ສຶກສາອົບຮົມເຈົ້າຂອງເດີ່ນບານເຕະຢູ່ເຂດບ້ານອຸດົມຜົນ

ໃນວັນທີ 28 ພຶດສະພາ 2021 ປກສ ກຸ່ມທ່າງ່ອນສົມທົບກັບເຈົ້າໜ້າທີ່ ສະຖານີຮັບແຈ້ງເຫດ ແລະ ແກ້ໄຂເຫດສຸກເສີນ 1191 ດອນຕິ້ວ ແລະ ອໍານາດການປົກຄອງບ້ານອຸດົມຜົນ ເມືອງໄຊທານີ ນວ ລົງເຮັດບົດບັນທຶກກ່າວຕັກເຕືອນ, ສຶກສາອົບຮົມເຈົ້າຂອງເດີ່ນບານເຕະ ຢູ່ເຂດບ້ານອຸດົມຜົນ ທີ່ລະເມີດຄໍາສັ່ງເລກທີ 15/ນຍ ແລະ ແຈ້ງການເລກທີ 02/ຈນວ.

ພັທ ຈັນເພັງ ແກ້ວປະເສີດ ຮອງຫົວຫນ້າກອງບັນຊາການ ປກສ ເມືອງໄຊທານີ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກປະຊາຊົນ ຈຶ່ງໄດ້ມອບໃຫ້ ປກສ ກຸ່ມ ສົມທົບກັບພາກສ່ວນກ່ຽວຂ້ອງລົງກວດກາ ພົບເຫັນເດີ່ນບານເຕະດັ່ງກ່າວເປີດໃຫ້ບໍລິການ ຈຶ່ງໄດ້ສຶກສາອົບຮົມກ່າວເຕືອນ ເນື່ອງຈາກວ່າການຫຼິ້ນກິລາບານເຕະທີ່ມີຄົນຈໍານວນຫຼາຍ ແມ່ນມີຄວາມສ່ຽງສູງໃນການແຜ່ລະບາດຂອງພະຍາດໂຄວິດ -19

ແລະ ຍັງໄດ້ຮຽກຮ້ອງໃຫ້ບັນດາຜູ້ປະກອບການ, ຫົວຫນ່ວຍທຸລະກິດ ຈົ່ງເອົາໃຈໃສ່ປະຕິບັດຄໍາສັ່ງ ແລະ ແຈ້ງການ ເລກທີ 02/ຈນວ ວ່າດ້ວຍ ການເພີ່ມທະວີມາດຕະການປ້ອງກັນຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ -19 ຢູ່ ນວ ເພື່ອເຮັດໃຫ້ພະຍາດດັ່ງກ່າວຢູ່ພາຍໃນເມືອງໄຊທານີ ນວ ນັບມື້ຫລຸດລົງ.