ເສັ້ນທາງລອດອຸມົງທາງລົດໄຟນາທົ່ມ-ວຽງແກ້ວເປ່ເພໜັກ

ປະຊາຊົນສ່ອງແສງ! ເສັ້ນທາງລອດອຸມົງທາງລົດໄຟ ນາທົ່ມ-ວຽງແກ້ວ ເປ່ເພໜັກ ວັນທີ 24 ຕຸລາ 2022 ນີ້ ທີມງານຂ່າວໜັງສືພິມລາວພັດທະນາ ໄດ້ລົງໄປເບິ່ງສະຖານທີ່ຕົວຈິງ ຕາມການສ່ອງແສງຂອງປະຊາຊົນ ທີ່ອາໄສຢູ່ເຂດໃກ້ທາງລົດໄຟລາວຈີນ ບ້ານນາທົ່ມ ເມືອງໄຊນາທີ ນະຄອນຫລວງວຽງຈັນ ເຫັນວ່າ:

ສະພາບເສັ້ນທາງທານທົ່ມ-ວຽງແກ້ວ ຈຸດລອດອຸມົງ ທາງລົດໄຟລາວ-ຈີນ ມີສະພາບເປັນບວກຂຸມເລິກ ແລະ ມີນໍ້າຫົ້ງເປັນບວກ ໂດຍສະເພາະເບື້ອງບ້ານວຽງແກ້ວ ຈະລອດເຂົ້າອຸມົງ ເຊິ່ງສ້າງຄວາມຫຍຸ້ງຍາກແກ່ການສັນຈອນໄປມາຂອງຜູ້ໃຊ້ລົດໃຊ້ຖະໜົນ, ລົດຈັກລົດເກັ໋ງ ຕ້ອງໄດ້ເວັ້ນຈາກຂຸມ ແລະ ຫາກມີລົດສວນທາງມາກໍຈຳເປັນຕ້ອງໄດ້ໂຕນຂຸມ ເຊິ່ງອາດເຮັດໃຫ້ເກີດອຸບັດເຫດ

ຫລື ເຮັດໃຫ້ລົດໄດ້ຮັບຮອຍຂູດຂີດພື້ນທ້ອງລົດຈາກຂອບຂຸມດັ່ງກ່າວນັ້ນ ອາດເຮັດໃຫ້ລົດເປ່ເພໄດ້. ນອກຈາກນີ້, ມີລົດເກັ໋ງບາງຄັນ ຮອດຈຸດດັ່ງກ່າວ ຫາກພໍດີມີລົດສວນເລນມາ ກໍຈະຢຸດ ບໍ່ຍອມໂຕນຂຸມ ເຮັດໃຫ້ເກີດມີສະພາບການສັນຈອດແອອັດ. ປະຊາຊົນທີ່ອາໄສຢູ່ຈຸດດັ່ງກ່າວ ໄດ້ໃຫ້ສຳພາດວ່າ: ບັນຫາດັ່ງກ່າວນີ້

ເປັນບັນຫາຊຳເຮື້ອມາດົນເຕີບ ຕັ້ງແຕ່ຕົ້ນລະດູຝົນ ເຊິ່ງບາງຄັ້ງກໍມີປະຊາຊົນເອົາດິນມາຖົມໃສ່ ພໍໃຫ້ລົດແລ່ນໄປມາໄດ້ ແຕ່ເມື່ອມີຝົນຕົກລົງມາ ດິນດັ່ງກ່າວກໍໄຫລອອກໄປໝົດ ແລະ ມີສະພາບຄືເກົ່າດັ່ງທີ່ເຫັນ. ຫວັງວ່າບັນຫານີ້ຈະໄດ້ຮັບການແກ້ໄຂຈາກພາກສ່ວນກ່ຽວຂ້ອງໂດຍໄວ ເພື່ອຄວາມສະດວກສະບາຍແກ່ຜູ້ສັນຈອນໄປມາ.