ສາວງາມຢືມລົດແຟນຊາວຈີນໄປຂີ່ສຸດທ້າຍຖືກຕຳຫຼວດຈັບຍ້ອນມີອັນນັ້ນໃນລົດ

ມີຍາເສຕິໄວ້ຄອບຄອງຖືກຈັບຕົວດຳເນີນຄະດີ ເວລາ 23:54 ໂມງ ຂອງວັນທີ 24 ຕຸລາ 2021, ພະແນກຕໍາ ຫຼວດຈະລາຈອນ ນວ, ຕັ້ງຈຸດກວດກາຍານພາຫະນະຢູ່ຖະໜົນລ້ານຊ້າງ, ໃນຂະນະກຳລັງປະຕິບັດໜ້າທີ່ເຫັນລົດເກັງໂຕໂຢຕ້າແກນເລີໝາຍເລກທະບຽນ ກຣ 8704 ຂັບຂີ່ໂດຍ ນາງ ນ່ານ່າ ອາຍຸ 21 ປີ ວ່າງງານ, ພັກເຊົາຢູ່ອາພາດເມັ້ນ ເຂດບ້ານຈອມມະນີ ເມືອງຈັນທະບູລີ ນວ, ຜ່ານການການກວດກາຕົວຈິງເຈົ້າໜ້າທີ່ພົບເຫັນວັດຖຸເປັນແທ່ງ 1 ອັນສົງໄສຍາເສຕິປະເພດຢາໄອ້, ເຈົ້າໜ້າທີ່ກຳລັງກວດຈຸດຈິ່ງໄດ້ກັກຕົວ ນາງ ນ່ານ່າ ໄວ້ແລ້ວນຳສົ່ງໄປສືບສວນ-ສອບສວນ. ຜ່ານການການສືບສວນ-ສອບສວນເບື້ອງຕົ້ນ ນາງ ນ່ານ່າ ຮັບສາລະ ພາບວ່າ: ວັດຖຸເປັນແທ່ງ 1 ອັນທີ່ເຈົ້າໜ້າທີ່ພົບເຫັນໃນລົດເວລາ

ຖືກກວດກາຢູ່ຈຸດກວດກາຖະໜົນລ້ານຊ້າງ(ເຂດຫໍຄໍາ) ນັ້ນແມ່ນວັດຖຸຂອງແຟນຊາຍສັນຊາດຈີນປະວາງໄວ້ລົດ; ໃນມື້ເກີດເຫດເວລາປະມານ 22 ໂມງ ຕົນເອງໄດ້ຂໍຢືມລົດນຳແຟນຊາຍຂັບຂີ່ຈະກັບບ່ອນພັກເຊົາຢູ່ອາພາດເມັ້ນເຂດບ້ານຈອມມະນີໃນເວລາຂັບຂີ່ໄປຕາມຖະໜົນຈິ່ງຖືກເຈົ້າໜ້າທີ່ກວດພົບ. ສຳລັບບັນຫາດັ່ງກ່າວເຫັນວ່າຍັງມີຄວາມຈຳເປັນຕ້ອງໄດ້ກວດກາຊັນນະສູດແລະດຳເນີນຄະດີໃຫ້ລະອຽດຈະແຈ້ງ, ຊອກຜູ້ກະທຳຜິດ ແລະຜູ້ສົມຮູ້ຮ່ວມຄິດມາດຳເນີນຄະດີ. ຕຳຫຼວດຈະລາຈອນຈິ່ງໄດ້ສົ່ງ ນາງ ນ່ານ່າ ໃຫ້ພະແນກຕໍາຫຼວດສະກັດ ກັ້ນແລະຕ້ານຍາເສຕິ ນະຄອນຫຼວງວຽງຈັນ ເປີດກວ້າງຂະຫຍາຍຜົນສືບຄົ້ນຫາຜູ້ກະທຳຜິດມາລົງໂທດຕາມ ກົດໝາຍ.