ພົບປະໂອ້ລົມພະນັກງານສານປະຊາຊົນນະຄອນຫຼວງວຽງຈັນ

ໃນວັນທີ 17 ມິຖຸນາ 2021 ນີ້ ທີ່ສານປະຊາຊົນນະຄອນຫຼວງວຽງຈັນ ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ເລຂາຄະນະພັກ ປະທານສານປະຊາຊົນສູງສຸດໄດ້ລົງພົບປະໂອ້ລົມ ພະນັກງານສານປະຊາ ຊົນນະຄອນຫຼວງວຽງຈັນ ໂດຍໃຫ້ການຕ້ອນຮັບຂອງ ທ່ານ ແສງສຸວັນ ຈັນທະລຸນນະວົງ ປະທານສານປະຊາຊົນນະ ຄອນຫຼວງວຽງຈັນ ພ້ອມດ້ວຍພະນັກງານນຳພາຂອງສານ.

ໃນໂອກາດລົງພົບປະໃນຄັ້ງນີ້ ທ່ານ ແສງສຸວັນ ຈັນທະລຸນນະວົງ ກໍໄດ້ລາຍງານໂດຍຫຍໍ້ ກ່ຽວກັບການປະຕິບັດໜ້າທີ່ ແລະ ຄວາມຮັບຜິດຊອບ ຂອງສານປະຊາຊົນ ນະຄອນຫຼວງວຽງຈັນ ໃຫ້ ທ່ານ ນາງ ວຽງທອງ ສີພັນດອນ ຮັບຊາບໂດຍຫຍໍ້. ຈາກນັ້ນທ່ານ ນາງ ວຽງທອງ ສີພັນດອນ ໄດ້ສະແດງຄວາມຍ້ອງຍໍຊົມເຊີຍ ປະທານ ແລະ ພະນັກ ງານທັງໝົດຂອງສານທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນ ແລະ ໄດ້ມີຜົນສໍາເລັດຫຼາຍດ້ານກໍຕາມ, ແຕ່ຖ້າທຽບໃສ່ຄວາມຮຽກ ຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ແລ້ວ ເຫັນວ່າ ບັນດາທ່ານຍັງມີຫຼາຍດ້ານທີ່ຈະຕ້ອງໄດ້ບຸກໜ້າບືນຕົວຕື່ມອີກ ເປັນຕົ້ນ:

1. ຄະນະນະພັກ-ຄະນະນໍາ ຂອງສານປະຊາຊົນນະຄອນຫຼວງວຽງຈັນ ຕ້ອງເພີ່ມທະວີການຊີ້ນໍາ-ນໍາພາວຽກງານການເມືອງ-ແນວຄິດ, ວຽກງານວິຊາສະເພາະທີ່ຕົນຮັບຜິດຊອບຢ່າງເຂັ້ມງວດ ຕາມສິດ ແລະ ໜ້າທີ່ຂອງປະທານ ແລະ ຮອງປະທານ ທີ່ໄດ້ກໍານົດໄວ້ໃນ ມາດຕາ 40 ແລະ 41 ຂອງກົດໝາຍວ່າດ້ວຍສານປະຊາຊົນ

2. ເພີ່ມທະວີການປັບປຸງລະບົບການຈັດຕັ້ງ ກໍຄືການເຄື່ອນໄຫວວຽກງານຂອງສານປະຊາຊົນ ໃຫ້ມີຄວາມກະທັດຮັດທາງດ້ານການຈັດຕັ້ງ, ໜັກແໜ້ນທາງດ້ານການເມືອງ, ມີຄວາມໂປ່ງໃສ ແລະ ເຂັ້ມແຂງທາງດ້ານວິຊາການ.

3. ເອົາໃຈໃສ່ໃນການຍົກລະດັບວິຊາການທາງດ້ານກົດໝາຍເປັນຕົ້ນແມ່ນກົດໝາຍແພ່ງ, ກົດໝາຍອາຍາ, ກົດໝາຍ ການດໍາເນີນຄະດີແພ່ງ, ດໍາເນີນຄະດີອາຍາ ແລະ ກົດໝາຍອື່ນໆ ໃຫ້ຜູ້ພິພາກສາທຸກຂັ້ນ ເພື່ອໃຫ້ມີຄວາມເຂົ້າໃຈຢ່າງເປັນເອກະພາບກັບບັນດາມາດຕາຕ່າງໆທີ່ກໍານົດໄວ້ໃນກົດໝາຍ, ຮັບປະກັນເຮັດໃຫ້ການຕັດສິນຄະດີ ມີຄວາມຖືກຕ້ອງເປັນທໍາ, ລວມທັງວິທີການດໍາເນີນຄະດີ ແລະ ການພິຈາລະນາຕັດສິນຄະດີໃຫ້ເລິກເຊິ່ງກວ່າເກົ່າ

4. ຕ້ອງເພີ່ມທະວີການພົວພັນ ແລະ ຮ່ວມມື ກັນທັງພາຍໃນ ແລະ ຕ່າງປະເທດ, ພົວພັນ ແລະ ປະສານງານກັບຂະແໜງການ ແລະ ອົງການປົກຄອງທ້ອງຖິ່ນທີ່ກ່ຽວຂ້ອງໃຫ້ແໜ້ນແຟ້ນ ເພື່ອແກ້ໄຂຄວາມຂັດແຍ່ງຕ່າງໆທີ່ເກີດຂຶ້ນຢູ່ໃນສັງຄົມ ໂດຍຜ່ານຂະບວນການຍຸຕິທໍາໃຫ້ດີຂຶ້ນເປັນກ້າວໆ ບົນພື້ນຖານແນວທາງນະໂຍບາຍ ແລະ ລະບຽບກົດໝາຍຂອງລັດ, ຕ້ອງຍົກສູງຄວາມຮັບຜິດຊອບ ຖືວ່າການແກ້ໄຂຂໍ້ຂັດແຍ່ງທີ່ເກີດຂຶ້ນ, ການດໍາເນີນຄະດີ ຕາມຂະບວນຍຸຕິທໍາ ແມ່ນໜ້າທີ່ຂອງທຸກຄົນ.