ລາວ-ຈີນ ສືບ​ຕໍ່​ເພີ່ມ​ທະ​ວີ​ການ​ຮ່ວມ​ມື​ດ້ານ​ເສດ​ຖະ​ກິດ

ໃນວັນທີ 19 ພະຈິກ 2021 ທີ່ກະຊວງແຜນການ ແລະ ການລົງທຶນ ໄດ້ຈັດກອງປະຊຸມ​ພົບ​ປະທາງໄກ ລະຫວ່າງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ຮ່ວມກັບ ທ່ານ ເຫີ ລີ້ເຟິ່ງ ຮອງປະທານສະພາທີ່ປຶກສາການເມືອງ ປະທານຄະນະພັດທະນາ ແລະ ປະຕິຮູບ ແຫ່ງຊາດຈີນ ໂດຍມີຮອງລັດຖະມົນຕີ, ບັນດາຫົວໜ້າກົມທີ່ກ່ຽວຂ້ອງຂອງສອງຝ່າຍເຂົ້າຮ່ວມ.

ກອງປະຊຸມດັ່ງກ່າວ ໄດ້ຈັດຂຶ້ນຕາມການຕົກລົງເຫັນດີຂອງ ສໍານັກງານນາຍົກລັດຖະມົນຕີ ແນໃສ່ເພື່ອປຶກສາຫາລືຜັນຂະຫຍາຍບັນດາເອກະສານທີ່ສອງຂະແໜງການໄດ້ຕົກລົງຮ່ວມກັນໃນໄລຍະທີ່ຜ່ານມາ ໃຫ້ເກີດດອກອອກຜົນ ເຊັ່ນ: ສັນຍາ ຮ່ວມກັນຊຸກຍູ້ການສ້າງໜຶ່ງແລວ ໜຶ່ງເສັ້ນທາງ; ຂອບການຮ່ວມມື ພັດທະນາແລວທາງເສດຖະກິດ ລາວ-ຈີນ (2019-2030); ສັນຍາ ຊຸກຍູ້ໂຄງການສໍາຄັນ ໃນຂອບຄວາມອາດສາມາດໃນການຜະລິດ ແລະ ການລົງທຶນ ແລະ ບົດບັນທຶກຄວາມເຂົ້າໃຈ ການຮ່ວມມືແລກປ່ຽນດ້ານວິຊາການ ລະຫວ່າງ ສອງອົງການ.

ໃນໂອກາດນີ້ ທ່ານ ສອນໄຊ ສີພັນດອນ ໄດ້ລາຍງານສະພາບການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍຫຍໍ້ ແລະ ສະເໜີບາງຄໍາເຫັນ ຕໍ່ການຮ່ວມມືຂອງສອງຂະແໜງການໃນຕໍ່ໜ້າ ວ່າ: ໄລຍະ 5 ປີ ຜ່ານມາເສດຖະກິດ ສປປ ລາວ ເຕີບໂຕຢູ່ໃນລະດັບ 5,8%. ແຕ່​ສອງ​ປີ​ມາ​ນີ້ ເນື່ອງຈາກໄດ້ຮັບຜົນກະທົບຈາກການລະບາດໂຄວິດ-19 ໄດ້ເຮັດໃຫ້ສະພາບເສດຖະກິດ, ການຄ້າ ແລະ ການລົງທຶນ ມີທ່າອ່ຽງຫຼຸດລົງ ໂດຍສະເພາະ ຂະແໜງບໍລິການ, ທ່ອງທ່ຽວ ແມ່ນໄດ້ຮັບຜົນກະທົບໜັກໜ່ວງ. ແຕ່ການຮ່ວມມືລາວ-ຈີນ ໂດຍສະເພາະການຮ່ວມມືໂຄງການຂະໜາດໃຫຍ່ ຍັງສາມາດສືບຕໍ່ຈັດຕັ້ງປະຕິບັດໄດ້ເປັນຢ່າງດີ. ເພື່ອຟື້ນຟູເສດຖະກິດ ລັດຖະບານລາວ ໄດ້ມີຫຼາຍມາດຕະການເພື່ອຮັບມືເຊັ່ນ: ເລັ່ງໃສ່ຊຸກຍູ້ການຜະລິດກະສິກໍາພາຍໃນຕາມທ່າແຮງຂອງແຕ່ລະທ້ອງຖິ່ນ, ເອົາໃຈໃສ່ແກ້ໄຂຂໍ້ຫຍຸ້ງຍາກການສົ່ງອອກສິນຄ້າກະສິກຳ, ຊຸກຍູ້ໂຄງການລົງທຶນ ຂອງຕ່າງປະເທດ ແລະ ອື່ນໆ. ພິເສດ ລັດຖະບານລາວໄດ້ວາງກໍານົດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໃນ 3 ປີຕໍ່ຫນ້າ.

