ໂຕໂນ່ໄດ້ຮັບໃບຍ້ອງຍໍຈາກແຂວງຄຳມ່ວນ

ແຂວງຄຳມ່ວນໄດ້ສະຫຼຸບເຫດການຄັ້ງປະຫວັດສາດສອງຊາດລາວ-ໄທ ກັບພາລະກິດລອຍຂ້າມນໍ້າຂອງ ຂອງໜຸ່ມໂຕໂນ້ໃນມື້ວານນີ້ ໃນວັນທີ 22 ຕຸລາ 2022 ກິດຈະກຳ ລອຍຂ້າມແມ່ນໍ້າຂອງ ຈາກຈັງຫວັດນະຄອນພະນົມ ປະເທດໄທ ມາຫາແຂວງຄຳມ່ວນ ສປປ ລາວ ໃນໂຄງການ One Man And The River (ໜຶ່ງຄົນນໍາພາລອຍ ຫຼາຍຄົນເປັນຜູ້ໃຫ້) ເຊິ່ງນໍາພາໂດຍ ໂຕໂນ່ ພາຄິນ ຄຳວິໄລສັກ ນັກຮ້ອງຊື່ດັງຂອງໄທ ເພື່ອລະດົມທຶນຊື້ອຸປະກອນການແພດຊ່ວຍເຫຼືອໂຮງໝໍ ຈັງຫວັດນະຄອນພະນົມ ແລະ ໂຮງໝໍແຂວງຄຳມ່ວນ.

ເຊິ່ງກິດຈະກຳດັ່ງກ່າວແມ່ນຈັດຂຶ້ນໃນວັນທີ 22 ຕຸລາ 2022 ໂດຍເລີ່ມຈາກລານພະຍາສີສັດຕະນະຄະຣາຊ ນະຄອນພະນົມ ມາຂຶ້ນຝັ່ງທີ່ພຣະທາດສີໂຄດຕະບອງ ເມືອງທ່າແຂກ ແຂວງຄຳມ່ວນ ເຮັດໃຫ້ບັນຍາກາດແຄມຝັ່ງແມ່ນໍ້າຂອງ ທີ່ພຣະທາດສີໂຄດຕະບອງ ເຕັມໄປດ້ວຍພໍ່ແມ່ປະຊາຊົນທີ່ແຫ່ມາໃຫ້ກຳລັງໃຈຢ່າງຫຼວງຫຼາຍ. ພາຍຫຼັງທີ່ຂຶ້ນຝັ່ງແລ້ວ ໂຕໂນ່ ກໍ່ໄດ້ເຂົ້າກາບໄຫວ້ສັກກາລະບູຊາພຣະທາດສີໂຄດຕະບອງ ແລ້ວເຂົ້າໄປຢ້ຽມຢາມໂຮງໝໍແຂວງຄຳມ່ວນ ໂດຍມີພະນັກງານ ແພດ-ໝໍ ລໍຖ້າຕ້ອນຮັບ ຈາກນັ້ນກໍ່ໄດ້ເຂົ້າໄປທີ່ແຮມຣີເວີເຣ່ຍ ແລະ

ໄດ້ກ່າວສະແດງຄວາມຂອບໃຈຕໍ່ທຸກພາກສ່ວນທາງຝັ່ງ ສປປ ລາວ ທີ່ໃຫ້ການຮ່ວມມື ແລະ ປະກອບສ່ວນສະໜັບສະໜູນໃນກິດຈະກຳດັ່ງກ່າວ ຄະນະດຽວກັນນີ້ ທ່ານ ປອ ແກ້ວ ອຸດອນ ບຸດສິງຂອນ ຮອງເຈົ້າແຂວງຄຳມ່ວນ ກໍ່ໄດ້ມອບໃບຍ້ອງຍໍໃຫ້ແກ່ ໂຕໂນ່ ພ້ອມທັງກ່າວສະແດງຄວາມຍ້ອງຍໍຊົມເຊີຍມາຍັງຄະນະກຳມະການຮັບຜິດຊອບຈັດກິດຈະກຳທັງສອງຝ່າຍ ແລະ ທຸກພາກສ່ວນໃນທົ່ວສັງຄົມ ລາວ-ໄທ ທີ່ໄດ້ປະກອບສ່ວນຢ່າງຕັ້ງໜ້າ ເຮັດໃຫ້ການຈັດກິດຈະກຳໃນຄັ້ງນີ້ດຳເນີນໄປດ້ວຍຄວາມຮັບຜິດຊອບສູງ ແລະ ມີຜົນສຳເລັດ.

ໃນເວລາ 16:00 ໂມງ ໂດຍປະມານ ໂຕໂນ່ ກໍ່ໄດ້ເລີ່ມລົງລອຍນໍ້າກັບຄືນ ຈາກຫາດບ້ານນາເມືອງ ໄປຂຶ້ນຝັ່ງທີ່ ລານພະຍາສີສັດຕະນະຄະຣາຊ ຝັ່ງໄທ ເຊິ່ງລວມໄລຍະທາງລອຍ ໄປ-ກັບ ປະມານ 15 ກິໂລແມັດ. ກິດຈະກຳດັ່ງກ່າວ ແມ່ນມີຈຸດປະສົງ ເພື່ອລະດົມທຶນບໍລິຈາກ ໃນການຈັດຊື້ອຸປະກອນທາງການແພດ ໃຫ້ກັບໂຮງໝໍຈັງຫວັດນະຄອນພະນົມ ແລະ ໂຮງໝໍແຂວງຄຳມ່ວນ ເພື່ອປະກອບເຂົ້າໃນການປິ່ນປົວຮັກສາຜູ້ເຈັບປ່ວຍ. ສຳລັບຜູ້ທີ່ຢາກປະກອບສ່ວນບໍລິຈາກ ແມ່ນສາມາດບໍລິຈາກໄດ້ ຜ່ານຊ່ອງທາງຕ່າງໆ ທີ່ທາງຄະນະກຳມະການຮັບຜິດຊອບຈັດງານໄດ້ແຈ້ງໄວ້ ແຕ່ນີ້ໄປຈົນຮອດວັນທີ 31 ຕຸລາ 2022.