ໄທ ຍັງບໍ່ທັນຕົກລົງຊື້ໄຟຟ້າຈາກ ລາວ ພັດວ່າ

ທາງການໄທ ຍັງບໍ່ຕົກລົງ ທີ່ຈະຊື້ໄຟຟ້າ ຈາກລາວ ຕື່ມເທື່ອ ພາຍຫຼັງ ທີ່ກຸ່ມເຄືອຂ່າຍ ປະຊາຊົນ 8 ແຂວງຂອງໄທ ຍື່ນໜັງສືຄັດຄ້ານ ເນື່ອງຈາກວ່າ ເຂື່ອນດັ່ງກ່າວ ສົ່ງຜົນກະທົບ ຕໍ່ຊີວິດ ການເປັນຢູ່ ຂອງປະຊາຊົນ. ກຸ່ມເຄືອຂ່າຍ ປະຊາຊົນ 8 ແຂວງລຸ່ມແມ່ນໍ້າ ຂອງຂອງໄທ ໄດ້ສົ່ງໜັງສື ໄປຍັງ ຄະນະ ກັມມະການ ນະໂຍບາຍ ພະລັງງານ ແຫ່ງຊາດ ກະຊວງ ພະລັງງານ ຂອງໄທ ເພື່ອຂໍຮູ້ ເຖິງຄວາມຄືບໜ້າ ຂອງແຜນການ ຊື້-ຂາຍ ໄຟຟ້າ ຈາກລາວ ແລະ ຄັດຄ້ານ ການເຮັດ ສັນຍາຊື້-ຂາຍ ໄຟຟ້າ ຈາກ 4 ເຂື່ອນແມ່ນໍ້າຂອງ ໃນລາວ ໃນມື້ວັນທີ 30 ກໍລະກົດ 2021 ທີ່ຜ່ານມາ. ມາເຖິງ ມື້ວັນທີ 25 ສິງຫາ ນີ້ ກະຊວງ ພະລັງງານ ຂອງໄທ ໄດ້ແຈ້ງຕອບ ມາໃຫ້ ກຸ່ມເຄືອຂ່າຍ ດັ່ງກ່າວ ຊຶ່ງໃນນັ້ນ ໄດ້ລະບຸວ່າ ຍັງບໍ່ໄດ້ ເຊັນສັນຍາ ຊື້-ຂາຍ ໄຟຟ້າ ຈາກ 4 ເຂື່ອນແມ່ນໍ້າຂອງ ໃນລາວ ຄື ເຂື່ອນປາກແບງ, ເຂື່ອນປາກລາຍ, ເຂື່ອນຫຼວງພະບາງ ແລະ ເຂື່ອນຊະນະຄາມ, ປັດຈຸບັນ ປະເທດໄທ ມີໄຟຟ້າ ສໍາຮອງຫຼາຍ ຄື ເກີນ 50% ຂອງຄວາມຈໍາເປັນ, ແຕ່ທີ່ຜ່ານມາ ກໍຍັງເຫັນວ່າ ປະເທດໄທ ຍັງຮັບຊື້ ໄຟຟ້າ ຈາກເຂື່ອນ ໃນລາວ ແລະ ປະເທດລາວ ກໍກໍາລັງເລັ່ງ ສ້າງເຂື່ອນໄຟຟ້າ ອີກຫຼາຍແຫ່ງ ຕາມນະໂຍບາຍ ໝໍ້ໄຟ ແຫ່ງອາຊຽນ ອັນເຮັດໃຫ້ ເກີດຫາງສຽງ ວິພາກວິຈານ ລັດຖະບານໄທ ແລະ ໜ່ວຍງານ ທີ່ຮັບຜິດຊອບ ດ້ານພະລັງງານ ຄື ການໄຟຟ້າ ຝ່າຍຜະລິດ ແຫ່ງປະເທດໄທ ມາໂດຍຕລອດ ເນື່ອງຈາກ ມີປະລິມານ ໄຟຟ້າ ຫຼາຍເກີນຄວາມຈໍາເປັນ ແລະ ເປັນພາລະ ໃຫ້ປະຊາຊົນ ໄທຕື່ມ.

