ຂາຍເຂົ້າ​ສານ​ໜຽວ​ປະ​ເພດ2ໃນລາຄາຖືກ

ພະ​ແນກອຸດສາຫະກໍາ ແລະ ​ການ​ຄ້າ​ນະ​ຄອນຫຼວງວຽງ​ຈັນຮ່ວມ​ກັບ​ບໍ​ລິ​ສັດ ຄໍາແພງເພັດ ແຈ້ງສະຫວ່າງ ສົ່ງເສີມການກະເສດ ຂາອອກ-ຂາເຂົ້າຈຳກັດຜູ້ດຽວ ໄດ້​ນຳ​ເອົາ​ເຂົ້າ​ສານ​ໜຽວ​ປະ​ເພດ 2 ​ຈຳ​ນວນ 340 ໂຕນ ມາ​ຈຳ​ໜ່າຍ​ໃນ​ລາ​ຄາ 9.700 ກີບຕໍ່​ກິ​ໂລກ​ຣາມ ເຊິ່ງ​ຈຸດ​ຈຳ​ໜ່າຍ ຢູ່​ທີ່ບໍລິສັດ ຄຳແພງເພັດ ແຈ້ງສະຫວ່າງ ສົ່ງເສີມການກະເສດ ຂາອອກ-ຂາເຂົ້າ ຈຳກັດຜູ້ດຽວ ຕັ້ງຢູ່ບ້ານນາສ້ຽວ ຖະໜົນສີເກີດ-ດົງໂດກ ເມືອງ ນາຊາຍທອງ ເລີ່ມຂາຍເວລາແຕ່ 8:00 ໂມງ-17:00 ໂມງ ວັນຈັນ-ວັນສຸກ ຕັ້ງແຕ່ວັນທີ 24 ຕຸລາ-24 ທັນວາ 2022. ການນໍາເອົາເຂົ້າດັ່ງກ່າວມາຈໍາໜ່າຍໃນລາຄາທີ່ຖືກນີ້ ເພື່ອຮັບປະກັນໃຫ້ມີສະຖຽນລະພາບ ທາງດ້ານ ລາຄາ ມີຄວາມໝັ້ນຄົງທາງດ້ານການສະໜອງ ບໍ່ໃຫ້ມີຜົນກະທົບບໍ່ດີຕໍ່ສັງຄົມ ຫຼີກລ່ຽງສະພາບເຂົ້າກິນຂາດຕະຫຼາດ ແລະ ການເກງກໍາໄລທີ່ບໍ່ສົມເຫດສົມຜົນ.

ສະພາບລາຄາເຂົ້າກິນໃນໄລຍະ 6 ເດືອນຕົ້ນປີຜ່ານມາ ຢູ່ ນະຄອນຫຼວງວຽງຈັນ ເຫັນວ່າລາຄາເຂົ້າກິນໄດ້ປັບຂຶ້ນຢ່າງຕໍ່ເນື່ອງ ຄືສະພາບລາຄາເຂົ້າກິນຢູ່ນະຄອນຫຼວງວຽງຈັນໃນຕົ້ນປີ 2022 ມີທ່າອ່ຽງປັບຂຶ້ນລາຄາ, ມາຮອດປັດຈຸບັນ ລາຄາເຂົ້າເປືອກໜຽວ ສະເລ່ຍ 5.500 ກີບຕໍ່ກິໂລ ທຽບໃສ່ປີ 2021 ເພີ່ມຂຶ້ນ 34,14% ເຂົ້າສານໜຽວປະເພດ 2 ລາຄາສະເລ່ຍ 10.500 ກີບຕໍ່ກິໂລ ທຽບໃສ່ປີ 2021 ເພີ່ມຂຶ້ນ 36,36% ສາເຫດທີ່ເຂົ້າກິນໃນປີນີ້ມີລາຄາສູງຂຶ້ນ ຍ້ອນລາຄານໍ້າມັນເຊື້ອໄຟເພີ່ມ​ຂຶ້ນ, ອັດຕາແລກປ່ຽນ, ລາຄາປຸຍເພີ່ມ​ຂຶ້ນ, ສະພາບເງິນເຟີ້, ເຮັດໃຫ້ຄ່າຄອງຊີບສູງຂຶ້ນ ແລະ ອີກບັນຫາໜຶ່ງ ແມ່ນເນື່ອງຈາກວ່າໄລຍະນີ້ ເປັນລະດູການຜະລິດ ເຊິ່ງເຮັດໃຫ້ຊາວນາບໍ່ຂາຍເຂົ້າອອກ ຈົນກວ່າການເກັບກ່ຽວເຂົ້ານາປີສຳເລັດ ຈຶ່ງມີການຂາຍເຂົ້າອອກ ເປັນສາເຫດໜຶ່ງຂອງແຕ່ລະປີ ໃນໄລຍະນີ້ ລາຄາເຂົ້າກິນມີການເໜັງຕີງເພີ່ມຂຶ້ນ, ສະເພາະປີນີ້ ແມ່ນເຫັນວ່າມີທ່າອ່ຽງເພີ່ມຂຶ້ນສູງ ເນື່ອງມາຈາກສະພາບລາຄາສິນຄ້າທຸກປະເພດເພີ່ມຂຶ້ນ.

Facebook Comments Box

Similar Posts