ແຈ້ງເຕືອນຝົນຕົກໜັກປະຈໍາວັນທີ 24 ກໍ​ລະ​ກົດ 2021

ລົມພາຍຸດີເປຼ່ຊັນ ເຈິມປາກາ ໄດ້ອ່ອນກຳລັງລົງ ກາຍເປັນຄວາມກົດດັນອາກາດຕ່ຳທີ່ມີກຳລັງແຮງ ປົກຄຸມຢູ່ພາກກາງຕອນເໜືອຂອງ ສສ ຫວຽດນາມ, ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມດ້ວຍກຳລັງແຮງ, ຊຶ່ງຈະເຮັດໃຫ້ ມີຝົນຕົກຟ້າຮ້ອງຟ້າເຫຼື້ອມໃນ​ລະ​ດັບ​ຄ່ອຍ ຫາ ປານກາງ​ຢູ່ເກືອບທົ່ວໄປໃນແຕ່ລະພາກ ແລະ ຕົກ ໜັກ ຫາ ໜັກຫຼາຍພ້ອມມີລົມພັດແຮງຢູ່ບາງທ້ອງຖິ່ນແຂວງພາກກາງ ແລະ ພາກໃຕ້​. ດັ່ງນັ້ນ ຈຶ່ງຂໍແຈ້ງເຕືອນເຖີງປະຊາຊົນບັນດາເຜົ່າທີ່ອາໄສຢູ່ບັນດາແຂວງພາກກາງ ແລະ ພາກໃຕ້

ໂດຍສະເພາະຜູ້ທີ່ອາໄສຢູ່ຕາມຮ່ອມພູ ແລະ ລຽບຕາມແຄມເຊບັ້ງໄຟ, ເມືອງ ມະຫາໄຊ, ເມືອງ ເຊບັ້ງໄຟ ແຂວງ ຄຳມ່ວນ ແລະ ເມືອງ ໄຊບູລີ ແຂວງ ສະຫວັນນະເຂດ ຈົ່ງມີສະຕິ ຕໍ່ສະພາບຝົນຕົກໜັກ ທີ່ຈະເຮັດໃຫ້ເກີດນໍ້າຖ້ວມຍຶ່ງ, ນໍ້າຖ້ວມຊຸ ແລະ ດິນເຈື່ອນໃນໄລຍະນີ້, ພ້ອມທັງກຽມຍົກຍ້າຍ ແລະ ເກັບມ້ຽນວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ສູງ ແລະ ປອດໄພ, ພ້ອມນີ້ຂໍໃຫ້ຕິດຕາມການລາຍງານຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.