ກະຊວງ ພະລັງງານ ຂອງໄທ ເວົ້າວ່າ ການໄຟຟ້າ ຝ່າຍຜະລິດ ແຫ່ງປະເທດໄທ ຈະຕ້ອງ ລະບຸ ໃນສັນຍາຊື້-ຂາຍ ໄຟຟ້າວ່າ ຜູ້ພັດທະນາ ໂຄງການເຂື່ອນໄຟຟ້າ ຕ້ອງຮັບຜິດຊອບ ໃນການຊົດເຊີຍ ຜົນກະທົບ ທີ່ອາດເກີດຂຶ້ນ ຕໍ່ປະເທດໄທ ທັງທາງດ້ານສັງຄົມ ແລະ ສິ່ງແວດລ້ອມ ຈາກການກໍ່ສ້າງ ເຂື່ອນໄຟຟ້າ ແລະ ການຜະລິດໄຟຟ້າ ຕາມຄວາມກັງວົນ ຂອງກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ແລະ ສໍານັກງານ ຊັບພະຍາກອນນໍ້າ ແຫ່ງຊາດ ຂອງໄທ. ທ່ານ ວິທູນ ເພີມພົງສາຈະເຣີນ, ຜູ້ອໍານວຍການ ເຄືອຂ່າຍ ພະລັງງານ ນິເວດວິທຍາ ແມ່ນໍ້າຂອງ ຂອງໄທ ເວົ້າ ໃນມື້ດຽວກັນນີ້ວ່າ ບໍ່ມີ ຄວາມຈໍາເປັນ ທີ່ທາງການໄທ ຈະເຊັນສັນຍາ ຊື້ໄຟຟ້າ ຈາກປະເທດລາວ ເພີ່ມຕື່ມ ເນື່ອງຈາກວ່າ ປັດຈຸບັນ ປະເທດໄທ ມີໄຟຟ້າ ສໍາຮອງຫຼາຍ ແລະ ຍັງມີສັນຍາ ຊື້-ຂາຍ ໄຟຟ້າເດີມ 9,000 ເມກາວັດ ທີ່ພຽງພໍ ສໍາລັບ ປະເທດໄທ ຊຶ່ງຈະນໍາໃຊ້ໄດ້ ອີກຫຼາຍປີ. ກ່ຽວກັບ ເລື່ອງນີ້ ເຈົ້າໜ້າທີ່ ກະຊວງ ພະລັງງານ ແລະ ບໍ່ແຮ່ ຂອງລາວທ່ານຫນຶ່ງ ກ່າວ ໃນມື້ດຽວກັນນີ້ວ່າ ຍັງບໍ່ເຫັນ ໜັງສືແຈ້ງການ ຈາກກະຊວງພະ ລັງງານ ຂອງໄທ ກ່ຽວກັບ ເລື່ອງຈະບໍ່ເຊັນສັນຍາ ຊື້ໄຟຟ້າ ຈາກເຂື່ອນ 4 ແຫ່ງ ໃນແມ່ນໍ້າຂອງ ຂອງລາວເທື່ອ, ແຕ່ປັດຈຸບັນ ປະເທດໄທ ຄື ຕະລາດຮັບຊື້ ໄຟຟ້າ ອັນດັບຫນຶ່ງ ຂອງລາວ ແລະ ເປັນລູກຄ້າ ສໍາຄັນທີ່ສຸດ ແລະ ລັດຖະບານລາວ ກໍພະຍາຍາມ ສ້າງແຫລ່ງ ພະລັງງານ ສະອາດ ແລະ ໝັ້ນຄົງ ເພື່ອຮອງຮັບ ການຂະຫຍາຍໂຕ ຂອງປະເທດໄທ ແລະ ປະເທດຕ່າງໆ ໃນອາຊຽນ ຕາມນະໂຍບາຍຂອງ ລັດຖະບານລາວ.

