ເຮືອນຈັດສັນທີ່ສ້າງໃຫ້ຜູ້ຖືກໂຄງການໄຟຟ້າຫົງສາໃກ້ຈະສ້າງສໍາເລັດແລ້ວ

ການກໍ່ສ້າງເຮືອນ 136 ຫຼັງຢູ່ບ້ານຈັດສັນໃໝ່ ຂອງບ້ານກິ່ວງີ້ວ ເມືອງເງິນ ແຂວງໄຊຍະບູລີ ທີ່ຖືກໂຄງການໄຟຟ້າຫົງສາໄດ້ເລີ່ມລົງມືກໍ່ສ້າງມາແຕ່ວັນທີ 1 ມີນາ 2021 ຄາດວ່າສຳເລັດວັນທີ 30 ພະຈິກ 2021 (ກຳນົດເວລາ 9 ເດືອນ) ໂດຍແມ່ນ ບໍລິສັດ ສີກັນໄຈ ເປັນຜູ້ຮັບເໝົາກໍ່ສ້າງ. ການກໍ່ສ້າງເຮືອນຈັດສັນດັ່ງກ່າວ ແມ່ນໄດ້ປະຕິບັດຕາມໂຄງການດຳເນີນງານກໍຄືຄະ ນະກຳມະການຮັບຜິດຊອບ ຄຸ້ມຄອງໂຄງການຂັ້ນເມືອງ ຊຶ່ງເຮືອນຈໍານວນ 136 ຫຼັງນັ້ນປະກອບມີເຮືອນ 3 ປະເພດ ຄື: ເຮືອນປະເພດ 1 ມີ 10 ຫຼັງ ມູນຄ່າ 203.457 ໂດລາ, ເຮືອນປະເພດ 2 ມີ 6 ຫຼັງ ມູນຄ່າ 122.523 ໂດລາ ແລະ ເຮືອນປະເພດ 3 ມີ 120 ຫຼັງ ມູນຄ່າ 1.941.142 ໂດລາ ລວມມູນຄ່າທັງໝົດ 2.267.123 ໂດລາ.

ທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ ພ້ອມດ້ວຍທີມງານໄດ້ມາຕິດຕາມ ຄວາມ ຄືບໜ້າ ຂອງໂຄງການກໍ່ສ້າງເຮືອນຈັດສັນໃໝ່ດັ່ງກ່າວເມື່ອບໍ່ດົນມານີ້ໃນວັນທີ 21 ພຶດສະພາຜ່ານມານີ້, ເນື່ອງໃນໂອກາດດັ່ງກ່າວ ທ່ານຮອງເຈົ້າແຂວງ ໄດ້ເນັ້ນໃຫ້ພາກສ່ວນທີ່ກ່ຽວ ຂ້ອງໄດ້ລົງກວດກາ, ຕິດຕາມຢ່າງເປັນປົກກະຕິ ແລະ ເອົາໃຈໃສ່ຕິດຕາມໂຄງການທີ່ເຊັນສັນຍາແລ້ວກະກຽມການ ກໍ່ສ້າງຄື: ໂຮງຮຽນອະນຸບານ-ປະຖົມ, ຫ້ອງການບ້ານ, ຕະຫຼາດ, ລະບົບໄຟຟ້າ, ລະບົບນ້ຳໃຊ້ພາຍໃນບ້ານ, ປູຢາງເສັ້ນທາງແຕ່ລະຮ່ອມພາຍໃນບ້ານ ພ້ອມທັງແນະນຳໃຫ້ຜູ້ຮັບເໝົາ ເອົາໃຈໃສ່ຕິດ ຕາມຊຸກຍູ້ ເພື່ອເຮັດໃຫ້ການກໍ່ສ້າງສຳເລັດຕາມຄາດໝາຍທີ່ວາງໄວ້.