ຜ່ານມາເປັນໄລຍະເວລາ 4 ເດືອນແລ້ວການລັດຖະປະຫານຂອງນາຍພົນ ມິນ ອອງຫລ່າຍ

ຫລັງຈາກການລັດຖະປະຫານຂອງນາຍພົນ ມິນ ອອງຫລ່າຍ ເມື່ອວັນທີ່ 1/2/2021 ທີ່ຜ່ານມາເປັນໄລຍະເວລາ 4 ເດືອນ ທີ່ເຮັດລັດຖະປະຫານ ແລະ ລັດຖະບານທະຫານໄດ້ນຳຕົວ ທ່ານນາງອອງຊານຊູຈີ ທີ່ປຶກສາແຫ່ງລັດ , ທ່ານອູວິນ ມະຍິ່ນ ປະທານາທິບໍດີ ແລະ ອູມ່ຽວອ່ອງ ນາຍົກເທດສະມົນຕີ ນະຄອນຫລວງເນປີດໍ

ຂອງລັດຖະບານມຽນມາທີ່ຖືກລັດຖະປະຫານໄດ້ນຳຕົວມາຂື້ນສານເພື່ອພິຈາລະນາຄະດີ. ພາບຖ່າຍໃນຂະນະທີ່ນັ່ງໃນສານ ທີ່ນະຄອນຫລວງເນປີດໍ ເພື່ອຮັບຟັງຂໍຫາຄວາມຜິດ. ແລະ ຍັງເປັນຄັ້ງທຳອິດທີ່ສື່ MRTV ເປັນສື່ກະບອງສຽງຂອງລັດຖະບານທະຫານມຽນມາ ທີ່ໄດ້ເຜີຍພາບນິ່ງ ທາງສື່ TV.

ໃນວັນທີ 20 ພຶດສະພາ 2021 ທີ່ຜ່ານມາ ທ່ານ ມິນ ອອງ ລາຍ ໄດ້ໃຫ້ສຳພາດທາງໂທລະພາບ ຊ່ອງ Phoenix Television ລາຍການ Talk with world leaders ເຊິ່ງເປັນສະຖານີໂທລະພາບຂອງຮ່ອງກົງ ໂດຍປະເດັນທີ່ໃຫ້ສຳພາດແມ່ນກ່ຽວກັບລັດຖະປະຫານ ແລະ ຄວາມວຸ່ນວາຍໃນມຽນມາ ເຊິ່ງເປັນເທື່ອທຳອິດໃນການໃຫ້ສຳພາດກັບສື່ຕ່າງປະເທດ ນັບແຕ່ລັດຖະປະຫານເມື່ອວັນທີ 1 ກຸມພາ 2021 ທີ່ຜ່ານມາ.

1)ປະເດັນການໃຫ້ຄວາມເຊື່ອໝັ້ນກັບນັກລົງທຶນຈີນ

ເຖິງແມ່ນວ່າໂຮງງານຫຼາຍແຫ່ງຂອງນາຍທຶນຈີນ ໃນຢາງກຸ້ງ ຖືກເຜົາໄໝ້ເສຍຫາຍ ມັນບໍ່ໄດ້ໝາຍຄວາມວ່າພົນລະເມືອງເຮົາກຽດຊັງຈີນ ແຕ່ມັນຍ້ອນເຫດຜົນທາງການເມືອງ; ພວກຂ້າພະເຈົ້າຍັງໄດ້ລົງພື້ນທີ່ຢ້ຽມຢາມເຂດອຸດສາຫະກຳທີ່ຖືກເຜົາ ແລະ ໄດ້ອອກຄຳສັ່ງໃຫ້ເຈົ້າໜ້າທີ່ປ້ອງກັນໂຄງການລົງທຶນຂອງຈີນໃນເຂດດັ່ງກ່າວ ໃຫ້ເຕັມທີ່.

