ປະຊາຊົນສ່ອງແສງບັນຫາການສັນຈອນຈຸດທີ່ມັກເກີດມີອຸບັດຕິເຫດ

ປະຊາຊົນ ແລະ ຜູ້ຄ້າຂາຍເຄື່ອງຢູ່ແຄມທາງຈຸດເຊື່ອມຕໍ່ ບ້ານສົມສະຫງ່າ-ບ້ານຄຳສະຫວາດ ເມືອງໄຊເສດຖາ ນະຄອນຫລວງວຽງວຽງຈັນ ໄດ້ສ່ອງແສງວ່າ: ເສັ້ນທາງເລນທີ່ມາແຕ່ສົມສະຫງ່າ ກົງກັນຂ້າມກັບຈຸດຂາຍໝາກກ້ວຍ ຂີ່ຊື່ມາແລ້ວເລນໜຶ່ງບໍ່ມີ ສ້າງອັນຕະລາຍແກ່ຜູ້ໃຊ້ລົດໃຊ້ຖະໜົນ ຜ່ານມາປາກົດເຫັນມີການເກີດອຸບັດຕິເຫດຫລາຍຄັ້ງ ໂດຍສະເພາະແມ່ນຕອນກາງຄືນ ຜ່ານມາປະຊາຊົນເຂດໃກ້ຄຽງເຫັນວ່າມີອຸບັດຕິເຫດຢູ່ຈຸດດັ່ງກ່າວຫລາຍຄັ້ງຈຶ່ງໄດ້ເອົາຢາງຕີນລົດມາກັ້ນໝາຍໃວ້ ແຕ່ກະຍັງມັກເກີດຂຶ້ນຄືເກົ່າ ຈົນມາຮອດຊ່ວງກ່ອນເຂົ້າພາສາ ຈຶ່ງມີໜ່ວຍງານເອົາແທ່ງແບລີເອີຢາງມາໃສອຸບັດຕິເຫດຈຶ່ງຄ່ອຍຫລຸດລົງແດ່ ແຕ່ກໍຍັງມີອຸບັດຕິເຫດຢູ່ໃຫ້ເຫັນເປັນໄລຍະ ໂດຍສະເພາະຄົນທີ່ບໍ່ລື້ງເສັ້ນທາງນີ້ ເມື່ອຂັບຂີ່ມາຮອດຈຸດດັ່ງກ່າວມັກຈະຫັກລົບບໍ່ທັນ. ປະຊາຊົນທີ່ອາໄສຢູ່ເຂດດັ່ງກ່າວໃຫ້ສຳພາດຕື່ມວ່າ: ເສັ້ນທາງນີ້ໄດ້ຮັບການກໍ່ສ້າງ ແລະ ເປີດນຳໃຊ້ມາໄດ້ຫລາຍປີສົມຄວນ ແຕ່ຍັງພົບວ່າຈຸດດັ່ງກ່າວຖືກປ່ອຍປະລະເລີຍ.

ຜ່ານມາມີອຸບັດເຫດເກີດຂຶ້ນຈຳນວນຫລາຍ ໂດຍສະເພາະກາງຄືນ ບວກໃສ່ກັບເສັ້ນທາງຈຸດນີ້ມືດຍ້ອນບໍ່ມີໄຟເຍືອງທາງ, ເພື່ອແກ້ໄຂບັນຫາສະເພາະໜ້າ ໄດ້ມີຄົນນຳເອົາແທ່ງແບຣີເອີ ມາກັ້ນເປັນສັນຍະລັກເຕືອນໄວ້. ວັນທີ 21 ຕຸລາ 2022 ຜ່ານມາ ທີມຂ່າວໜັງສືພິມລາວພັດທະນາ ໄດ້ລົງໄປເບິ່ງຕົວຈິງພົບວ່າ: ຈຸດດັ່ງກ່າວ ເປັນເສັ້ນທາງສີ່ເລນ ທີ່ປູດ້ວຍເບຕົງ ແຕ່ພໍຂີ່ມາເຖິງຈຸດດັ່ງກ່າວ ເລນຂອກ ຍັງກໍ່ສ້າງບໍ່ທັນສຳເລັດເທື່ອ ລົດທີ່ແລ່ນມາຕ້ອງຄ່ອຍແລ້ວຍ້າຍເຂົ້າເລນກາງ ເຮັດໃຫ້ການສັນຈອນພົບບັນຫາ ຖ້າເປັນຕອນສວຍອາດພໍແນມເຫັນແທ່ງແບລີເອີກັ້ນເຕືອນຢູ່ ແຕ່ຖ້າເປັນກາງຄືນກໍບໍ່ຄ່ອຍແນມເຫັນປັນໃດ ເພາະຈຸດດັ່ງກ່າວບໍ່ມີໄຟເຢືອງທາງ. ສຳລັບທ່ານໃດຈະເດີນທາງເສັ້ນດັ່ງກ່າວຕ້ອງລະມັດລະວັງເພື່ອປ້ອງກັນອຸບັດເຫດ. ຝາກເຖິງພາກສ່ວນກ່ຽວຂ້ອງລົງກວດກາເບິ່ງຕົວຈິງ ວ່າບັນຫາດັ່ງກ່າວນີ້ ຖືກປ່ອຍປະລະເລີຍມາເປັນເວລາດົນສົມຄວນໄດ້ແນວໃດ ແລະ ຈະມີທິດທາງແກ້ໄຂຄືແນວໃດ ເພື່ອບໍ່ໃຫ້ເກີດມີການສູນເສຍຊີວິດ ແລະ ຊັບສິນ ແກ່ຜູ້ໃຊ້ລົດໃຊ້ຖະໜົນຜ່ານຈຸດດັ່ງກ່າວນັ້ນ.