ລົດໄຟລາວ-ຈີນນຳໂຊກມາໃຫ້ສປປລາວ

ດັ່ງພວກເຮົາໄດ້ຮັບຮູ້ ແລະ ເຫັນນຳກັນມາແລ້ວວ່າ ນັບແຕ່ໄດ້ເປີດນຳໃຊ້ເສັ້ນທາງລົດໄຟຄວາມໄວສູງ ລາວ-ຈີນ ມາແຕ່ຕົ້ນເດືອນທັນວາເປັນຕົ້ນມາ ກໍໄດ້ມີກະແສຂ່າວໂດ່ງດັງໄປທົ່ວພາກພື້ນ ແລະ ທົ່ວໂລກ ໂດຍສະເພາະແມ່ນໃນບັນດາປະເທດເພື່ອນບ້ານທີ່ມີຊາຍແດນຕິດກັບປະເທດລາວ. ໃນບັນດາແຫລ່ງຂ່າວທີ່ໄດ້ຜ່ານທາງສື່ອອນລາຍຕ່າງໆນັ້ນ ສ່ວນຫລາຍກໍແມ່ນມີຄວາມປິຕິຍິນດີກັບຄົນລາວປະເທດລາວທີ່ມີລົດໄຟຄວາມໄວສູງທັນຍຸກທັນສະໄໝ ເຊິ່ງໃນປະຫວັດສາດຜ່ານໆມາ ລາວເຮົາຍັງບໍ່ທັນມີລົດໄຟຄວາມໄວສູງແບບນີ້ມາກ່ອນ. ແຕ່ໄປຄຽງຄູ່ກັນນັ້ນ ຍັງມີບາງແຫລ່ງສື່ຂອງປະເທດເພື່ອນບ້ານ ໂດຍສະເພາະແມ່ນປະເທດໄທ ໄດ້ວິເຄາະຕຳໜິວິຈານແບບບໍ່ສ້າງສັນຕ່າງໆນານາ. ແຕ່ແນວໃດກໍຕາມ, ສຳລັບຄົນລາວເຮົາແລ້ວ ການທີ່ມີລົດໄຟຄວາມໄວສູງແມ່ນເປັນນິມິດໝາຍທີ່ດີ ປຽບເໝືອນມີໂຊກມາຫລົ່ນທັບ ຫລື ປຽບເໝືອນໄດ້ກ້ອນເງິນກ້ອນຄຳທີ່ຈະມາຕໍ່ຍອດໃນການສ້າງສາພັດທະນາປະເທດຊາດ.

ຫາກຕັ້ງໂຈດກັນວ່າ ການທີ່ປະເທດລາວມີລົດໄຟຄວາມໄວສູງ ລາວ-ຈີນ ໃນຄັ້ງນີ້ ເຮົາໄດ້ຜົນປະໂຫຍດຫຍັງແດ່ ? ຂໍຕອບຢ່າງໂກ້ໆໂລດວ່າ: ອັນທີໜຶ່ງ ໃນແຜນຍຸດທະສາດຊິ້ນໃຫຍ່ໆກໍແມ່ນລາວເຮົາໄດ້ກາຍເປັນປະເທດເຊື່ອມໂຍງ ແລະ ເຊື່ອມຈອດໄປແລ້ວຢ່າງເຕັມຕົວ ຫລື ເອີ້ນຢ່າງໜຶ່ງວ່າ ຈາກປະເທດທີ່ເປັນແລນລ໊ອກກາຍເປັນແລນລິ້ງ (Land Lock ເປັນ Land Link). ນອກຈາກປະເດັນໃຫຍ່ຫລັກໆທີ່ໄດ້ກ່າວມານີ້ແລ້ວ, ພາຍຫລັງເປີດບໍລິການເສັ້ນທາງລົດໄຟຄວາມໄວສູງ ລາວ-ຈີນ ພຽງເດືອນກວ່າໆ ກໍມີໂຄງການ, ກິດຈະການໃຫຍ່ໆແຕກໜໍ່ຈໍ່ແນວຕາມມາຢ່າງຫລວງຫລາຍເຊັ່ນ:

ໂຄງການທ່າເຮືອບົກທ່ານາແລ້ງມີມູນຄ່າ 727 ລ້ານໂດລາສະຫະລັດ, ໂຄງການທາງດ່ວນຫົກແລນ ວຽງຈັນ-ຮ່າໂນ້ຍ 707 ກິໂລແມັດ ມີມູນຄ່າເຖິງ 4.500 ລ້ານໂດລາສະຫະລັດ, ໂຄງການສະມາດຊິຕີ (Smart City) ບຶງທາດຫລວງ ມູນຄ່າໂຄງການລວມ 1.636 ລ້ານໂດລາສະຫະລັດ, ໂຄງການສ້າງອາຄານສູງທີ່ສຸດໃນລາວ ຄືໂຮງແຮມລາດຊະວົງພະລາຊາ ມີມູນຄ່າເຖິງ 99 ລ້ານໂດລາສະຫະລັດ, ໂຄງການກໍ່ສ້າງສະໜາມບິນບໍ່ແກ້ວ ມີມູນຄ່າ 150 ລ້ານໂດລາສະຫະລັດ, ໂຄງການສົ່ງເສີມ 5 ເຂດເສດຖະກິດພິເສດທົ່ວປະເທດ ຄາດກະໃຫ້ໄດ້ຢ່າງໜ້ອຍ 700 ບໍລິສັດເຂົ້າມາລົງທຶນ.

ຖ້າຫາກທຸກຢ່າງໄປຕາມແຜນ ຄາດວ່າລັດຖະບານຈະໄດ້ລາຍຮັບຈາກການເກັບພາສີ 110 ລ້ານໂດລາສະຫະລັດ ແລະ ຈະສາມາດສ້າງວຽກເຮັດງານທຳໄດ້ເຖິງ 130.000 ຕຳແໜ່ງ. ນອກຈາກໂຄງການ, ກິດຈະການທີ່ໄດ້ກ່າວມານີ້ແລ້ວ ເສັ້ນທາງລົດໄຟຄວາມໄວສູງ ລາວ-ຈີນ ຍັງມີຜູ້ໃຊ້ບໍລິການຢ່າງອັ່ງອໍ ແລະ ຄັບຄາໜາແໜ້ນ. ຂະບວນຂົນສົ່ງສິນຄ້າຜ່ານທາງລົດໄຟສາຍນີ້ກໍມີບັນຍາກາດຄຶກຄັກ ພຽງເດືອນກວ່າໆສາມາດຂົນສົ່ງສິນຄ້າຜ່ານລາວໄປຈີນ ແລະ ຜ່ານຈີນມາລາວໄດ້ຫລາຍຮ້ອຍຖ້ຽວ ສາມາດນຳເມັດເງິນມາໃຫ້ພາກບໍລິການດ້ານນີ້ຫລາຍຮ້ອຍລ້ານໂດລາສະຫະລັດ ແລະ ລັດຖະບານລາວກໍຈະສາມາດເກັບພາສີລາຍຮັບດ້ານນີ້ຢ່າງເປັນກອບເປັນກຳ. ຄາດວ່າໝົດປີ 2022 ລາວເຮົາຈະໄດ້ຮັບຜົນປະໂຫຍດດ້ານເສດຖະກິດ-ສັງຄົມເພີ່ມຂຶ້ນຢ່າງແນ່ນອນ.