ນອກຈາກນັ້ນ ສອງຝ່າຍໄດ້ຕົກລົງເປັນເອກະພາບກັນ ກຳນົດບາງວຽກງານທີ່ສອງຂະແໜງການຈະຕ້ອງໄດ້ເອົາໃຈໃສ່ ສືບຕໍ່ຜັນຂະຫຍາຍໃຫ້ປະ​ກົດ​ຜົນເປັນຈິງ ເຊັ່ນ: ສືບຕໍ່ຮ່ວມກັນຊຸກຍູ້ຂອບການຮ່ວມມືພັດທະນາແລວທາງເສດຖະກິດລາວ-ຈີນ ໃຫ້ປະກົດຜົນເປັນຮູບປະທໍາ ຊຶ່ງຝ່າຍຈີນຈະສືບຕໍ່ຊ່ວຍຝ່າຍລາວຄົ້ນຄວ້າ ແລະ ກໍານົດເປັນແຜນປະຕິບັດງານ ຮ່ວມກັນຊຸກຍູ້ໂຄງການຮ່ວມມືຂອບຄວາມອາດສາມາດການຜະລິດ ແລະ ການລົງທຶນຊຸດທີ 3 ໃຫ້ເກີດຜົນເປັນຈິງ ຊຶ່ງຄັ້ງນີ້ມີ 32 ໂຄງການ, ໃນນັ້ນປະກອບມີຂະແໜງການພັດທະນາໂຄງລ່າງພື້ນຖານ, ພະລັງງານໄຟຟ້າ, ດ້ານກະສິກຳ,​ອຸດສາຫະກຳ, ພັດທະນາເຂດເມືອງໃໝ່​ ແລະ​ ຊຸກຍູ້ການຮ່ວມມືແລກປ່ຽນດ້ານວິຊາການ ລະຫວ່າງ ສອງຂະແໜງການ.​ ຝ່າຍລາວ ຍັງໄດ້ນໍາສະເໜີຝ່າຍຈີນສືບຕໍ່ສະໜັບສະໜູນໂຄງການລົງທຶນພື້້ນຖານໂຄງລ່າງຂະໜາດໃຫຍ່ ເຊັ່ນ ທາງດ່ວນໃນຮູບແບບ BOT ແລະ ໂຄງການ PPP ແລະ ການລົງທຶນອື່ນໆໃຫ້ຫຼາຍຂຶ້ນ.​

ນອກນັ້ນ,​ ສອງຝ່າຍຍັງໄດ້ເຊັນເອກະສານຮ່ວມມື 2 ສະບັບ ຄື: ບົດບັນທຶກຄວາມເຂົ້າໃຈ ການສ້າງຕັ້ງຄະນະປະສານງານຮ່ວມ ເພື່ອຈັດຕັ້ງປະຕິບັດຂອບການຮ່ວມມືແລວທາງເສດຖະກິດລາວ-ຈີນ ແລະ​ ສັນຍາວ່າດ້ວຍ “ການຢືນຢັນພ້ອມທັງຮ່ວມກັນຊຸກຍູ້ໂຄງການຮ່ວມມືຈຸດສຸມໃນຂອບຄວາມອາດສາມາດການຜະລິດ ແລະ ລົງທຶນ” ຊຸດທີ 3 ລະຫວ່າງ ກະຊວງແຜນການ ແລະ ການລົງທຶນ ສປປ ລາວ ກັບ ຄະນະພັດທະນາ ແລະ ປະຕິຮູບ ແຫ່ງຊາດຈີນ.

ຂ່າວ-ພາບ: ກະ​ຊວງ​ແຜນ​ການ ແລະ ການ​ລົງ​ທຶນ