ໂຄວິດຍັງເປັນພາວະສຸກເສີນດ້ານສາທາລະນະສຸກສາກົນຢູ່

ອົງການອະນາໄມໂລກເນັ້ນວ່າ: ເຖິງວ່າສະຖານະການມີທ່າອ່ຽງດີຂຶ້ນເປັນລຳດັບ, ແຕ່ໂຄວິດ-19 ຍັງເປັນ “ພາວະສຸກເສີນດ້ານສາທາລະນະສຸກສາກົນ”. ວັນທີ 20 ຕຸລາ 2022, ສຳນັກຂ່າວຕ່າງປະເທດລາຍງານວ່າ: ອົງການອະນາໄມໂລກ (WHO) ອອກຖະແຫລງການວ່າ: ສະຖານະການການແພ່ລະບາດຂອງພະຍາດໂຄວິດ-19 ຍັງຖືເປັນ “ພາວະສຸກເສີນດ້ານສາທາລະນະສຸກສາກົນ” ໂດຍ WHO ປະກາດເລື່ອງດັ່ງກ່າວເປັນຄັ້ງທຳອິດໃນວັນທີ 30 ມັງກອນ 2020. ເຖິງວ່າທ່າອ່ຽງພົບຜູ້ຕິດເຊື້ອໃໝ່ຫລຸດລົງຫລາຍໃນເກືອບທຸກພາກພື້ນຂອງໂລກ.

ເຖິງຢ່າງໃດກໍຕາມ, WHO ເນັ້ນວ່າ: ສະຖານະການທີ່ດຳເນີນຢູ່ຍັງມີຄວາມສຳຄັນຫລາຍໃນດ້ານສາທາລະນະສຸກ ແລະ ຍັງມີຄວາມຈຳເປັນໃນລະດັບສູງເຊັ່ນກັນ ທີ່ກຸ່ມສ່ຽງສູງ ແລະ ກຸ່ມບອບບາງຕ້ອງໄດ້ຮັບການສັກວັກຊີນຢ່າງທົ່ວເຖິງ. ຂະນະທີ່, ຜູ້ອຳນວຍການ WHO ກ່າວອີກວ່າ: ສະຖິຕິຜູ້ເສຍຊີວິດປະຈຳອາທິດຈາກພະຍາດໂຄວິດ-19 ກຳລັງຢູ່ໃນລະດັບຕໍ່າທີ່ສຸດ ນັບແຕ່ການເກີດຂຶ້ນຂອງພະຍາດ, ແຕ່ເມື່ອທຽບໃສ່ອັດຕາການເສຍຊີວິດຈາກພະຍາດອື່ນຖືວ່າ “ຍັງສູງຫລາຍ” ແລະ ກ່າວອີກວ່າ: “ໂຄວິດ-19 ເປັນພະຍາດທີ່ສ້າງຄວາມປະຫລາດໃຈໃຫ້ມະນຸດຫລາຍຄັ້ງແລ້ວ ແລະ ອາດເກີດຂຶ້ນອີກໄດ້”.

Facebook Comments Box

Similar Posts