ແຕ່ຖ້າຫາກ ທາງການໄທ ບໍ່ເຊັນສັນຍາ ຊື້-ຂາຍ ໄຟຟ້າ ຈາກເຂື່ອນ 4 ແຫ່ງດັ່ງກ່າວ ກໍຈະເຮັດໃຫ້ ມີຜົນກະທົບ ຕໍ່ການຜະລິດໄຟຟ້າ ຂອງເຂື່ອນ 4 ແຫ່ງນັ້ນ ຍ້ອນຈະບໍ່ມີ ຕະລາດຮອງຮັບ ເພາະຕາມແຜນການ ແມ່ນຈະຜະລິດໄຟຟ້າ ຂາຍໃຫ້ໄທ ໂດຍກົງ, ຫາກໄທ ບໍ່ຮັບຊື້ ກໍຈະກາຍ ເປັນສິ່ງທ້າທາຍ ຫຼາຍສົມຄວນ ຊຶ່ງຣັດຖະບານລາວ ຈະຕ້ອງ ໄດ້ຫາທາງ ເຈລະຈາ ກັບທາງການໄທ ໃນອະນາຄົດ, ທ່ານເວົ້າ ຕື່ມວ່າ ຫາກໄທ ບໍ່ຮັບຊື້ ໄຟຟ້າ ຈາກເຂື່ອນ ໃນແມ່ນໍ້າຂອງ 4 ແຫ່ງນັ້ນແທ້ ກໍຍາກ ທີ່ຈະສົ່ງຂາຍ ໃຫ້ປະເທດອື່ນ ເຊັ່ນ ຈີນ, ຫວຽດນາມ ແລະ ກຳປູເຈຍ ເພາະບໍ່ມີ ສາຍສົ່ງ ແລະ ປະເທດເຫລົ່ານັ້ນ ກໍມີ ໄຟຟ້າ ສໍາຮອງ ຂ້ອນຂ້າງຫຼາຍຂຶ້ນ ນັບມື້.

ເມື່ອຕົ້ນ ເດືອນ ສິງຫາ 2021 ນີ້, ທາງການລາວ ໄດ້ສະເຫນີ ຂາຍໄຟຟ້າ ໃຫ້ໄທ ເພີ່ມຂຶ້ນອີກ 1,200 ເມກາວັດ ຈາກທີ່ ໄດ້ຕົກລົງກັນ ຕາມສັນຍາເດີມ 9,000 ເມກາວັດ ຊຶ່ງປັດຈຸບັນ ຍັງຢູ່ໃນຂັ້ນຕອນ ຂອງການຄົ້ນຄວ້າ ພິຈາລະນາ ລາຍລະອຽດ ຮ່ວມກັນຢູ່. ກ່ຽວກັບ ເລື່ອງນີ້ ການໄຟຟ້າ ຝ່າຍຜະລິດ ແຫ່ງປະເທດໄທ ໄດ້ເວົ້າ ໃນມື້ວັນທີ 26 ສິງຫາ 2021 ນີ້ວ່າ ການຈະຮັບຊື້ ຫຼື ບໍ່ຮັບຊື້ ໄຟຟ້າ ຈາກລາວ ມັນກໍຂຶ້ນ ຢູ່ກັບຄວາມຕ້ອງ ການໃຊ້ ໄຟຟ້າ ໃນປະເທດໄທ, ຂຶ້ນຢູ່ກັບ ການຜະລິດ ໃນປະເທດໄທ ແລະ ລາຄາໄຟຟ້າ ຊຶ່ງແມ່ນ ກະຊວງພະລັງງານ ເປັນຜູ້ພິຈາລະນາ. ອີງຕາມ ແຜນພະລັງງານ ຂອງລາວ ໃນປີ 2030, ຫາກແຫລ່ງ ພະລັງງານ ຖື ກ ສ້າງຂຶ້ນ ທຸກບ່ອນ ປະເທດລາວ ຈະມີພະລັງງານ ໄຟຟ້າ ຫຼາຍເຖິງ 28,000 ເມກາວັດ ເພື່ອສະຫນອງ ໄຟຟ້າ ໃຫ້ປະເທດ ຕ່າງໆ ໃນອາຊຽນ ແລະ ຈະກາຍເປັນ ສູນກາງ ດ້ານພະລັງງານ ຫຼື ໝໍ້ໄຟ ແຫ່ງອາຊຽນ.