2)ປະເດັນ ນາງ ອອງຊານ ຊູຈີ

ທ່ານ ນາງ ອອງຊານ ຊູຈີ ຍັງສຸຂະພາບແຂງແຮງດີ ແລະ ຍັງຢູ່ໃນບ້ານ ເຊິ່ງຈະມີກຳນົດຂຶ້ນສານໃນບໍ່ນານນີ້ (ເຊິ່ງນາງອອງຊານ ຊູຈີ ໄດ້ປະກົດຕໍ່ໜ້າມວນຊົນໃນມື້ວານນີ້ ວັນທີ 24 ພຶດສະພາ 2021).

3)ປະເດັນຕົວເລກຜູ້ເສຍຊີວິດ

ຈາກຂໍ້ມູນສະມາຄົມຊ່ວຍເຫຼືອນັກໂທດການເມືອງລະບຸວ່າ ມີຜູ້ເສຍຊີວິດຢ່າງນ້ອຍ 815 ຄົນ, ແຕ່ທາງດ້ານທ່ານ ມິນ ອອງ ລາຍ ຊີ້ແຈງວ່າ: ຕົວເລກຜູ້ເສຍຊີວິດ ມີພຽງ 300 ຄົນ ໃນນັ້ນ ເປັນເຈົ້າໜ້າທີ່ຕຳຫຼວດ 47 ຄົນ ແລະ ບາດເຈັບອີກ 200 ຄົນ.,

4)ປະເດັນຄວາມຂັດແຍ່ງ

ທ່ານ ມິນ ອອງ ລາຍ ໝັ້ນໃຈວ່າ ຄວາມຂັດແຍ່ງຈະບໍ່ບານປາຍ ແລະ ແນ່ໃຈວ່າຈະບໍ່ເກີດສົງຄາມກາງເມືອງ.

5) ປະເດັນແນວທາງປະຊາທິປະໄຕ

ຫຼັງຈາກຢຶດອຳນາດ ກອງທັບມຽນມາຈະປະກາດພາວະສຸກເສີນ 1 ປີ ແລະ ຈະປະກາດການເລືອກຕັ້ງອີກຄັ້ງ ທັງນີ້ກໍ່ຂຶ້ນກັບບັນດາລັດຕ່າງໆ ທີ່ຈະໃຫ້ຄວາມຮ່ວມມືກັບກອງທັບມຽນມາ ຖ້າຫາກຍັງມີຄວາມຂັດແຍ່ງເກີດຂຶ້ນ ກໍ່ຈະເລື່ອນໄປອີກ 6 ເດືອນ.

6)ປະເດັນຂໍ້ຮຽກຮ້ອງຂອງອາຊຽນ

ຈາກຂໍ້ຮຽກຮ້ອງໃນກອງປະຊຸມອາຊຽນ ເມື່ອທ້າຍເດືອນເມສາທີ່ຜ່ານມາ ທີ່ໃຫ້ມຽນມາຢຸດຕິການໃຊ້ຄວາມຮຸນແຮງທັນທີ ແລະ ເປີດທາງໃຫ້ເຈົ້າໜ້າທີ່ທາງການທູດພິເສດ ເດີນທາງເຂົ້າມຽນມາ ທ່ານ ມິນ ອອງ ລາຍ ບອກວ່າ ຍັງປະຕິບັດຕາມຂໍ້ຮຽກຮ້ອງບໍ່ໄດ້.

7)ປະເດັນຊາວໂຣຮິງຢາ

ປະເດັນດັ່ງກ່າວ ຫາກບໍ່ສອດຄ່ອງກັບກົດໝາຍມຽນມາ ກໍ່ບໍ່ຈຳເປັນພິຈາລະນາອີກ ຂ້າພະເຈົ້າຄິດວ່າ ບໍ່ມີປະເທດໃດໃນໂລກ ທີ່ຈະໃຫ້ອຳນາດຜູ້ລີ້ໄພ ເກີນກວ່າທີ່ກົດໝາຍຂອງປະເທດຕົນເອງກຳນົດ.