໜີແຜນວຽກທີ່ຕິດພັນກັນວຽກງານຂອງຕົນຢູ່ບ້ານດອນຊິງຊູ້ ແລະ ໄດ້ສືກສາສໍາຫຼວດເກັບກໍາເອົາຂໍ້ມູນທີ່ເປັນມາດຖານຂອງວຽກງານສ້າງຄອບຄົວ ແລະ ບ້ານວັດທະນະທໍາ ເພື່ອແນໃສ່ການຊຸກຍູ້ສົ່ງເສີມສ້າງບ້ານດັ່ງກ່າວໃຫ້ກາຍເປັນບ້ານຄົບມາດຕະຖານ ແລະ ເປັນແຫຼ່ງທ່ອງທ່ຽວທາງວັດທະນະທໍາ ແລະ ທຳມະຊາດໃນຕໍ່ໜ້າ ເນື່ອງຈາກບ້ານດອນຊິງຊູ້ມີມູນເຊື້ອ ແລະ ທ່າແຮງທາງດ້ານການຜະລິດກະສິກຳ ຕິດພັນກັບການປົກປັກຮັກສາວັດທະນະທໍາ ຮີດຄອງປະເພນີອັນດີງາມຂອງຊາດ ແລະ ເປັນບ້ານທີ່ຮັກສາໄດ້ຄວາມສະຫງົບ ປອດໄພ

ສະແດງອອກຈາກການໄດ້ຮັບນາມມະຍົດເປັນບ້ານປອດຄະດີ ເຊິ່ງໄລຍະຜ່ານມາ ອົງການປົກຄອງເມືອງສີໂຄດຕະບອງ ແລະ ຂະແໜງການກ່ຽວຂ້ອງ ໄດ້ລົງຕິດຕາມຊຸກຍູ້ຢ່າງເປັນປະຈໍາ ໂດຍໄດ້ລົງຕິດຕັ້ງໂທລະໂຄ່ງປະຈໍາບ້ານ ພ້ອມມອບສິ່ງອໍານວຍຄວາມສະດວກດ້ານຕ່າງໆໃຫ້ບ້ານ ເພື່ອຊຸກຍູ້ສົ່ງເສີມການຜັນຂະຫຍາຍວຽກງານດັ່ງກ່າວໃຫ້ມີປະສິດທິຜົນ ແຕ່ກໍຍັງມີຂໍ້ຫຍຸ້ງຍາກທາງດ້ານງົບປະມານໃນການຕິດຕາມກວດກາ ແລະ ການຈັດຕັ້ງປະຕິບັດຕົວຈິງ ແຕ່ຢ່າງໃດກໍຕາມ ເພື່ອໃຫ້ບ້ານໄດ້ຮັບປະກາດເປັນບ້ານວັດທະນະທໍາໃນຕໍ່ໜ້າ ທາງພາກສ່ວນກ່ຽວຂ້ອງ ໂດຍສະເພາະ ພະແນກ ຖວທ ນວ ຍັງຈະໄດ້ສືບຕໍ່ຊຸກຍູ້ສົ່ງເສີມບ້ານດັ່ງກ່າວໃຫ້ມີຜົນສໍາເລັດໂດຍໄວ.

ໃນໂອກາດລົງເຄື່ອນໄຫວຕິດຕາມວຽກຄັ້ງນີ້ ພະແນກ ຖວທ ນວ ຍັງໄດ້ມອບຊຸດໂທລະໂຄ່ງຈໍານວນໜຶ່ງ ພ້ອມທັງນໍາໄປຕິດຕັ້ງໃຫ້ອົງການປົກຄອງບ້ານດອນຊິງຊູ້ ເພື່ອນໍາໃຊ້ເຂົ້າວຽກງານໂຄສະນາເຜີຍແຜ່ພາຍໃນບ້ານໃຫ້ທົ່ວເຖິງ ພ້ອມດຽວກັນນີ້ ທາງຫົວໜ່ວຍທຸລະກິດທີ່ມາຮ່ວມ ກໍໄດ້ນຳເອົາສິ້ນຈຳນວນໜຶ່ງມອບໃຫ້ສະຫະພັນແມ່ຍິງຂອງບ້ານ ເພື່ອໄວ້ໃຫ້ບໍລິການແກ່ຜູ້ທີ່ເດີນທາງເຂົ້າມາທ່່ຽວເພື່ອກາບໄຫວ້ສັກກາລະບູຊາໃນວັດນາກໄຊຍະຣາມຂອງບ້ານ ຈາກນັ້ນ ບັນດາຂະແໜງການຂອງພະແນກ ຖວທ ນວ ໄດ້ສືບຕໍ່ແບ່ງກັນໄປຕິດຕາມຊຸກຍູ້ວຽກງານທີ່ຕິດພັນກັບຂະແໜງການຂອງຕົນໃນບ້ານດອນຊິງຊູ້ຕື່ມອີກ.

Facebook Comments Box

Similar Posts