ເຊັນສັນຍາສ້າງຕາຂ່າຍໄຟຟ້າແຮງກາງ

ເຊັນສັນຍາໂຄງການກໍ່ສ້າງຕາຂ່າຍ ໄຟຟ້າແຮງກາງ ແຕ່ບ້ານຫລັງຜາ ຫາສາມແຍກຜາງົວ ເມືອງລອງ

ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ເມື່ອບໍ່ດົນມານີ້, ແຂວງຫລວງນໍ້າທາ ເຊັນສັນຍາໂຄງການກໍ່ສ້າງຕາຂ່າຍໄຟຟ້າແຮງດັນກາງ 22 ກິໂລໂວນ, ແຮງດັນຕໍ່າ 0,4 ກິໂລໂວນ ແລະ ຕິດຕັ້ງໝໍ້ແປງໄຟຟ້າ ເຂົ້າບູລິມະສິດທີ 1 ແຕ່ບ້ານຫລັງຜາ ຫາສາມແຍກຜາງົວ ເມືອງລອງ

ໂດຍການຮ່ວມລົງນາມ ລະຫວ່າງ ທ່ານ ພູນໄຊພູນມີໄຊ ປະທານບໍລິສັດພີເອັດກໍ່ສ້າງ ແລະ ທ່ອງທ່ຽວຈຳກັດຜູ້ດຽວ, ທ່ານ ບຸນທຳ ອິນທະປະເສີດ ຫົວໜ້າພະແນກແຜນການ ແລະ ການລົງທຶນ, ທ່ານ ສະແຫວງ ອຸປະເສີດ ຫົວໜ້າພະແນກພະລັງງານ ແລະ ບໍ່ແຮ່, ທ່ານ ຄຳພັນ ໄຊສີ ຫົວໜ້າພະແນກການເງິນແຂວງ ໂດຍມີພາກສ່ວນກ່ຽວຂ້ອງ ເຂົ້າເປັນສັກຂີພິຍານ.

ທ່ານ ແສງເດືອນ ສິມມະນີວົງ ຮອງຫົວໜ້າພະແນກພະລັງງານ ແລະ ບໍ່ແຮ່ແຂວງ ໃຫ້ຮູ້ວ່າ: ໂຄງການດັ່ງກ່າວ ຕັ້ງຢູ່ເຂດຊາຍແດນ ລາວ-ມຽນມາ, ມີປະຊາຊົນອາໄສຢູ່ຕາມແລວຕາຂ່າຍທັງໝົດ 21 ບ້ານ, 858 ຄົວເຮືອນ, ໂຄງການນີ້ ໄດ້ສຳເລັດການສຳຫລວດ-ອອກແບບ ໃນປີ 2020, ການສໍາຫລວດ-ອອກແບບຂອງໂຄງການແມ່ນໄດ້ມອບໃຫ້ ບໍລິສັດ ຜູ້ສຳຫລວດ-ອອກແບບ ເປັນຜູ້ຈັດຕັ້ງປະຕິບັດ ແລະ ມີການກວດກາ, ຕິດຕາມຢ່າງໃກ້ຊິດ ແລະ ໄດ້ຜ່ານການຮັບຮອງຈາກພະແນກພະລັງງານ ແລະ ບໍ່ແຮ່ຕາມລະບຽບການ.

ພ້ອມນັ້ນ, ກໍໄດ້ຮັບຮອງເອົາແບບແຕ້ມເຕັກນິກຕ່າງໆ ພ້ອມທັງມູນຄ່າຂອງໂຄງການ ໃນປີ 2021 ແລະ ຜ່ານການປະເມີນຜົນ ຈາກກົມປະເມີນຜົນ, ກະຊວງແຜນການ ແລະການລົງທຶນ, ພ້ອມອະນຸມັດໃນແຜນການລົງທຶນຂອງລັດໃນປີ 2022 ໄລຍະການຈັດຕັ້ງປະຕິບັດໂຄງການແມ່ນແຕ່ປີ 2022 ຫາ 2026 ແລະ ການສໍາລະສະສາງ ແມ່ນ ແຕ່ປີ 2022 ຫາ 2025 ດ້ວຍມູນຄ່າທັງໝົດ 97,7 ຕື້ກວ່າກີບ, ໃນນັ້ນ ມູນຄ່າກໍ່ສ້າງໂຄງການ 97,2 ຕື້ກວ່າກີບ ແລະ ມູນຄ່າຄຸ້ມຄອງໂຄງການ 514 ລ້ານກວ່າກີບ.

ໂອກາດນີ້, ທ່ານ ຄຳໄຫລ ສີປະເສີດ ກໍໄດ້ໃຫ້ທິດຊີ້ນໍາບາງບັນຫາທີ່ສຳຄັນ ເປັນ ຕົ້ນ ໃຫ້ບໍລິສັດຜູ້ຮັບເໝົາ ເອົາໃຈໃສ່ປະຕິບັດຕາມບົດບັນທຶກສັນຍາ, ໃຫ້ທຸກພາກສ່ວນທີ່ກ່ຽວຂ້ອງເປັນເຈົ້າການປະສານສົມທົບ ແລະ ພົວພັນເຊິ່ງກັນ ແລະ ກັນ, ໃກ້ຊິດຕິດແທດ,ຖ້າຫຍຸ້ງຍາກບັນຫາໃດຈົ່ງຊ່ວຍກັນແກ້ໄຂໃຫ້ທັນການ.